د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

"د خبريالانو حقوقي مسايلو ته دې جدي پام وشي"

"د خبريالانو حقوقي مسايلو ته دې جدي پام وشي"

Jan 20, 2016 - 18:53

کندهار (پژواک ٣٠ مرغومى ٩٤): د سوېلي زون خبريالان وايي، له خپلو قانوني حقوقو بې برخې دي، په کار ده حکومت او رسنۍ جدي پاملرنه ورته وکړي.

دغه موضوع د ژورناليزم د اخلاقي اصولو په هغه يوه ورځني کنفرانس کې مطرح شوه چې په کندهار کې جوړ شوى و.

په دې کنفرانس کې د کندهار تر څنګ د هلمند، اروزګان او زابل ولايتونو لسګونو خبريالانو ګډون کړى وو.

د غونډې لومړۍ برخه معرفي، هدف او ويناوو ته ځانګړې شوې وه او په دويمه برخه کې يې خبريالانو په ګروپي بڼه د ژورناليزم پر اخلاقي اصولو بحث وکړ او په دې اړه يې خپل نظريات او وړانديزونه شريک کړل.

د ژورناليزم د اخلاقي اصولو په چمتو شوې طرحه کې د ګڼو نورو مادو تر څنګ راغلي وو، چې خبريالان او د رسنيو مسوولين بايد د خپلو دندو پر مهال اخلاقي اصول مراعات کړي او ملي ارزښتونو ته درناوى ولري.

دغه راز په دې طرحه کې يادونه شوې وه چې خبريالان او رسنۍ دې له تبعيض پرته کره معلومات خپاره کړي، د ادارو او اشخاصو د بدنامولو هڅه دې نه کوي، د تاوتريخوالي پر مهال اخيستل شوي انځورونه او ويډيوګانې دې نه خپروي او د ترهګريزو ډلو په ګټه دې تبليغ نه کوي.

په ياده شوې طرحه کې يوه ماده دا هم وه، کله چې يو خبريال د بيان د ازادۍ او اطلاعاتو ته د لاسرسي په برخه کې کار کوي، بايد له خپل حق څخه دفاع وکړي.

خو خبريالانو نيوکه کوله چې معلوماتو ته د لاسرسي قانون له تصويبېدو سربېره عملي شوى نه دى، چې له مخې يې لا هم خبريالان معلوماتو ته لاسرسى نه لري.

کندهار مېشتي خبريال محمد ابراهيم سپېڅلي د خپل کاري ګروپ په استازولۍ وويل، حکومت ته په کار دي چې معلوماتو ته د لاسرسي قانون د عملي کېدو په برخه کې جدي کار وکړي.

د هغه د معلوماتو له مخې، دغه قانون له باميان پرته په يوه ولايت کې هم پلى شوى نه دى، چې له امله يې خبريالان د معلوماتو د راټولولو په برخه کې له ستونزو سره مخامخ دي.

نوموړي يادونه وکړه چې ډېر مهال چارواکي خبريالانو ته معلومات نه ورکوي او يا هم په ځنډ نيمګړي معلومات ورکوي چې د هغوى کار يې له ستونزو سره مخ کړى دى.

هلمند مېشتي خبريال الياس داعي وويل، خبريالانو ته د اخلاقي اصولو ټاکلو تر څنګ دې رسنۍ او حکومت د خبريالانو حقوقو ته جدي پام وکړي، ځکه ډېرى خبريالان کافي معاش نه لري او يا هم په دې وروستيو کې په ځنډ معاش تر لاسه کوي، دغه راز ځينې يې د بې کاره کېدو له ګواښ سره مخامخ دي او تر ټولو بده دا چې بيمه هم نه لري.

د ده په خبره، د سوېلي زون خبريالان د هېواد په کچه په سختو نامساعده حالاتو کې کار کوي او خلکو ته د کره معلوماتو رسولو دنده تر سره کوي، په داسې حال کې چې هېڅ راز حقوقي او نورې اسانتياوې نه لري.

د لطيف په نوم ارزوګان مېشتي خبريال هم د خبريالانو د حقوقي مسايلو نه مراعتول جدي ستونزه وبلله او ويې ويل، خبريالانو ته بايد د کافي معاش تر څنګ د بيمې اسانتيا برابره شي.

په سوېل کې له ازادو رسنيو څخه د ملاتړ ادارې (نى) مسوول سمېع غيرتمل پژواک اژانس ته وويل، دغه کنفرانس د ژورناليزم پر اخلاقي اصولو د بحث تر څنګ دا موقع برابروي چې خبريالان د خپلو ستونزو يادونه وکړي او اړوندې ادارې يې هواري ته وهڅوي.

هغه يادونه وکړه چې په ننني کنفرانس کې د خبريالانو ټول نظريات او وړانديزونه به وروسته په کابل کې جوړېدونکي لويې غونډې ته وړاندې شي او د هېواد په کچه به د ژورناليزم اخلاقي اصولنامه چمتو شي.

نوموړي د کندهار له اړوندو ادارو وغوښتل چې معلوماتو ته د لاسرسي د قانون د پلي کېدو په موخه دې يو کمېسيون جوړ کړي، څو د دولتي ادارو مسوولين پوه شي چې د اړتيا وړ معلومات له خبريالانو سره په کره توګه شريک شي.

د يادونې ده چې د ژورناليزم د اخلاقي اصولو يو ورځنى کنفرانس په سوېل کې له ازادو رسنيو څخه د ملاتړ ادارې (نى) په هڅو جوړ شوى و.

ورته راپورونه:

اعلانونه

Advertisement

Etisalat Get more data, Etisalat Afghanistan