کابل (پژواک، ٢١ سلواغه ٩٤): د سالنګ لويه لاره چې د هېواد مرکز له ٩ شمالي ولايتونو سره نښلوي، د سختو واورو او توپانونو له امله د ترافيکو پر مخ وتړل شوه.
د سالنګونو د ساتنې او څارنې مشر جنرال رجب پژواک خبري اژانس ته وويل چې دا لويه لار يې د مسافرو د خونديتوب په موخه نن له غرمې مخکې لع ١١:٠٠ بجو راهيسې دواړو خواوو ته د ترافيکو پر مخ تړلې او د واورې تر درېدو او پاکولو پورې به تړلې وي.
نوموړي زياته کړه چې موټر د بغلان ولايت د مرکزي بغلان ولسوالۍ په ملخان او د پروان د جبل سراج ولسوالۍ په تاجکان سيمو کې درول شوي دي.
د نوموړي د معلوماتو له مخې، له تېرې شپې راهيسې تر اوسه په سالنګونو کې شاوخوا ٩٠ سانتي متره واوره ورېدلې ده.
په ژمي کې له دې لارې تګ راتګ له خطرونو سره تړلى دى.
د ١٣٨٨ لمريز کال په سلواغې مياشت کې په سوېلي سالنګ کې د درنو واورو ښويېدنو او توپانونو له امله شاوخوا ١٧٠ کسان له منځه ولاړل او ١٢٥نور ژوبل شول.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن