هرات ښار (پژواک، ٧ ورى ٩٥): د هرات ولايت امنيتي موظفينو لس کسان د تښتونو په تور نيولي دي.
ياد کسان د هرات ملي امنيت او پوليس ځواکونو له لوري په دوو ځانګړو پېښو کې په هرات ښار او شينډنډ ولسوالۍ کې نيول شوي دي.
د هرات د والي وياند جيلاني فرهاد د ملي امنيت په استازولۍ پژواک ته وويل چې د دغه ولايت د ملي امنيت موظفينو د تښتوونکو اووه کسيزه ډله نيولې او له هېواده يې د ٣٠ ټنه رخام ډبرو له قاچاق څخه مخنيوى کړى دى.
د هرات د والي وياند زياته کړه چې ددې اووه کسيزې ډلې کسان د هرات د کرخ ولسوالي اوسېدونکي دي چې د ملي امنيت په ځانګړو عملياتو کې نيول شوي دي.
فرهاد زياته کړه چې ياده ډله د هراتي وګړو د تښتونې په ٩ قضيو کې لاس لري چې بالاخره د ښار له نهمې ناحيې او انجيل ولسوالۍ نه ونيول شوه.
د فرهاد په خبره، له دوى نه يوه اندازه وسلې، چاودېدونکي توکي، ١٧ مبايلونه او درې موټرسايکلونه هم ترلاسه شوي دي.
د والي وياند وويل، هغه پنځه موټر د هرات د انجيل ولسوالۍ په شيدايي سيمه کې د ملي امنيت رياست د کارکوونکو په عملياتو کې نيول شوي چې په غير قانوني ډول يې د چشت شريف ولسوالۍ له کانونو د رخام ډبرې استخراج کړې وې او غوښتل يې چې له هېواده بهر يې قاچاق کړي.
هغه زياته کړه چې په رخام ډبرو بار موټر يې د قانوني پړاوونو د وهلو لپاره د کانونو او صنايعو رياست ته تسليم کړي دي.
په هرات کې د درېيو انسان تښتوونکو د نيولو او يوه تښتول شوي تن د خوشي کېدو خبر هم ورکړل شو.
د هرات د امنيې قوماندانۍ وياند عبدالرووف احمدي وويل چې له دې درېيو تښتوونکو نه يوه څو ورځې وړاندې د هرات يو اوسېدونکى له هرات– کندهار لويې لارې تښتولى و کوم چې پرون د شينډنډ ولسوالۍ په عزيز اباد سيمه کې را خوشي شو.
يادې سرچينې درې واړه نيول شوي د اغاګل، پهلوان او غلام په نومونو ياد کړل چې د زابل اصلي اوسېدونکي دي او اوسمهال د هرات د شينډنډ ولسوالۍ په عزيز اباد سيمه کې اوسېږي چې په خپلو جرمونو يې اعتراف کړى دى.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن