جلال اباد (پژواک، ١٥ ورى ٩٥): په لغمان ولايت کې د کابل- ننګرهار پر لويه لار د ترافيکي پېښې له امله دوه کسان مړه شوي او درې نور ټپيان دي.
د لغمان د والي وياند سرحدي ځواک د وري په ١٥مه پژواک خبري اژانس ته وويل چې یاده پېښه د قرغیو ولسوالۍ اړوند د کابل- ننګرهار پر لویه لاره د ګردي کڅ په سیمه کې د کرولا او ټېلر موټرو د ټکر له امله رامنځته شوې ده.
هغه وايي چې په پېښه کې دوه کسان مړه شوي او درې نور ټپيان دي.
هغه وايي چې په کرولا کې ناسته ټول سپرلي نارینه وو چې ټپيان یې د سرخکانو په روغتیايي کلینیک کې تر لومړنۍ درملنې وروسته ننګرهار ته انتقال شوي دي.
د کابل- ننګرهار د لويې لارې يو مسافر ميرويس پژواک ته وويل: ((موږ چې کله ورسېدو نو کرولا او ټېلر سره جنګېدلي و، د ټېلر ډريو تښتيدلى و خو په کرولا کې دوه کسه مړه و چې يو يې ډريور و او درې کسه نور يې سخت ټپيان وو.))
د لويې لارې د ترافیکو د معلوماتو له مخې، پېښه د کرولا موټر چلوونکي د بې احتياطۍ له امله رامنځته شوې ده.
دا په داسې حال کې چې وړمه ورځ په هرات ولايت کې د ترافيکي پېښې له امله ١١کسا وژل شوي وو او ٧ تنه نور ټپيان دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن