د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

روان کال څه باندې ٢٠٠ زره سيلانيان د بند امير ليدو ته تللي

روان کال څه باندې ٢٠٠ زره سيلانيان د بند امير ليدو ته تللي

Sep 13, 2016 - 09:12

باميان ښار (پژواک، ۲۳ وږى ٩٥): شمېرې ښيي چې د باميان – کابل لويې لارې د نا امنيو پر زياتېدو او د هوايي ترانسپورټ پر نشتوالي سربېره هم په روان کال کې د بهرنيو سيلانيانو په ګډون څه باندې ٢٠٠٠ سلانيانو له بند امير او د باميانو له نورو تاريخي سيمو ليدنه کړې ده.

د دغه ولايت چارواکي وايي چې په روان کال کې تر ټولو زيات سيلانيان له کندهار، کابل، غزني، دايکنډي او شمالي ولايتونو د دوبي په موسم کې باميانو ته ورغلي او ګڼو هغو يې خپلې کورنۍ هم د تفريح لپاره ورسره راوستلي دي.

سره له دې چې د هغو سيلانيانو شمېر چې د باميانو له اطلاعاتو او کلتور رياست يې ټکټ اخيستى او تاريخي سيمې ابدات يې ليدلي کمه ده، خو ويل کېږي چې يواځې د بند امير د ليدو لپاره د راغلو کسانو شمېره له دوه سوه زره کسانو لوړېږي.

په باميانو کې د امريکا د ژوو د ژوند سازمان موسسې (wcs) مشر محمد ابراهيم ابرار پژواک خبري اژانس ته وويل: ((زموږ له خوا د ثبت شوو شمېرو له مخې، په ټوله کې په روان کال کې څه باندې دوه سوه زره کسانو د افغانستان د لومړي ملي پارک بند امير څخه ليدنه کړې ده.))

هغه زياته کړه، که چېرې باميانو ته د غځېدلو لارو او په ټوله کې په هېواد کې د نا امنيو کچه ټيټه شي، د باميانو په ځانګړي ډول د بندامير ليدونکي به هم څو چنده زيات شي، کورني او بهرني سيلانيان به د دغه ولايت ليدو ته مخه کړي.

هغه زياته کړه: ((اوسمهال له کابل نه باميانو ته ټولې راغلې لارې نا امنې دي، خلک په دغه مسير په وېره او ډار سفر کوي، دا چاره د دې سبب شوې چې خلک په اوړي کې باميانو ته د سفر لپاره ډېر کم زړه ښه کړي.))

د باميانو د اطلاعاتو او کلتور رياست د کلتور او ګرځندوى مسوول محمد اسحق عزيزي پژواک ته وويل چې په روان کال کې ٣٨٠٠ کورنيو او ٢٤٤ بهرنيو سيلانيانو له دغه رياسته ټکټونه پېرلي او د ولايت له تاريخي ساحو او ابداتو يې ليدنه کړې ده.

د سرچينې د معلوماتو له مخې، په باميانو کې شاوخوا ١٧٠ تاريخي ابدې شته چې ٨ هغه يې د نړيوالو ميراثونو له سازمان سره ثبت شوې او ټکټ اخيستونکي د ټکټ له اخيستلو وروسته له تاريخي ابدو ليدنه کولى شي.

عزيزي وويل چې باميانو ته د سيلانيانو ورتګ د ولايت د ځايي او ملي اقتصاد د ودې سبب ګرځي چې له امله يې يو شمېر کسانو ته کار پيدا کېږي او د باميانو ګڼ اوسېدونکي له دې لارې ګټه کوي.

سرچينې زياته کړه: ((د هوايي ترانسپورټ نشتوالى، کابل ته د غځېدلو لويو لارو نا امني، د هېواد په کچه جګړه، چاودنې او ځانمرګي بريدونه د دې لامل شوي چې باميانو ته د خلکو د ورتګ مخه ونيسي.))

هغه زياته کړه چې په باميانو کې د بهرنيو ليدونکو د امکاناتو او اوسېدو په موخه د ٥٠٠ کسانو لپاره په هوټولونو کې اسانتياوې برابرې شوې چې نړيوال معيار لري، په دې برخه کې څه ستونزه نشته او د کورنيو مېلمنو لپاره هم امکانات شته، په باميانو کې زرګونه مېلمستونونه او هوټلونه شته چې د زرګونو مېلمنو ځايولى شي.

نجيب الله له کابل نه له خپلې کورنۍ سره د باميانو ليدوته تللى دی.

نوموړى پژواک ته وويل چې يوه اوونۍ يې په بند امير کې په يوه کرايي خېمه کې تېره کړې ده.

هغه زياته کړه: ((کورنۍ مې ډېر ښه وخت تېر کړ، په دې يوه اوونۍ کې مې فکر وکړ چې په افغانستان کې نه يم، دلته مې له هر ډول چاودنو، ډار او اندېښنې لرې د ارام ساه واخيسته.))

باميان د افغانستان له تاريخي او لرغونو ولايتونو څخه دى چې د افغانستان لومړي ملي او طبيعي پارک بند امير او د بودا د دوو نړېدلو مجسمو پاتې شونو تاريخي او توريستي اهميت ورکړى، د باميانو اته ساحې د ملګرو ملتونو کلتوري سازمان( يونسکو) سره د کلتوري ميراثونو په نوم ثبت شوې دي.

ورته راپورونه:

نظر ورکړئ

اعلانونه

Advertisement