جلال اباد (پژواک، ٢٩ وږى ٩٥): د ننګرهار ولايت په غني خېلو ولسوالۍ کې ناڅرګندو وسله والو دوه سپين ږيري چې ملکي وګړي وو، وژلي دي.
د غني خېلو ولسوال عبدالوهاب د وږي په ٢٩مه پژواک خبري اژانس ته وويل چې دا پېښه نن له غرمې مخکې د يادې ولسوالۍ د سياچو په سیمه کې رامنځته شوې ده.
هغه زياته کړه چې ناڅرګنده وسله والو دوه سپين ږيري چې غوښتل يې له غني خېلو ولسوالۍ څخه د ولايت مرکز جلال اباد ته ولاړ شي، په ياده سیمه کې د وسله والو له لوري له موټره ښکته کړل شوي او بيا وژل شوي دي.
د ننګرهار د والي وياند عطاءالله خوږياڼي د يادې پېښې د تاييد تر څنګ پژواک ته وويل چې والي سليم خان کندوزى پر دې پېښې خواشينی شوی او اړوندو امنيتي ارګانونو ته يې د پلټنو لارښوونه کړې ده.
نوموړي دغه راز زياته کړه چې د اوو پاکستانيانو په ګډون ١١ تنه د پوليسو له خوا نيول شوي دي.
د هغه په وينا، ياد کسان هغه مهال ونيول شول، کله چې يې د ډاډسن ډوله او کرولا ډوله موټرونو په وسيله نامعلوم لوري ته لوژستيکي توکې لېږدول.
له نيول شوو کسانو د مګړۍ پلټنې دوام لري .
بلخوا د لغمان ولايت ملي امنيت رياست له لوري د ځانمرګو بريدونو شپږ واسکټونه او نور چاودېدونکي توکي نيول شوي دي.
د لغمان د والي ویاند سرحدي ځواک پژواک اژانس ته وويل چې ياد توکي د قرغیو ولسوالۍ اړوند د کابل- جلال اباد پر لويه لاره د کاکڅ د فرمانخېلو په سيمه کې د ځانګړو ځواکونو د عملياتو پر مهال ترلاسه شوي.
هغه زياته کړه چې په تر لاسه شويو توکو کې له چاودېدونکو توکو ډک ۶ واسکټونه ۱۲ کيلو ګرامه چاودېدونکي توکي ، ۲۰ کيلو ګرامه امونيم نايتريت او پوتاشيم کلورايد، يوه لس ليتره بوشکه چې په مکمله توګه له چاودېدونکو توکه ډکه شوې وه، یو عدد کپسول برقي، ۶ عدده بطرۍ او ۱۲ عدده د انفجار سويچونه شامل دي.
د ځواک په وينا، ياد توکي په يو شاړ او کنډواله هوټل کې د مخالفو وسلوالو له لوري ځای پر ځای شوي و، او پلان يې درلود، چې د ولايت مرکز مهترلام ته يې ولېږدوي.
وسله والو مخالفينو د يادو پېښو په اړه تر اوسه څه نه دي ويلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن