مزار شريف (پژواک، ٣ تله ٩٥):د بلخ ولايت په شورتېپه کې د عملياتو پر مهال د طالبانو يو مهم شپږ کسيز ګروپ نيول شوى او په کاپيسا کې اووه تنه نامسوول وسله وال هم نيول شوي دي .
د بلخ د والي وياند منير فرهاد د تلې په ۳ مه پژواک خبري اژانس ته وويل چې عمليات د جمعې ورځې له سهاره پيل شوي و چې تر شپې ناوخته يې دوام درلود.
د هغه په وينا، په عملياتو کې د بلخ لپاره د طالبانو د مرستيال والي ورور، د طالبانو د يوه ولسوال دوه وروڼه، يو تن ماين جوړونکی او دوه نور وسله وال طالبان نيول شوي دي.
د والي وياند زياتوي چې د دغو عملياتو مشري د بلخ سرپرست والي عطامحمد نور کوله چې په پايله کې يې ۹ کلي هم له وسله والو څخه پاک شوي دي.
وسله والو طالبانو تراوسه په دې اړه څه نه دي ويلي.
ديوبل خبرله مخې، د کاپيسا امنيتي چارواکي وايي چې ځواکونو يې اووه تنه نامسوول وسله وال له وسلو سره يو ځای نيولي دي.
د کاپيسا د امنيه قوماندانۍ وياند نقيب الله اميني د تلې په ٣مه، پژواک خبري اژانس ته وويل چې ياد کسان تېره ورځ په نجراب ولسوالۍ کې نيول شوي.
هغه زياته کړه چې يادو کسانو د نشه يي توکو کاروبار هم کاوه او په سيمه کې يې له وسله والو مخالفينو سره اړيکې هم درلودې .
د نوموړي په وينا، دوى د نورو ورانکاريو ترڅنګ پر لويو لارو د ماينونو ځاى پر ځاى کولو او چاودنو کې هم لاس درلود، چې په يوه چاودنه کې تېره اوونۍ درې پوليس وژل شوي وو.
اميني وويل چې دغه کسان د يوه کمين په ترڅ کې له وسله سره يو ځاى نيول شوي دي.
د يادونې ده چې په کاپيسا کې خلک د حکومت له وسله والو مخالفينو سر بېره له نامسوولو وسله والو هم شکايت کوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن