غزني ښار (پژواک، ١٣ مرغومى ٩٥): د غزني په اندړو ولسوالۍ کې په تېرو دوو اونيو کې وسله والو طالبانو د بېلابېلو جرمونو په تور ١٣ کسان په درو وهلي خو د دغه ولايت امنيتي چارواکي وايي چې طالبان باید لومړی پر خپل ځان شریعت جاري کړي.
د اندړو ولسوالۍ یوه اوسېدونکي رحيم الله د مرغومي په ١٣مه پژواک خبري اژانس ته وويل چې طالبانو تېره اونې په ګبرو سيمه کې يو طالب او نجلۍ د نامشروع اړيکو په تور پر درو وهلي دي.
هغه وايي: ((طالبانو نجلۍ په څادر کې تاوه کړې وه خو د درو وهلو په وخت کې نجلۍ ډېرې چيغې وهلې.))
دغه راز د اندړو بل اوسېدونکي لعل محمد پژواک ته وويل چې د کمالخېلو په سيمه کې هم طالبانو يو هلک او يوه نجلۍ له کوره د تېښتې په تور په درو وهلي دي.
هغه وايي: ((طالبانو دغه کسان د زرګونو کسانو په مخ کې د دې لپاره و وهل تر څو نور خلک دغه کار ونه وکړي.))
هغه وويل چې طالبانو په همدې موده کې د مکرو په سيمه کې هم درې کسان چې د خلکو له کورونو به يې د لمريزې برېښنا تختې او نور شيان غلا کول، په درو وهلي دي.
دغه راز د غزني ښار د قرباغي سيمې اوسېدونکي جمشيد پژواک ته وويل چې تېره ورځ طالبانو په دې سيمه کې پنځه تنه د غلا او يو بل کس يې د زنا په تور ٣٩ -٣٩ درې او ٢٨- ٢٨ لښتې وهلي دي.
د اړوندې موضوع په اړه د غزني امنيه قوماندان مل پاسوال امين امرخېل پژواک ته وويل چې تېره ورځ طالبانو په قره باغي سيمه کې يو شمېر کسان په درو وهلي دي.
خو هغه وويل: ((طالبان باید اول پر خپل ځان شریعت جاري کړي، د دوی کارونه له اسلام سره په ټکر کې دي.))
بل لور ته وسله وال طالبان هم د درو وهلو موضوع تاييدوي.
د دې ډلې وياند ذبيح الله مجاهد پژواک ته وويل چې تېره ورځ طالبانو په قرباغي سيمه کې پنځه تنه د غلا او يو بل کس يې د زنا په تور وهلي دي.
هغه د اندړو په اړه وويل چې هلته هم طالبانو دوه تنه د زنا په تور وهلي خو هلک يې طالب نه وو، بلکې د تره زامن يې طالبان وو چې پخوا وژل شوي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن