محمودراقي (پژواک، ٢٤ سلواغه ٩٥): په کاپيسا ولايت کې د واليبال لوبې پر مهال د شخړې له امله څلور لوبغاړي وژل شوي او يو تن ټپي شوى دى.
دا پېښه پرون مازديګر د ياد ولايت د تګاب ولسوالۍ د ميره خېلو په سيمه کې د واليبال لوبې پر مهال رامنځته شوې ده.
د يادې سيمې يوه اوسېدونکي فردوس د سلواغې په ٢٤مه پژواک خبري اژانس ته وويل چې د واليبال لوبې پر مهال د لوبغاړو تر منځ شخړه رامنځته شوه چې وروسته د يوه تن د پلويانو له خوا ډزې وشوې.
د هغه په وينا، په دې ډزو کې څلور لوبغاړي ووژل شول او يو بل تن ټپي شوى دى.
فردوس وايي: ((هر مازديګر خلک دلته د غرو په لمنو او پراخو سيمو کې د واليبال او کرکت لوبې کوي چې له نورو سيمو څخه هم ځوانان هم ورته راځي، خو پرون چې کومه پېښه وشوه دا د يو کلي او د يوې کورنۍ غړي دي.))
د کاپيسا د امنيې قوماندانۍ وياند محمدايوب يوسفزي د يادې پېښې د پخلي تر څنګ پژواک اژانس ته وويل چې ياده سيمه د وسله والو مخالفينو تر کنټرول لاندې ده.
هغه زياته کړې چې دا پېښه دشخصي بديو له امله رامنځته شوې او بريد کوونکي تر پېښې وروسته تښتيدلي دي .
د نوموړي په وينا، ډېر ژر به امنيتي ځواکونه په يادو سيمو کې عمليات پيل او د وسله والو مخالفينو مخه به ونيسي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن