مزارشريف (پژواک، ۱۰ کب ۹۵): د هېواد په شمال کې د باغونو د ښه خړوبېدو په موخه د باران اوبو ته ٣٣٠ زېرمې جوړې شوې او په ننګرهار کې يو استنادي دېوال جوړ او د دوو نورو چارې پيل شوې
دغه زېرمې د کرنې وزارت د باغدارۍ د ملي پروژې په چوکاټ کې د شمال زون په بېلابېلو ولايتونو کې جوړې شوي او نن ګټې اخيستنې ته وسپارل شوې.
په افغانستان کې د يادې پروژې مسوول محمد عثمان ساپي، د دغو پروژو د پرانيستې پر مهال پژواک خبري اژانس ته وويل چې د دې زېرمو پر جوړېدو ۳،۳ ميليونه امريکايي ډالره لګښت راغلى او د زېرمو په جوړېدو کې د خلکو ونډه ۲۵ سلنه ده.
په شمال زون کې د يادې پروژې مسوول فهيم جباري وايي چې هره زېرمه د ۵۰۰ متره مکعب اوبو د زېرمه کېدو وړتيا لري.
باغداران که څه هم د باغونو د ښه خړوبېدو لپاره په جوړو شويو زېرمو خوښ دي خو د ميوو لپاره د بازار له نشتوالي شکايت کوي.
د بلخ ولايت د مرکز اوسېدونکى محمد عظيم بای وايي تمه لري چې د جوړو شويو زېرمو له لارې به د خلکو باغونه ښه خړوب شي؛ خو دولت بايد د ميوو لپاره د بازار موندنې په برخه کې هم جدي هڅې وکړي.
دغه راز د يو بل خبر له مخې، د ننګرهار په هسکې مېنې ولسوالۍ کې د کليو پراختيا وزارت له لورې يو استنادي دېوال جوړ او د دوو نورو چارې پيل شوې .
د ننګرهار د کليو پراختيا او بيارغونې ادارې مشر انجنير صفت الله شرمل وايي، چې د هسکې مېنې ولسوالۍ په اکا خېلو،ياغي بند او خرکنۍ کليو کې يو استنادي دېوال جوړ او د شپږ سوه پنځوس متره په اوږدوالې د دوو نورو استنادي دېوالونو د جوړولو چارې پيل شوې.
د ده په وينا، د يادو درېيو واړو پروژو ټولو لګښت شاوخوا ١٨ ميليونه افغانۍ کېږي او د کليو پراختيا وزارت له خوا ورکول کېږي.
د هغه د معلوماتو له مخې، د دغه ديوالونو په جوړولو سره به زرګونه جريبه کرنيزې ځمکې د سېلابونو له ګواښونو وژغورل شي.
د يادې سيمې يو تن قومي مشر د يادو پروژو له امله له ولايتي ادارې مننه وکړه او په ياده ولسوالۍ کې د نورو پروژو د پلي کېدو غوښتونکى شو.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن