د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

رحيمي: ولس دې د ښار امنيت ټينګ کړي، امنيتي ځواکونه به سرحدات وساتي

رحيمي: ولس دې د ښار امنيت ټينګ کړي، امنيتي ځواکونه به سرحدات وساتي

Mar 09, 2017 - 17:30

جلال اباد (پژواک، ۱۹ کب ٩٥): د ننګرهار نوى امنيه قوماندان وايي، که ولسونه او مخور د جلال اباد ښار امنيت کې همکاري وکړي، نو امنيتي ځواکونه به د سرحداتو او ولسواليو د امنيت لپاره ګامونه پورته کړي.

لوی پاسوال عبدالرحمن رحيمي چې د کب په ۱۹مه يې په ننګرهار کې د نوي امنيه قوماندان په توګه د دندې د پيل په مراسمو کې خبرې کولې، د امنيت په  ټينګښت کې د ولسونو پر همکارۍ ټينګار وکړ.

هغه زياته کړه، که ولسونه ورسره همکاري ونه کړي، نو دى هم نه غواړي دنده ترسره کړي؛ ځکه د ولسونو له همکارۍ پرته امنيت نه شي ټينګېدلی.

نوموړي ولسونو ته وويل، مبارکۍ دې ورته هغه وخت ورکړي  چې د امنيت د ټينګښت لپاره يې عملي ګام پورته کړ؛ خو ډاډ يې ورکړ چې تر وروستۍ سلګۍ به د ننګرهار امنيت د ټينګښت لپاره کار کوي.

د کورنيو چارو وزارت اداري مرستيال لوى پاسوال اکرام الدين ياور وويل، کورنيو چارو وزارت او ولسمشر محمد اشرف غني د ننګرهار امنيتي وضعيت خرابوالي ته په کتو او د لوی پاسوال عبدالرحمن رحيمي مسلکي والي او تجربې ته په پام، دلته مقرر کړی دی.

هغه زياته کړه، د ولسونو له همکارۍ او د امنيتي ځواکونو د همغږۍ نتيجه وه، چې ننګرهار کې وسله والو مخالفينو ته درانه تلفات اوښتي او ټينګار يې وکړ  چې نوی امنيه قوماندان به هم وتوانيږي چې دغه همکاري او همغږي وساتي.

ياور دا هم وويل، هغه قوماندان چې د کابل غوندې د اوو ميليونه وګړو لرونکي ولايت امنيت ټينګولی شي، په ننګرهار کې به هم بريالی وي او ډاډ يې ورکړ چې دا خبرې به په راتلونکو شپږو مياشتو او يا هم له هغه په کم وخت کې معلومې شي.

د ننګرهار والي محمد ګلاب منګل نوی امنيه قوماندان يو با تجربه او مسلکي افسر ياد کړ او هيله يې څرګنده کړه چې نوموړی به په ننګرهار کې د شته امنيتي ستونزو په حل کې ګټور ګامونه پورته کړي.

والي زياته کړه، راتلونکی فصل به ننګرهار د وسله والو مخالفينو له بريدونو خالي نه وي؛ خو رحيمي به له خپلو تجربو څخه په ګټې اخيستنې د ټولو امنيتي او دفاعي ارګانونه په همغږۍ سره مخالفينو ته سخته ماتې ورکړي.

د ننګرهار د ولايتي شورا منشي ذبيح الله زمري نيوکه وکړه چې په تېرو پنځو مياشتو کې دا دريېم امنيه قوماندان دی  چې بدلېږي او زياتوي، يا خو حکومت د ننګرهار امنيت ته ژمن نه دی او يا هم دلته قوماندانان روزي.

نوموړي نوي امنيه قوماندان ته په خطاب کې وويل، امنيت د جلال اباد ښار په ګډون په ټول ولايت کې د اندېښنې وړ دی او بايد په دغه برخه کې کوټلي ګامونه پورته شي.

دی وايي، د ولسونو له همکارۍ پرته د امنيت ټينګښت ناشونی دی او بايد د ولسونو له همکارۍ ګټه پورته شي.

دغه راز قومي مشر سيد جهان جهاني په جلال اباد ښار کې د تورو ښېښو موټرو او غير قانوني وسله والو شتون اندېښمنوونکی ياد کړ او له نوي امنيه قوماندان څخه يې غوښتنه وکړه چې لکه د کابل په ننګرهار کې هم د دغې چارې مخنيوی وکړي.

نوموړي دغه راز په ولسواليو کې عملياتو ته په اشارې سره وويل، عملياتو کې د سيمو د نيولو پرځای دې نيول شوې سيمې وساتي او بيا دې نورو ولسواليو او سيمو ته عمليات وغځوي.

د يادولو ده چې عبدالرحمن رحيمي له تېرو دوو کلونو راهيسې د کابل د امنيه قوماندان په توګه دنده ترسره کوله او تازه د کورنيو چارو وزارت په وړانديز او د ولسمشر په منظورۍ د ننګرهار د امنيه قوماندان په توګه وګومارل شو.

ورته راپورونه:

نظر ورکړئ

اعلانونه

Advertisement