د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د کندهار د پوهنې رياست دوه رييسان لري

د کندهار د پوهنې رياست دوه رييسان لري

Mar 21, 2017 - 12:43

کندهار (پژواک، د وري لومړۍ ٩٦): په کندهار کې که له یوې خوا د پوهنې بهیر د ناامنیو او ګڼو نورو ستونزو له امله ټکنی دی، خو بل خوا د پوهنې ریاست د ناسالمو سیالیو او رقابتونو ښکار دی.

د پوهنې په بهیر کې د ګڼو نورو ستونزو تر څنګ په دې وروستیو کې یوې بلې ستونزې سر ټوکولی، چې د دغې ادارې لپاره د دوو سرپرستانو موضوع ده.

که څه هم د پوهنې ریاست لپاره محب الله قادري چې مخکې د دې ریاست کارکوونکی و ، د کندهار د والي له خوا د سرپرست په توګه ټاکل شوی، خو په دې وروستیو کې د عبدالله اڅکزي په نوم یو بل کس ادعا کوي چې د پوهنې وزارت له خوا د کندهار د پوهنې د سرپرست په توګه ټاکل شوی دی.

محب الله قادري د روان ۱۳۹۵ کال د وږي په میاشت کې د کندهار د والي له لوري وروسته له هغه د دې ادارې د سرپرست په توګه وټاکل شو چې د پوهنې مخکنی رييس عبدالقادر پيوستون او تدريسي مرستيال محمد عوض نظري د خلکو د هغو شکايتونو پر بنسټ چې ګواکې په دې اداره کې پراخ فساد شتون لري او مسوولين يې لازم خدمات نه شي وړاندې کولاى، له دندو لرې شول.

د کندهار د پوهنې ریاست لپاره د ولایتي ادارې له لوری ټاکل شوي سرپرست محب الله قادري وايي، دی د کندهار والي او په خپله د پوهنې وزارت له خوا د یادې شوې ادارې د سرپرست په توګه ټاکل شوی دی.

نوموړي پژواک اژانس ته وویل، تر هغه چې د دې ادارې لپاره په رسمي توګه رییس ټاکل کېږي، دی د ریاست د سمبالښت چارې په غاړه لري.

ده زیات کړه، په خپله د پوهنې وزیر هم په شفاهي بڼه ورته ویلي چې سرپرست یې، خو رسمي منظوري یې لا نه ده راغلې.

قادري ومنله، چې د عبدالله اڅکزي په نوم بل کس د پوهنې له وزارت څخه د سرپرستۍ مکتوب راوړی خو ولایتي ادارې موافقه نه ده ورسره کړې او معرفي کړی یې نه دی.

ده زياته کړه : ((ولایت مقام له عبدالله اڅکزي سره موافقه نه ده کړې او نه یې هم موږ ته معرفي کړی دی، د پوهنې وزیر ما ته په شفاهي توګه ویلي چې ستا د سرپرستۍ مکتبوب مو جهموري ریاست ته لېږلی چې کله منظور شي، در و به لېږل شي.))

بل خوا د پوهنې ریاست مالي او اداري امر عبدالله اڅکزی ادعا کوي، چې د پوهنې وزارت له خوا ورته د دې ولایت د پوهنې ریاست لپاره د سرپرستۍ مکتوب ورکړل شوی دی.

اڅکزي پژواک اژانس ته وویل، څه موده مخکې مرکز ته د اداري کارونو د هواري لپاره تللی و چې هلته ورته د پوهنې د وزیر له خوا د سرپرستۍ رسمي مکتوب ورکړل شوی او ده له ولایت مقام سره شریک کړی دی.

دی وايي، ولایتي ادارې هم ورسره موافقه کړې ده، خو معرفي کړی یې لا نه دی.

د کندهار د والي ویاند صمیم خپلواک مني، چې د پوهنې وزارت د عبدالله اڅکزي په نوم کس ته د دې ولایت د پوهنې ریاست د سرپرستۍ مکتبوب ورکړی، خو ولایتي ادارې نه دی ورسره منلی.

خپلواک پژواک خبري اژانس ته وویل، اړوند وزارت په داسې حال کې بل کس ته د سرپرستۍ مکتوب ورکړی، چې ولایتي ادارې وار له مخه د اړوند وزارت په موافقه محب الله قادري د دې ریاست د سرپرست په توګه ټاکلی او خپلې چارې مخ ته وړي.

دی وايي، د کندهار والي ډاکټر همایون عزیزي د خپلې هغې ژمنې پر بنسټ چې په دولتي ادارو کې به اصلاحات راولي او د فساد پر ضد به مبارزه کوي د یو شمېر ادارو مسوولین یا څارنوالیو ته ور و پېژندل شول او یا هم پر کور کښېنول شول.

د ده په خبره، په دې لړ کې څو میاشتې وړاندې د پوهنې مخکنی رییس عبدالقادر پیوستون او مخکني تدريسي مرستیال محمد عوض نظري هم له دندې ګوښه شول چې پر ځای یې محب الله قادري د سرپرست په توګه وټاکل شو.

ده زیاته کړه، په دې توګه د پوهنې په ریاست کې تر یوه حده د لاسوهنو مخنیوی وشو خو د لا زیاتو اصلاحاتو لپاره لا هم د دوی هڅې روانې دي.

خو دی وايي، اصلي ستونزه د پوهنې په وزارت کې ده چې وړتیا او اهلیت ته د کتلو پر ځای د اړیکو او شناخت پر بنسټ ګومارنې کوي او ان کله کله داسې کسان هم په دندو ګوماري چې املا او انشا یې هم زده نه وي.

خپلواک د بېلګې په توګه د کندهار د پوهنې ریاست یاد کړ چې د سرپرستۍ لپاره یې د وزارت له خوا ان دوو او دریو کسانو ته هم مکتوبونه ورکړل شوي دي.

ده دغه راز زیاته کړه: ((په وار وار لیدل شوي چې د پوهنې وزارت د کندهار د پوهنې ریاست د ډېرو ټیټو بستونو لپاره هم په یوه وخت درې او څلورو کسانو ته مکتبونه ورکړي وي، په داسې حال کې چې دغه ټولې ګومارنې د وړتیاوو له مخې نه، بلکې د اړیکو پر بنسټ دي.))

دی وايي، ولایتي ادارې تل د دغسې ګومارنو مخالفت کړی، ځکه د پوهنې ریاست د ټولو خلکو ګډ ارزښت دی او ولایتي اداره ژمنه ده چې هیچا ته به په کې د لاسوهنو اجازه نه ورکوي.

خپلواک وویل، دغه ټولې ستونزې د ولایتي ادارې له خوا نېغ په نېغه له ولسمشر سره شریکې شوې او هغه ژمنه کړې چې د کندهار د پوهنې په ریاست کې به ډېر ژر مثبت ژور بدلونونه راولي چې د هېواد په کچه به یوه نمونه و اوسي.

د پوهنې ریاست او د پوهنې د بهیر دغه اوسني وضعیت د کندهار اوسېدونکي هم اندېښمن کړي او له چارواکو د ژورو اصلاحاتو غوښتنه کوي.

د کندهار یوه اوسېدونکي غلام سخي نوریوال پژواک خبري اژانس ته وویل، د پوهنې په ریاست په داسې حال کې د ناسالمو سیالیو ښکار دی چې دغلته په لسګونو ښوونځي بند دي او هغه چې پرانیستي دي تدریسي بهیر په کې معیاري نه دی.

دی زیاتوي، د دې پر ځای چې د پوهنې بهیر معیاري او ښه شي، زورواکي او هغه چې ځان د کندهار د اوسېدونکو اصلي عمخواران ګڼي په دې لګیا دي چې څنګه خپل کسان په دې ریاست کې په دندو وګوماري.

نوموړي له ولسمشر څخه وغوښتل چې لومړی د پوهنې په وزارت کې ژور اصلاحات راولي او بیا د کندهار د پوهنې په ریاست کې سمون راولي چې کلونه کېږي له ناندریو، ناسالمو رقابتونو او فساد ښکار دی.

د يادونې ده چې د کندهار د پوهنې په رياست کې له ډېره وخته د پراخو درغليو او فساد په اړه شکايتونه کېږي.

د دې ولايت د پوهنې په تشکيل کې ټول ٤٥٠ ښوونځي شته چې دا مهال يې يوازې ٣١٨ پرانيستي دي، دغه راز د ٣١٨ ښوونځيو له ډلې يوازې ١٩٢ ښوونځي ودانۍ لري او نور يې هيڅ ودانۍ نه لري چې د پوهنې د بهير پر وړاندې لويه ننګونه ده.

د دې تر څنګ خلک د پوهنې د بهير له کيفيت څخه راضي نه دي، دغه راز په يو شمېر ولسواليو کې ښوونځي تش په نوم دي چې معاشونه يې د ځينو زورواکو شخصي اکاونټونو ته ځي.

ورته راپورونه:

نظر ورکړئ

اعلانونه

Advertisement