د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

غني: له پاکستان سوله نه غواړم، بلکې له پاکستان سره سوله کول غواړم

غني: له پاکستان سوله نه غواړم، بلکې له پاکستان سره سوله کول غواړم

Jul 02, 2017 - 16:43

کابل (پژواک، ١١ چنګاښ ٩٦): ولسمشر اشرف غني، هېواد کې پر ولسي خبرو اترو او د اجماع پر رامنځته کولو د ټينګار ترڅنګ وايي، خلک بايد د سولې ټينګښت لپاره چمتو او يوه ولسي اجماع رامنځته شي.

ولسمشر غني چې نن په ارګ کې د سولې عالي شورا د مشر په توګه د محمد کريم خليلي د پېژندنې په مراسمو کې د خبرو پر مهال وويل، ټول افغانان او نوموړى هيله لري، څو د سولې هيله پر يوه حقيقت او دوامدارې لاسته راوړنې بدله شي.

خو هغه زياته کړه، څو چې په هېواد کې يو پياوړى دولت رامنځته نه شي، نو د دايمي سولې ټينګښت ناشونى دى.

هغه وويل: "ترڅو چې په هېواد کې داسې يو دولت رامنځته نه شي، چې د خپلو خلکو امنيت خوندي کړي؛ د ټولنې ستونزې به موجودې وي، څو داسې يو دولت ونه لرو؛ چې هر افغان د قانون پر وړاندې ځان مساوي وبولي...دايمي سوله به ټينګه نه شي؛ د دا ډول يوه دولت رامنځته کولو سره د خلکو باور زياتيږي."

ولسمشر د خپلو خبرو په ترڅ کې زياته کړه: "نو پر دې بنسټ سوله د تړلو دروازو تر شا نه شي کېدى، په ملي کچه د سولې لړۍ پر مخ وړل د يوې ملي اجماع لامل کېږي او په دې بايد ټول پوه شو، چې د جګړې بيه څومره ده او د سولې ګټې کومې دي."

د هغه په وينا، سوله له يوه کس سره نه کېږي، بلکې سوله له خلکو سره کېږي او دا اړينه ده، چې خلک د سولې لپاره چمتو شي او يوه ولسي اجماع رامنځته شي.

نوموړي زياته کړه، له تېرو ٤٠ کلونو راهيسې افغانستان د جګړې په حال کې دى او اوس جګړه په يوه عادي حالت او عادت بدله شوې، چې پر بنسټ يې يو شمېر کسان ترې شخصي ګټه اخلي او سوله نه غواړي.

ولسمشر وويل: "د جګړې بڼه بدله شوې او موږ اوس د شبکو تر عملياتو لاندې يو، د افغانستان په سپېڅلي جهاد کې مو هيڅ ځانمرګى ونه ليد. يو نيم مليون شهيدان او ټپيان مو ورکړل، خو هيڅ ځانمرګى نه و، موږ هيڅکله هم دا پديده نه ده توليد کړې. دا پديده نړۍ توليد کړې او موږ ته يې صادر کړې او لومړنۍ ځانمرګى بريد هم په سريلانکا کې ترسره شوى او اوس دغه پديده په يوې خبيثې کړۍ بدله شوې ده."

نوموړي د خپلو خبرو په دوام کې زياته کړه: "نن دوى له هغو ٢٠ هېوادونو چې موږ ورسره هيڅ ستونزنه نه لرو؛ راغلي او زموږ په خاوره کې تر ټولو سخت ناورينونه ترسره کوي او دغه راز د نشه يي توکو جګړه ده. جرمي اقتصاد د جګړې يو عمده لامل دى، نو پر دې بنسټ د دې جګړې اړخونه، چې جګړه ولې دوام کوي؛ يوه اساسي تحليل ته اړتيا لري."

ولسمشر غني د دې خبرې په څرګندولو سره چې په افغانستان کې د جګړې دريم عامل سيمه ييز دى؛ زياته کړه: "ما څو ځلې ويلي او اوس هم وايم، چې زه له پاکستان سوله نه غواړم؛ زه له پاکستان سره سوله کول غواړم، له پاکستان سره سوله په دې معنا ده، چې پاکستان په افغانستان کې يو پياوړى او باعزته حکومت ومني، زموږ حکومتولي، د معاملې موضوع نه ده؛ ولې دا زموږ حق دى."

دغه راز ولسمشر، له ګلبدين حکمتيار سره سولې کولو ته په اشارې سره وويل، دا خبرې اترې يوه ښه بېلګه وه، ځکه دا خبرې د اساسي قانون په چوکاټ کې د يوه رڼه اصل له مخې د هېواد په داخل کې ترسره شوې او په دغو خبرو اترو کې د بيان ازادۍ اصل په پام کې نيول شوى و او په بشپړ ډول يو بين الافغاني پروسه او بهرنيو له منځګړيتوب پرته ترسره شوه.

هغه زياته کړه: "د ګلبدين حکمتيار راتلو ثابته کړه، چې کابل زموږ د ټولو اړوند دى او افغانستان زموږ ټولو ګډ کور دى، هيڅ يو ساتونکى يې رانه وست او امنيت يې زموږ امنيتي ځواکونو ټينګ کړ."

غني د خپلو خبرو په بله برخه کې د هېواد له امنيتي او دفاعي ځواکونو مننه وکړه او ويې ويل، کارپوهانو به ويل چې له افغانستان څخه د بهرنيانو په وتلو سره افغان حکومت څلور مياشتې هم دوام ونه کړي، خو افغانان له خپلې خاورې څخه د دفاع په برخه کې پياوړې اراده لري.

نوموړي زياته کړه، چې سولې ته د رسېدو او د يوې دايمې سولې لپاره بايد يو توپير رامنځته شي، د سولې ټينګښت په برخه کې پام په کار دى او افغانستان يوې دوامدارې سولې ته اړتيا لري.

هغه وويل، چې ټول افغانان بايد د خپل هېواد د سوکالۍ او پرمختګ لپاره فکر وکړي او د يوې دايمي سولې د ټينګښت لپاره ځان مسوول وبولي.

ولسمشر محمد اشرف غني، د سولې عالي شورا په توګه د محمد کريم خليلي ګومارنې ته په اشارې سره وويل، خليلي داسې وړتياوې لري چې د سولې ټينګښت لپاره به هلې ځلې وکړي او کلک ګامونه به پورته کړي.

د ويلو ده، چې د سولې عالي شورا د مشر په توګه د کريم خليلي له لوري د کار پيلولو ترڅنګ، د يادې شورا مرستيالانو، د اجراييه شورا غړو او عمومي مجمع غړي هم معرفي شول. 

په دې ناسته کې د سولې د عالي شورا د دارلانشاء رئیس ډاکټر محمد اکرم خپلواک د سولې د عالي شورا د رئیس د تقرر په اړه د جمهور رئیس غني فرمان ولوست.

د دغه فرمان له مخې، استاد محمدکریم خلیلي د سولې عالي شورا د رئیس په توګه، عزیزالله دین محمد، مولوي عطاءالرحمان سلیم، سردار محمدنادر نعیم، مولوي عبدالخبیر اوچقون او ډاکټره حبیبه سرابي د مرستیالانو، مولوي قیام الدین کشاف د ستر غړي، قاضي محمدامین وقاد د شورا د عامه پوهاوي د کمېټې د رئیس، اسدالله وفا غړی او د شورا سلاکار، عطاءالله لودین، عبدالحکیم مجاهد، محمد اسماعیل قاسمیار، صدیقه بلخي، حسینه ساپۍ د شورا د سلاکارانو، مولوي محی‌الدین بلوچ د ولایتي چارو د کمېټې د رئیس، رئیس عبدالواحد باغران، قاضي حبیب الله فوزي او سید عبدلقادر ګیلاني د شورا د غړو او سلاکارانو، ولي نعیمي د شورا د دفتر د رئیس، امین‌الدین مظفري د شورا د منشي، محمد قاسم حلیمي او فرحت عظیمي د اجرائیه غړو په توګه، حاجي نورالله غړی او د شورا سلاکار انجنیر فرهاد الله فرهاد د دارالانشا د مرستیال په توګه وټاکل شول.

همدارنګه د دغه فرمان په اساس، پوهاند نعمت الله شهراني، سید محمود دقیق، محمد نعیم کوچی، مولوي محمد عثمان سالک‌زاده، محمدامین طارق، فضل کریم ایماق، پیرمحمد روحاني، مولوي محمدطاهر جوره، محمد اکبري، مولوي یادګار سیفي، ملا تاج محمد مجاهد، ملا عبدالسلام راکټي، عبدالخالق حسیني پشه‌يي، محمد هاشم پولاد، مولوي شفیع الله نورستاني، حاجي امان الله اتمانزی، موسى خان هوتک، سناتور امان‌الله عظیمي، عبداللطیف مراد، څارنوال علي احمد خان، حاجي امان الله، حسین سنګردوست، جماهیر انوري، ملالۍ شینوارې، شفیقه حبیبي، اصیلا وردګ، وږمه فروغ، شهیلا فرید، پلوشه حسن، ماریا اکرامي، مولوي عبدالغني، ګلالۍ نور ساپۍ، محمد داوود خان شهیدزوی، جمال الدین بدر، عبداللطیف ابراهیمي، مهتاب الدین طارق زارع، مومن ملاخېل او ډاکټر بشیرفاروق د سولې د عالي شورا د مجمعې د غړو په توګه تقرر ترلاسه کړی دی.

ورته راپورونه:

نظر ورکړئ

اعلانونه

Advertisement