د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

په جوزجان کې د مېرمنو د لاسي صنايعو نندارتون جوړ شو

په جوزجان کې د مېرمنو د لاسي صنايعو نندارتون جوړ شو

Jul 20, 2017 - 19:48

شبرغان (پژواک ٢٩ چنګاښ ٩٦): د جوزجان په شبرغان ښار کې د بېوزلو کورنيو د مېرمنو د لاسي صنايعو نندارتون پرانيستل شو.

دغه نندارتون د مدني ټولنې د بنسټونو د ملي مجمعې په نوښت ترسره شو.

هغه مېرمنې چې په دغه نندارتون کې يې ګډون کړى وو، په هغه لس مياشتني روزنيز پروګرام کې يې برخه اخيستې چې د دغه پروګرام د پنځو مياشتو له تېرولو وروسته يې د نقاشۍ، خياطۍ او نورو اړينو وسايلو په چوکاټ کې خپلې لاسته راوړنې په ياد شوي نندارتون کې نندارې ته وړاندې کړې.

د مدني ټولنې د بنسټونو د ملي مجمعې مشر سيد رسول سادات وويل، هغه روزنيز پروګرام چې د بېوزله کورنيو اتيا مېرمنو ته جوړ شوى و، له ډېر وخت راهيسې يې کار دوام درلود او دغه کاري پروګرام د مېرمنو د وړتياوو د لوړولو په موخه جوړ شو چې د سواد زده کړو، نقاشۍ، خطاطۍ او بازار موندنې روزنه په کې شامل ده.

د هغه په وينا، د دغه روزنيز پروګرام د کار په تمامېدو سره، مېرمنې کولاى شي د خياطۍ او نقاشۍ کار له لارې د لاسي صنايعو او د انځورګرۍ د پارچو د برابرولو په برخه کې د سيمه ييز فرهنګ په معرفي کولو کې د پام وړ رول ولري او له مالي پلوه خپلې کورنۍ هم پياوړې کړي.

هغه زياته کړه، نننى پروګرام هم د همدې اصل پر بنسټ برابر شوى، ترڅو د دغو مېرمنو په لاس ګنډلي شيان او نور هنري فعاليتونه نندارې ته وړاندې شي.

دى وايي: "موږ غواړو چې خلک د دغو مېرمنو له کار سره بلد شي او دغه کار د دې زمينه برابره کړي چې هغوى وکړى شي چې د لاسي صنايعو د برابرولو په برخه کې د خپلو فعاليتونو د دوام لپاره ډېر کار وکړي او له دې لارې څخه د ژوند کولو وسيله برابر کړي."

د دغو مېرمنو له ډلې شګوفې اروين وويل: "دغه پروګرام زموږ او نورو مېرمنو لپاره ارزښت لري، ځکه مېرمنې په داسې روزنيزو پروګرامونو کې په ګډون سره د کور له محدودې وځي او عملا په ټولنه کې پل ږدي او د روزنيزو پروګرامونو په ترکيب کې د مېرمنو ګومارل، کولاى شي هغوى پر ځان بساينې خواته بوڅي او دغه کار د دوى د کورنيو د اقتصادي ودې لامل کېداى شي."

هغې وويل، له دې امله چې په شبرغان ښار کې د بېوزله کورنيو د مېرمنو لپاره دا ډول پروګرام جوړېږي، د يوې مېرمنې په توګه يې هرکلى کوم.

د دغه پروګرام بلې برخه والې بنفشې وويل، د دغه پروګرام له لارې، مېرمنې سواد زده کوي او له بلې خوا د لاسي صنايعو برابرولو په برخه کې هم کار کوي؛ دغه کار د هغوى د کورنيو د اقتصادي وړتيا د بېرته ترلاسه کولو لپاره هم ګټور تمامېږي.

هغې زياته کړه، نن مېرمنې غواړي، هغه مسايل نندارې ته وړاندې کړي چې دوى ورته لاسرسى پيدا کړى، ترڅو له دې لارې د بازار موندنې په برخه کې هم کار واخلي او خلک هم د هغوى له لاسي صنايعو سره بلد شي.

خو د مېرمنو د چارو مشرې نجيبې قريشي د دغه روزنيز پروګرام پر چلوونکو په نيوکې سره وويل، غوره وه د پروګرام د برخه والو مېرمنو لپاره روزنيز مسايل ورکړى شوي واى چې د هغوى راتلونکې د ژوند ښه کولو لپاره يې د دوى په درد خوړلي واى. 

هغه زياته کړه: "دلته مېرمنو ته هغه څه ور زده کړاى شوي چې د هغوى له ټولنيز ژوند سره اړه نه لري او له بلې خوا هغه مطالب چې د لاسي صنايعو د برابرولو په اړه هغوى زده کړي دي، د هغوى د کورنيو د اقتصادي ځان بساينې په برخه کې رول نه شي لوبولاى."

مېرمن قريشي وويل، غوره وه چې د بېوزله کورنيو د مېرمنو د ستونزو په  اړه کره مطالعه شوې واى او د هغوى لپاره داسې روزنيز مسايل ورکول شوي واى چې د هغوى د ژوند د ښه کولو لپاره يې اغېزمن رول درلودى.

دغه نندارتون چې نن سهار نهه بجې پيل او تر مازيګر يې دوام وکړ، د شبرغان ښار سلګونه اوسېدونکي يې نندارې ته ورغلي وو.

ورته راپورونه:

نظر ورکړئ

اعلانونه

Advertisement