کابل (پژواک، د وږي لومړۍ نېټه ۹۶): د حج او اوقافو وزارت سعودي ته د حج ترسره کولو لپاره د افغانانو د تګ لړۍ د پاى ته رسېدو خبره کوي او زياتوي چې د دې مراسمو په ترڅ کې تر دې دمه ٧ افغانان مړه شوي دي.
دغه څرګندونې د ياد شوي وزارت اداري مرستيال داعي الحق عابد، نن پژواک خبري اژانس ته وکړې.
ده وويل، سعودي عربستان ته د حج ادا کولو لپاره د افغان حاجیانو د تګ لړۍ چې د زمري میاشتې په ۲مه پیل شوې وه، تېره دوشنبه (د زمري ۳۰مه) پای ته ورسېده.
هغه زياته کړه، سږکال د افغانستان له ۳۴ ولایتونو څخه ۳۰زره حاجیان د حج ادا کولو لپاره سعودي عربستان ته تللي دي.
عابد وايي، د ياد شمېر کسانو د لېږد لپاره اریانا او کام ایر هوايي شرکتونو له څلورو زونونو (کابل، هرات، کندهار او مزارشریف) څخه پروازونه کړي دي.
د نوموړي په وينا، تراوسه پورې د حج په مراسمو کې له تللو افغانانو څخه اووه تنه په طبيعي مرګ مړه شوي او دوو مېرمنو زېږون ترسره کړی دى.
د ده د معلوماتو له مخې، مړه شوي کسان د بلخ، غزني، سرپل، کونړ او تخار ولایتونو اوسېدونکي دي چې یوه مېرمن او شپږ نارینه په کې شامل دي.
دى زياتوي، دوو مېرمنو چې زېږون يې کړی، یوه یې د هرات او بله د ننګرهار اوسېدونکې ده.
د حج او اوقافو وزارت مرستيال وايي، د حاجیانو د بېرته راتګ لړۍ به د لوی اختر په شپږمه (د وږي په ١٥مه) پیل شي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن