د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

تخار کې نا مسوولو وسله والو د حکومت واکمني کمزورې کړې

تخار کې نا مسوولو وسله والو د حکومت واکمني کمزورې کړې

Sep 10, 2017 - 12:11

تخار (پژواک، ١٩ وږی ۹۶): د تخار ولایت اوسېدونکي وايي چې د مرکز تالقانو په ګډون د دغه ولایت په ډېرو ولسوالیو کې نا مسوولو وسله والو ځايي اوسېدونکو ته ستونزې را ولاړې کړې او حکومتي حاکمیت یې کمزوری کړی دی.

د چاه اب ولسوالۍ اوسېدونکي نصیراحمد پژواک خبري اژانس ته وویل چې له تېر یوه کال راهیسې په دې ولسوالۍ کې په لسګونو وسله والې ډلې پیدا شوې چې خلک ځوروي، وژنې کوي او سیمه نا امنه کوي.

د ده په خبره، دغه وسله والې ډلې په خپلو دغه راز کړنو حکومتي واکمني ننګوي او د خلکو تر منځ ثبات له منځه وړي.

نوموړی وايي: ((د نا مسووله وسله والو په ډېرېدو سره حکومتي واکمني کمزورې شوې، ان په ځینو سیمو کې وسله والو ډلو خپلسري حکومتونه جوړ کړي، وژنې کوي، غلاوې کوي، په خپلو کې جګړې کوي، د قتل پرېکړې کوي او که څوک یې پرېکړې ونه مني وژني یې.))

دی وايي چې د نامسووله وسله والو ډلو په ډېرېدو او د دوی تر منځ په جګړو کې په لسګونو کسان وژل شوي دي.

خو هغه په دې برخه کې د چا نوم ياد نه کړ.

په تالقانو کې د مدني ټولنې مشر منیراحمد هدف وايي، د تخار سیمه ییز حکومت د نا مسوولو سله والو د ځپلو هېڅ اراده نه لري.

هدف زیاتوي، نا مسووله وسله وال د نظام، حکومتولۍ، پرمختګ او د قانون د واکمنۍ پر وړاندې تر ټولو لوی خنډ دی، که بې وسلې نه شي نو له کنټروله وځي.

ده وویل: ((موږ ډېر ځله پر حکومت غږ کړی چې له طالبانو هم دغه نا مسوول وسله وال خطرناک دي، ډېری ځايي زورواکي خپل وسله وال کسان لري او غواړي د هغوی په زور په واک کې پاتې شي او د حکومت پر وړاندې یې د فشار د وسیلې په توګه وکاروي، مرکزي حکومت باید په دې اړه جدي تصمیم ونیسي.))

د نوموړي په خبره، تر ټولو جدي ننګونه دا ده چې نا مسوولو وسله والو په خپلو ناقانونه کړنو د دغه ولایت په ځینو ولسوالیو کې د طالب کېدو بهیر ګړندی کړی دی.

دغه راز د دغه ولایت لپاره نوی ګومارل شوی والي فضل الله مجددي دا ستونزه مني او وايي، د دغه ولایت له مشرانو سره پر داسې یوې طرحې کار کوي څو نامسوولو وسله والو مخنیوی وکړي.

مجددي پژواک ته وویل، د دغه ولایت تر ټولو عمده ستونزه د نا مسوولو وسله والو ډېرېدونکی شمېر دی.

هغه زیاته کړه: ((که څه هم په نورو ولایتونو کې وسله وال مخالفین دولت ته ستونزې جوړوي، خو په تخار کې بیا نا مسووله وسله والې ډلې د قانون واکمنۍ له پوښتنې سره مخ کوي، موږ په سلا مشورو بوخت یو چې څنګه دغه نا مسوول وسله وال له دولتي چوکاټه لرې کړو او یا یې هم قانوني کړو.))

د تخار والي وايي، هڅه کوي نا مسوولو وسله والو ته قانوني اډانه برابره کړي او یا یې له صحنې لرې کړي.

اوس مهال امنیتي ځواکونه د دغه ولایت د درقد، ینګي کلا، خواجه بهاءالدین، خواجه غار او اشکمش ولسوالیو په ځینو سیمو کې له طالبان سره په مخامخ جګړه بوخت دي؛ خو د مرکز تالقانو په ګډون د دغه ولایت په ډېرو سیمو او ولسوالیو کې نا مسوول وسله وال د حکومت نا اعلان شوي مخالفین بلل کېږي.

که څه هم تر اوسه کومه څېړنه نه ده شوې چې په دغه ولایت کې څومره وسله والې ډلې شته او د چا له خوا یې ملاتړ کېږي، خو د دغه ولایت اوسېدونکي او حکومت دواړه له نا مسووله وسله والو سر ټکوي.

 

ورته راپورونه:

نظر ورکړئ

اعلانونه

Advertisement