فراه (پژواک، ٩ تله ۹۶): د فراه ولايت يو شمېر ځوانانو د عاشورا په مناسبت د يوه کمپيان په ترڅ کې ١٥٠زره سي سي وينه ورکړه .
دغه کمپاين تېره ورځ د فراه په ملکي روغتون کې پيل شو .
د وينې ورکوونکو په استازيتوب حاجي عزت الله نظري وويل ، يوازې په دې ورځ ماتم کول ددغې ورځې يادون نه دى ، بلکې له نورو اړمنو سره مرسته د دغې ورځې يادون دى.
ده وويل چې د فراه ځوانانو اړمنو ته د وينې د ورکړې له لارې دغه ورځ ونمانځله.
د فراه د عامې روغتيا رييس ډاکټر عبدالجبار شايق وويل، دا يو نيک اقدام دى چې له دغې وينې څخه به د نورو اړمنو ترڅنګ د امنيتي ځواکونو ټپيانو ته ترې هم ګټه واخيستل شي .
ددغه کمپاين يوتن ګډون وال مهمدي پژواک ته وويل، د وينې ورکړه نه يوازې ثواب دى، بلکې له نورو سره خواخوږي، يووالى او له ټپي امنيتي سرتېرو سره مرسته هم ده
د چارواکو په وينا، په دغه کمپاين کې د فراه ٣٠٠ځوانانو ګډون کړى و چې په ترڅ کې يې ١٥٠ زره سي سي وينه راټوله شوه .
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن