هرات (پژواک،٢ ليندۍ ٩٦): د هرات پنخه پوليس چارواکي په دغه ولايت کې پر دوو نجونو د تېزاب شيندلو په پېښه کې د وظيفوي ناغېړۍ له امله له دندو ګوښه شول.
د هرات د امنيې قوماندانۍ وياند عبدالاحد ولي زاده وويل چې کورنيو چارو وزارت ته د ولسمشر د لارښوونې او د هرات ولايت امنيې قوماندانۍ ته د دغه وزارت د سپارښتنې له مخې؛ د هرات د پوليسو د څلورمې امنيتي حوزې امر، مرستيال، له جنايي جرمونو سره د مبارزې امر، د ترهګرۍ ضد امر او د سيمه ييز کنټرول امر له خپلو دندو لرې کړل شول.
نوموړي زياته کړه چې د هرات د پوليسو دغه چارواکي، د ترقي پارک په ګرده سيمه کې پر دوو نجونو د ناپېژاندو کسانو د بريد په پېښه کې د وظيفوي غفلت له امله له خپلو دندو څخه لرې کړى شوي او د دغه ولايت د امنيې قوماندانۍ له لوري يې پر ځاى نور کسان ټاکل شوي او کارونه يې پيل کړي دي.
دا په داسې حال کې ده چې په هرات ښار کې ناپېژاندو کسانو دوه ورځې وړاندې د دوو خويندو پر مخ تېزاب وشيندل.
د هرات د حوزوي روغتون وياند محمد رفيق شېرزي پژواک خبري اژانس ته وويل چې دې دوو خويندو چې غوښتل يې کورس ته ولاړې شي، د هرات ښار د پارک ترقي په ګرده سيمه کې يې د ناپېژاندو کسانو له خوا پر مخونو تېزاب شيندل شوي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن