کابل (پژواک، ٢ ليندۍ ٩٦): د افغانستان د سولې عالي شورا مشر کريم خليلي وايي چې د افغانستان د ستونزې د حل غوره لاره مخامخ او بين الافغاني خبرې اتري دي.
نوموړى دا خبرې تېره ورځ اندونيزيا ته د سولې عالي شورا پلاوي د سفر په څنډه کې هغه علمي ورکشاپ ته کړې چې د یادي شورا له لوري د اندونيزيا له برګاف بنسټ سره د ګډو همکاريو په لړ کې جوړ شوى و.
کريم خليلي د دغه علمي ورکشاف په پاى کې د خپلې وينا په ترڅ کې د افغانستان او اندونيزيا د اړيکو پر
پياوړتيا ټينګار وکړ، د دې تر څنګ يې له برګاف بنسټ نه هم مننه وکړه چې د سولې شورا د شته ظرفيتونو په پياوړي کولو کې مرسته کوي.
دوى زياته کړه چې د افغانستان د ستونزې يوه غوره حل لاره دا ده چې مخامخ او بين الافغاني خبرې وشي.
د سولې عالي شورا مشر همدارنګه خوښي څرګنده کړه چې د افغان سولې موضوع په وروستيو څو ورځو کې يو ځل بيا په نړيواله کچه د بحث موضوع ګرځېدلې ده.
نوموړي د سولې له پروسې نه د اندونيزيا د ولسمشر له ملاتړه مننه وکړه او زياته يې کړه چې له سولې پروسې د فدرال المان او برګاف بنسټ په ګډون نړيوال ملاتړ دې پروسې ته چټکوالى ور بښي.
خليلي زیاته کړه: "په اوسنيو شرايطو کې سوله د افغانستان د ټولو خلکو بنسټيزه اړتيا ده او د افغاني ټولنې په ټولو اقشارو کې د سولې د راتګ لپاره يوه کلي اجماع موجوده ده.))
د سولې شورا د دارالانشاء مشر او د ولسمشر سلاکار اکرم خپلواک هم په دې ناسته کې ګډون درلود.
د يادونې ده، د سولې عالي شورا پلاوي اندونيزيا ته د کريم خليلي په مشرۍ د سفر په ترڅ کې د هغه هېواد له ولسمشر، مرستيال ولسمشر او د عالمانو شورا له مشر سره ځانګړې ناستې کړې دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن