د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د بلخ مدني فعالان: له حکومتي موقفه د حکومت پر وړاندې درېدل، جفا ده

د بلخ مدني فعالان: له حکومتي موقفه د حکومت پر وړاندې درېدل، جفا ده

Dec 21, 2017 - 18:10

مزارشريف (پژواک، ۳۰ ليندۍ ۹۶): د بلخ مدني فعالان وايي، که حکومتي چارواکي له حکومتي موقف څخه د حکومت پر وړاندې درېږي، نو جفا ده.

دوی ټينګار کوي چې حکومتي اصولو ته د درناوي په پار دغه ډول چارواکي بايد وپوښتل شي او قانوني چلند ورسره وشي.

دا په داسې حال کې ده چې دوه ورځې وړاندې د بلخ ځينو ملکي او نظامي لوړپوړو مسوولينو د ارګ پر وړاندې د عطامحمد نور ملاتړ وکړ.

ولسمشر محمد اشرف غني دوه ورځې وړاندې د بلخ ولايت له مقامه د عطامحمد نور استعفا منظور کړه.

نور د ارګ دغه پرېکړه د ځان پر وړاندې ظلم وباله او په هغې مشورتي ناسته چې د ارګ د اعلاميې د خپرېدو په ماښام يې له خپلو پلويانو سره لرله، د نه منلو اعلان وکړ.

په همدې ناسته کې د قومي مشرانو او سياسيونو تر څنګ د بلخ ولايت لوړپوړو امنيتي او ملکي چارواکو هم برخه اخيستې وه چې د ارګ پر وړاندې يې د عطامحمد نور ملاتړ وکړ.

د شمال زون د عامه نظم د عمومي لوا قوماندان جنرال حسيب الله قريشي د عطامحمد نور او د هغه د لسګونو پلويانو پر وړاندې وويل، له خپلې جنرالۍ، موټر او مقام څخه د عطامحمد نور لپاره تېر دی.

نوموړي په احساساتو د عطامحمد نور په ننګه وويل: ((دا خو لا څه کړې، هر څوک چې په هر ځای کې ستا پر وړاندې درېږي، لومړۍ کس چې به يې مقابل کې درېږي، هغه به فقير بنده وي او زه له خپلې وينې تېر يم.))

نوموړي والي ته مخ واړاوه او ويې ويل: ((بښنه غواړم چې د خپل رهبر پر وړاندې ولاړ يم او لږ احساساتي شوم، خو داسې نر نه ګورم چې دغه ولايت کې ستاسو له هدايت څخه پرته کار وکړای شي.))

همداراز د بلخ امنيه قومانداني د امنيت امر سمونوال عبدالرزاق قادري د بلخ د پوليسو په استازيتوب د هر ډول چمتووالي غږ وکړ.

نوموړي زياته کړه: ((دا يونيفورم، د جنرالۍ رتبه او خپل ټول موقف او څوکۍ له خپل محبوب رهبر څخه ځاروم.))

هغه ګيله وکړه، دوی تمه لرله، جمهوري رياست به د بلخ د والي په توګه عطامحمد نور ته د کړو خدمتونو شاباسی ورکوي.

خو ټينګار يې وکړ: ((خو دا چې دا شاباسی د منفکۍ په توګه دی؛ نو تر هر هغو دې په ننګه ولاړ يو، چې په بدن کې مو يو قطره وينه وي.))

په دې غونډه کې د نظامي چارواکو تر څنګ ملکي چارواکو هم د عطامحمد نور ملاتړ ته را ودانګل.

د بلخ ولايت مقام مرستيال والي محمد بشير توحيدي هم د عطامحمد نور په ملاتړ غږ پورته کړ او ويې ويل: ((زه محمد بشير توحيدي د بلخ ولايت مقام مرستيال خپلې څوکۍ ته بند نه يم او له خپلو خلکو سره ستاسو تر څنګ ولاړ يم.))

نوموړي زياته کړه، په هېڅ وجه به د عطامحمد نور له ملاتړه پر شا نه شي.

هغه د عطامحمد نور پر وړاندې په ډاګه وويل: ((موږ تا خپل وياړ ګڼو، جهادي دې ګڼو، خپل مجاهد دې ګڼو، خپل مشر دې ګڼو، خپل رهبر دې ګڼو، خپل محور دې ګڼو.))

توحيدي وويل، هېڅ وېره نه لري او مرکزي دولت ته يې ګواښ وکړ چې د خلکو مشروع غوښتنو ته دې لبيک ووايي، که نه بحران به له همدغه ځايه پیل وي.

د خلکو استازو هم د ارګ پر وړاندې د عطامحمد نور ننګه وکړه.

د بلخ ولايتي شورا رييس ډاکتر محمد افضل حديد وويل، د ولايتي شورا د ډېری غړو په خوښه او غوښتنه د عطامحمد نور ملاتړ کوي او تر شا يې ولاړ دي.

نوموړي، بلخ باچا جوړوونکې سيمه وګڼله او زياته يې کړه، له ډېره وخته وروسته بلخ ته خدای د عطامحمد نور په څېره کې يو ښه زوی ورکړی دی.

هغه د بلخ له خلکو غوښتنه وکړه چې په روانو حالاتو کې د بلخ والي يواځې پرې نه ږدي او ملاتړ يې وکړي.

حديد د چا نوم وانه خيست، خو ويې ويل، پوهېږي چې چا د بلخ له خلکو سره ناځواني کړې ده چې دغسې ورځې ګوري، خو ټينګار يې وکړ چې دا هر څه به تاريخ ته پرېږدي.

خو مدني فعالان وايي، حکومتي چارواکي بايد د ښې حکومتولۍ لپاره د حکومت د اصولو خلاف ګام پورته نه کړي.

مدني فعال نجيب پيکان، که څه هم د ارګ او عطامحمد نور پر وړاندې مخالفت د افغانستان د دښمنانو په ګټه وباله، خو ټينګار يې وکړ چې که چېرې دغو چارواکو له حکومتي موقف څخه د حکومت پر وړاندې غږ پورته کړی وي، نو جفا ده.

نوموړي زياته کړه، که څه هم هر وګړی د قانون په رڼا کې خپل نظر څرګندولی شي، خو حکومتي چارواکي که د حکومت پر وړاندې درېږي، نو اصول تر پښو لاندې کوي.

ځيني مدني فعالان په دې اند دي چې لا هم حکومتي ادارې د حکومت اصولو ته له ژمنو خلکو نه، بلکې د سمت، ګوند او ژبې پر بنسټ کار کوونکو چارواکو څخه ډکې دي.

مدني فعال غلام علي پژواک ته وويل، د بلخ حکومتي چارواکو بايد د ارګ پر وړاندې دريځ نه وای نيولی.

نوموړي زياته کړه، ممکن دغه چارواکي له عطامحمد نور سره سياسي تړاو ولري، خو د حکومت اصول دا اجازه نه ورکوي چې د حکومتي چارواکو په توګه د ارګ پر وړاندې ودرېږي.

د هغه په وينا، ډېری دولتي ادارې له داسې چارواکو ډکې دي چې د حکومت اصولو ته نه، بلکې خپلو سياسي کړيو او سمت ته ژمن دي.

ده وويل، حکومت بايد ورته چارواکو سره د قانون په رڼا کې چلند وکړي.

خو د عطامحمد نور ملاتړ کوونکو امنيتي چارواکو پژواک ته وويل، دوی د حکومت پر وړاندې درېدلي نه دي، بلکې د انډيوالۍ له مخې يې د يوه ملګري ننګه کړې ده.

د بلخ د امنيې قوماندانۍ د امنيت امر سمونوال عبدالرزاق قادري څخه پژواک د عطامحمد نور او ارګ تر منځ د نور د ملاتړ په تړاو وپوښتل، نو ويې ويل: ((ما د ولسمشر او يا هم ارګ په خلاف دريځ نه دی خپل کړی.))

نوموړي زياته کړه، په هغه شپه دوی له موضوع پوره خبر نه وو او ده مسووليت درلود چې د والي د امر ومني.

خو نوموړي زياته کړه، عطامحمد نور يې شخصي ملګری دی او د همدې ملګرتيا په پاس يې وويل چې ملاتړ يې کوي او که وينه يې هم ورپه کار شي، نو ترې نه يې سپموي.

د هغه په خبره، پوليس او له حکومتي قوانينو خبر دی، هېڅکله به د چا په خاطر د خپل حکومت پر خلاف ونه درېږي.

خو د بلخ ولايتي شورا رييس ډاکتر محمد افضل حديد چې د والي په ملاتړ يې څرګندونې کړې وې؛ پژواک ته له خپل ملاتړه ننګه وکړه.

نوموړي زياته کړه، دی د بلخ د خلکو د استازي په توګه غږېدلی او د بلخ اوسېدونکي د ارګ پر دې فيصله خپه دي.

هغه په حقوقي لحاظ د عطامحمد نور پر وړاندې د ارګ فيصله ناسمه او د قانون خلاف وګڼله.

حديد وويل، د يوه مامور استعفا بايد له درېیو ورځو تر درېیو مياشتو موده کې لاسليک کړای شي، خو د عطامحمد نور استعفا يو کال وروسته د ولسمشر له خوا لاسليک کړای شوې ده.

نوموړي زياته کړه، له دې ډېره موده کې به يې لاسليکول حقوقي ارزښت له لاسه ورکوي.

وروسته له هغې چې ولسمشر له بلخ ولايت مقام څخه د عطامحمد نور پر استعفا لاسليک وکړ، نو د هېواد په کچه د عطامحمد نور د پلويانو او د جمعيت ګوند د غړو يو لړ غبرګونونه راپورته شول.

خو پر وړاندې يې ډېر خلکو د ولسمشر د کړنې ملاتړ او ستاينه هم وکړه.

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan