مزارشريف (پژواک، ۲۸ سلواغه۹۶): د بلخ ولايت يو شمېر اوسېدونکي، مدني فعالان او د ولايتي شورا غړي وايي چې د تذکرو د وېش پروسه بايد د سياسي مصلحت ښکار نه شي.
له تېرې ورځې راهيسې د تذکرې د وېش په موخه کابل کې د بايوميټريک او د تذکرو د نومرو د ثبت لړۍ پيل شوې ده چې تر دې دمه ولسمشر او لومړۍ مېرمن په ګډون ډېرو دولتي مقاماتو او سياسي شخصيتونو په دغه لړۍ کې ځانونه ثبت کړي دي.
د بلخ اوسېدونکي له دغې پروسې څخه د ملاتړ ښودلو تر څنګ زياتوي، چې تذکرې به د ټاکنو پروسې د درغليو په مخنيوي کې اغېزناکې تمامې شي.
خو د دغه ښار ځينې اوسېدونکي بيا د تذکرو د وېش د پيلېدو پروسې د ملاتړ تر څنګ په دغه چاره کې له سياسي ګوندونو سره مشوره هم اړينه بولي.
د بلخ ولايتي شورا وکيل ذبيح الله کاکړ د تذکرو د وېش پروسه د قانون پلی کېدل وښودل او له روانې پروسې څخه يې ملاتړ وکړ.
نوموړي پژواک خبري اژانس سره په خبرو کې د تذکرو وېش د افغانستان ملي اړتيا وګڼله او غوښتنه يې وکړه چې بايد له هېڅ ډول خنډ سره مخ نه شي.
د هغه په وينا، د تذکرو وېش قانون ته ارزښت ورکول دي او له دې لارې به په دولتي ادارو کې د افغانانو د چارو ستونزې حل شي.
کاکړ وويل،د تذکرو وېش به رڼو ټاکنو ته لاره هواره کړي او د درغليو په مخنيوي کې به اغېز ولري.
د بلخ ولايتي شورا وکيلې رحيمه ترکې بيا ټينګار وکړ چې د تذکرو د وېش لړۍ دې يوازې تر کابله نه لنډېږي بلکې ډېر ژر دې په ولايتونو کې هم پيل شي.
نوموړې پژواک سره په خبرو کې وويل، د تذکرو اوسنۍ بڼه د کيفيت له پلوه خورا ستونزې لري او عام خلک د نويو تذکرو په ارزښت پوه شوي دي.
هغې له ولسمشر څخه جدي غوښتنه وکړه چې د تذکرو د پيل چارې دې ګړندۍ کړي.
مدني فعال ميرويس بيا وويل، ولسمشر بايد د قانون د پلي کېدو پر وړاندې د سياسي مصلحت ښکار نه شي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن