تالقان (پژواک ١٨ کب ٩٦): د تخار چارواکي وايي، په خواجه غار ولسوالۍ کې د طالبانو په بريدونو کې ١٧ امنيتي ځواکونه وژل شوي او ١٣ نور ټپيان دي.
د دې ولايت د امنيه قومندانۍ وياند سمونيار عبدالخليل اسير، پژواک خبري اژانس ته وويل چې تېره شپه کابو اته بجې وسله والو طالبانو د خواجه غار د پل مومن سيمې د ملي اردو پر يوې پوستې بريدونه کړي چې د سرتېرو له مقاومت سره مخامخ شوي دي.
ده زياته کړه، همدا مهال له ګورتيپې څخه سيمه ييز پوليس د يادو سرتېرو ملاتړ ته را روان وو، چې د پل مومن او ګورتيپې په منځ کې د طالبانو له کمين سره مخامخ شوي او ترمنځ نښته شوې، چې له امله يې ١٠ سيمه ييز پوليس وژل شوي او ٩ نور ژوبل دي.
خو د خواجه غار ولسوال محمد عمر، پژواک اژانس ته وويل چې په دې نښتو کې د ملي اردو ٧ سرتېري هم وژل شوي او ٤ نور ټپيان دي.
د هغه په وينا، دې نښتو د شپې تر ٣ بجو دوام وکړ چې په ترڅ کې يې د ګورتيپې او پل مومن سيمې طالبانو ونيولې، خو وروسته يې يادې دواړو منطقې بېرته پرېښودې.
ده زياته کړه، په وژل شويو کسانو کې د سيمه ييزو پوليسو دوه قومندانان هم شامل دي.
د امنيه قومندانۍ د وياند د معلوماتو پر اساس، طالبان د کندوز له دشت ارچي ولسوالۍ څخه دې سيمې ته د بريدونو لپاره راغلي وو.
د وسله والو طالبانو وياند ذبيح الله مجاهد ويلي، په خواجه غار ولسوالۍ کې يې تېره شپه ١٢ پوستې نيولي او ٢٩ عسکر او اربکيان يې ووژل او ٨ نور يې ژوبل کړي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن