د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د هلمند په دوو ولسوالیو کې د دوو بندونو د سروې او ډیزاین چارې پیل شوې

د هلمند په دوو ولسوالیو کې د دوو بندونو د سروې او ډیزاین چارې پیل شوې

Apr 17, 2018 - 12:00

لښکرګاه (پژواک، ٢٨ وری ۹۷): د اوبو او برېښنا وزير وايي چې د هلمند په دوو نا امنو ولسواليو موسى کلا او نوزاد کې د برېښنا د دوو لويو بندونو د سروې او ډيزاين چارې پيل شوې دي.

دغه څرګندونې د اوبو او برېښنا وزير علي احمد عثماني د وري په ٢٧مه هلمند ولايت ته د يو رسمي سفر په ترڅ کې خبريالانو ته وکړې.

عثماني وويل چې د هېواد په بېلابېلو سيمو کې د برېښنا بندونو د سروې او ډيزاين چارې پيل شوې دي.

هغه وايي: ((په دغو بندونو کې د هلمند د موسى کلا او نوزاد بندونه هم شامل دي چې سروې او ډيزاين يې پيل شوى دى.))

دا په داسې حال کې ده چې له تېرو څو کلونو راهيسې د موسى کلا او نوزاد ولسواليو کنټرول له وسله والو طالبانو سره دى.

عثماني وايي چې د يادو دوو بندونو په جوړېدو سره به په دې سيمه کې د برېښنا او د کرنيزو اوبو ستونزه تر ډېره هواره شي.

نوموړي دا هم وويل چې د هلمند د کجکي برېښنا بند د څلورو توربينونو د نصب تړون هم لاسليک شوى دى.

وزير زياته کړه چې د هلمند د نهر سراج کانال د جوړېدو تخنيکي چارې يې په وزارت کې تر کار لاندې دي.

دغه راز په دې غونډه کې د هلمند والي حيات الله حيات وويل چې د موسى کلا او نوزاد د بندونو سروې او ډيزاين د ولسمشر د حکم له مخې ترسره شوي دي.

نوموړى وايي چې د دغو بندونو په جوړېدو سره به د هغو اوبو مخه هم ونيول شي چې دا مهال ايران ته بهېږي.

والي وايي چې د يادو او نورو پروژو د امنيت د ټينګښت په برخه کې خلکو له دوى سره ژمنې کړې دي.

دغه راز د هلمند ولايتي شورا رييس عطاالله افغان وويل چې د اوبو او برېښنا وزارت بايد د اوبو د ذخيره  کولو لپاره واړه بندونه هم جوړ کړي.

هغه زياته کړه: ((موږ او خلک کوښښ کوو چې هېڅوک د دې پروژو پر وړاندې خنډ جوړ نه کړي.))

د يادونې ده، هلمند د افغانستان تر ټولو نا امن ولايت دى چې دا مهال يې د شپږو ولسواليو بشپړ کنټرول له وسله والو طالبانو سره دى.

ورته راپورونه:

نظر ورکړئ

اعلانونه

Advertisement