تالقان (پژواک، ٣١ غويى ٩٧): د تخار په خواجه بهاءالدين ولسوالۍ کې د ملي اردو ځواکونو پر لاريون کوونکو ډزې کړې چې له امله يې څلور کسان ټپيان شوي دي.
د خواجه بهاءالدين لسګونو اوسېدونکو نن د دې ولسوالۍ په شورتوغې سيمه کې له دې امله لاريون کړى و چې د سېلابونو له امله دوى ته د اوښتو زيانونو بدل حکومت نه دى ورکړى.
یادو لاريون کوونکو د خواجه بهاءالدين، ينګي کلا او درقد ولسواليو لويې لارې هم له مرکز تالقانو سره تړلې دي.
د لاريون کوونکو له ډلې اسدالله مومند پژواک خبري اژانس ته وويل: ((د سېلابونو له امله د خلکو کورونه وران شوي، فصلونه يې خراب شوي، موږ لاريون کړى چې حکومت دې موږ سره مرسته وکړي.))
ده زياته کړه، د لاريون له پيله يو ساعت وروسته د ملي اردو ځواکونو پر دوى ډزې کړې چې له امله يې پنځه تنه ټپيان شوي دي.
دغه راز بل لاريون کوونکي نجم الدين پژواک ته وويل: ((ملي اردو پر موږ ډزې کړې، زموږ کسان ټپيان شوي، څو چې د ملي اردو دغو سرتېرو ته سزا ورنه کړل شي، موږ دغه لاره نه خلاصوو.))
يو شمېر نورو لاريون کوونکو هم ورته څرګندونې وکړې او د خپلو غوښتنو پر عملي کېدو يې ټينګار وکړ.
بل لور ته د تخار چارواکي هم دغه پېښه تاييدوي.
د تخار د والي وياند سنت الله تيمور پژواک ته وويل چې د ملي اردو ځواکونو پر لاريون کوونکو ډزې کړې دي.
ده زياته کړه: ((د ملي اردو ځواکونو کتار له دې سيمې تېرېده چې لاريون کوونکو يې مخه بنده کړې وه، نو هغوى پرې ډزې کړې دي.))
د ده په وينا، په دې پېښه کې څلور لاريون کوونکي ټپيان شوي چې ولايتي روغتون ته انتقال شوي دي.
دى زياتوي، د يادې موضوع د څېړلو په خاطر يو پلاوى سيمې ته استول شوى دى.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن