فيض اباد(پژواک،۳غبرګولی۹۷): د بدخشان ځايي چارواکي وايي چې ددغه ولايت په درېيو سرحدي ولسواليو کې د څلورو مخابراتي پايو په لګولو سره شاوخوا ۴۰زره کسان له مخابراتي خدمتونو څخه برخمن شوي دي.
د بدخشان د مخابراتو او معلوماتوي ټکنالوجۍ رييس غلام رباني حيدر پژواک خبري اژانس ته وويل، ياد انتنونه چې د سلام مخابراتي شبکې اړوند دي، په نسي، خواهان او مايمي ولسواليو کې لګول شوي چې لګښت يې د مخابراتو وزارت له پراختيايي بوديجې څخه ورکړل شوی دی.
د نوموړي په وينا، دغه انتنونه چې په يادو سيمو کې د روان کال په اوږدو کې لګول شوي، موخه يې مخابراتي او انټرنټي خدمتونو ته د خلکو لاس رسی دی.
نوموړي وويل چې کېداى شي تر اوسه به خلک د تاجکستان له مخابراتي خدمتونو څخه کار اخلي، خو د ياد شوو انتنونو په لګولو سره د سلام مخابراتي شبکې څخه د خلکو د استفادې کچه لوړه شوې ده.
حيدري وويل:" د تاجکستان مخابراتي فريکونسي افغانستان ته راځي او موږ دغه موضوع د اترا ادارې له خوا تعقيبوو."
د نسی درواز ولسوال محمد اسماعيل قيومي پژواک خبري اژانس ته وويل چې د ولسوالۍ په مرکز او اوبغن کلي کې د سلام مخابراتي شبکې د دوو انتنونو په لګولو سره د يادې ولسوالۍ په څلورو کليو کې شاوخوا لس زره کسانو مخابراتي خدمتونو ته لاس رسی پيدا کړی دی.
خو د هغه په خبره،نسي ولسوالي چې شاوخوا ۴۰زره اوسېدونکي لري، لا يې هم ۱۲کلي له مخابراتي خدمتونو څخه بې برخې دي او د تاجکستان هېواد له سيمکارتونو څخه استفاده کوي.
د خواهان ولسوالۍ يوه اوسېدونکي جلال الدين خواهانپور وويل، که څه هم چې د سلام مخابراتي انتنونو په لګولو سره د يادې ولسوالۍ ډېر شمېر کلي د سلام مخابراتي خدمتونو څخه کار اخلي، خو د يادو سيمو خلک د تاجکستان سيمکارتونه کاروي.
نوموړي د تاجکستان سيمکارټونو کارولو دليل، د مخابراتي خدمتونو ټيټه بيه وبلله.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن