د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د مشرانو جرګې ځينې غړي : له پاکستان سره ناستې بې ګټې او د وخت ضايع کول دي "

د مشرانو جرګې ځينې غړي : له پاکستان سره ناستې بې ګټې او د وخت ضايع کول دي "

May 29, 2018 - 18:15

کابل(پژواک،۸غبرګولی۹۷): د مشرانو جرګې ځينې غړي د سولې په اړه د افغان او پاکستاني پلاوو ترمنځ د خبرو په اړه  هيله من دي، خو ځينې نور بيا په دې اړه منفي نظر لري او يادې خبرې بې ګټې بولي.

دوه ورځې مخکې د ملي امنيت عمومي رييس معصوم ستانکزي، د کورنيو چارو وزير ويس احمد برمک او د ولسمشر ستر سلاکار همايون قيومي په ګډون د ملي امنيت سلاکار محمد حنيف اتمر په مشرۍ يو لوړ پوړي افغان پلاوي د افغانستان د سولې پروسې د پرمخ بېولو په اړه د خبرو اترو په موخه د پاکستان د لومړي وزير په بلنه دغه هېواد ته سفر کړی و.

د راپورونو له مخې، د افغان پلاوي او پاکستاني چارواکو ترمنځ د سولې پروسې پرمخ بيولو، مشخصو امنيتي اقداماتو او پر دغه بهير د څارنې لپاره د کاري کمېټو جوړولو په اړه موافقې شوې دي.

د مشرانو جرګې ځينې غړي دغه خبرې بې پايلې ګڼي.

د مشرانو جرګې غړي نادر بلوڅ وويل چې په داسې شرايطو کې د افغانستان د امنيتي سکتور او ملي امنيت مشران پاکستان ته سفر کوي چې افغانستان د ګرمې جګړې تر سياسي او سړو تبليغاتي تر فشار لاندې دی.

نوموړي زياته کړه:" دا سفر د ملي يووالي حکومت د کمزورتيا ښودنه کوي چې د پنجابيانو پروړاندې په ګونډو شول او هغوی ته يې د تسليمېدو دورې جدول ور وړ او درېغه چې د ملي يووالي حکومت مشران له دغه اړ دوړ څخه يې لاس اخيستی وای او دخلکو پروړاندې يې ګونډې وهلې وای او د ستونزې حل لار يې لټولې وای."

هغه په ټينګار سره وويل:" پنجابيان د تاريخ په اوږدو کې د افغانستان د خلکو دښمن پاتې شوي او تر څو چې ددوی غوښتنې ونه منل شي،هېڅکله په دې لټه کې نه دي چې په افغانستان کې دې سوله او امنيت خوندي شي."

د مشرانو جرګې بل غړي مولوي محی الدين منصف وويل چې له پاکستان سره ناستې بې پايلې او د وخت ضايع کېدل دي، ځکه پاکستان په دې لټه کې دی چې څه ډول" په افغانستان کې خپل اجنټان" سمبال کړي.

د هغه په خبره، پاکستان په دې کار سره افغان چارواکي بوخت ساتي.

هغه زياته کړه:"هيله ده چې په دې برخه کې له ډېر دقت څخه کار واخيستل شي، له پاکستان سره د خبرو دروازه وتړي او هر تصميم د ملګرو ملتونو سازمان لارې ونيول شي."

د ملي شورا بلې غړې ګلالۍ اکبري وويل:" درېغه هغه کنفرانسونه چې د سولې په اړه جوړېږي، رښتيني، زړه سواندي او د عملي کېدو لپاره يې ژمنتيا موجوده وي او ښه پايله ولري، خو پاکستان په دې کار سره موږ مصروفوي او زموږ مهمې څېرې وژني. "

خو د مشرانو جرګې ځينې غړي پاکستان ته د افغان پلاوي د سفر په اړه هيله من دي.

د مشرانو جرګې غړې فوزيې سادات څمکنۍ وويل چې افغانستان د سولې تږی دی او پاکستان ته د هېواد د امنيتي سکتور د لوړ پوړي پلاوي سفر په اړه بايد ګيلې ونه لرو.

د مشرانو جرګې دويم مرستيال محمد اصف صديقي هيله څرګنده کړه چې له پاکستان سره د افغان پلاوي ناستې به ښې پايلې ولري او د ناستو جزييات دې د رسنيو له لارې د افغانستان له خلکو سره شريک شي څو خلک ډاډه شي چې پاکستان په افغانستان کې د سولې د تامين اراده لري.

په پای کې د مشرانو جرګې لومړي مرستيال محمد علم ايزديار د مشرانو جرګې د غړو له خبرو په نتيجه ګيرۍ سره وويل:" له بده مرغه چې  موږ په تېرو وختونو کې له پاکستان سره د خبرو اترو او پلاوو د تګ راتګ څخه ښې تجربې نه لرو او دا ځل زموږ اخيستنه داده چې پاکستان وخت ضايع کوي. "

نوموړي زياته کړه چې پاکستان په دا ډول ناستو سره افغان حکومت غولوي او هغه کسان چې د پاکستان پر مداخلو اعتراف کوي، هغوی هم مصروف ساتي.

د هغه په وينا، د افغانستان مرکچي پلاوی بايد د موضوع حساسيت، د پاکستان له خوا د وخت ضايع کېدو، دوکې او غولولو ته په جدي توګه متوجه واوسي څو لاسته راوړنې ولري.

ورته راپورونه:

نظر ورکړئ

اعلانونه

Advertisement