ودان افغانستان ګوند، په ډېرې اندېښنې، داسې ګونګوسي واورېدل، چې ګواکې د افغانستان د ټولو خلکو د هیلو، غوښتنو او ارادې پر خلاف، د اختر په بختورو ورځو کې ټینګ شوی اوربند ـ خدای مکړه ـ مات او د یوه لوري له خوا به جګړه بیا پیل شي. ګوند د خپلې ژورې اندېښنې په څرګندولو سره، دغه موارد څرګندوي:
۱- د هر راز جګړې بیا پیل، د ټول ملت په وړاندې د جنګ اعلان دی، ځکه سوله او اوربند د خلکو لپاره وو او خلک یې اصلي مالکان دي.
۲- د ولس شعوري چلند او خوځنده هرکلی دا ښيي، چې په ټول معاصر تاریخ کې، د ویښتیا او شعوري ارادې کارولو ژوندۍ تومنه په خلکو کې رامنځته شوې ده، چې که خدای مکړه جګړه بېرته پیل شي، نو خلک به د همدې ګډ شعور په ځواک پخپله اقدام وکړي.
۳- له ټولو روښانفکرو شخصیتونو، سوله خوښیو دیني علماوو، ګوندونو، مدني او فرهنګي بنسټونو او اغېزناکو حکمي ـ حقوقي شخصیتونو څخه غواړو، چې د هر هغه لوري په وړاندې د ملي پاڅون کرښې جوړې، منظمې او رهبري کړي، چې تر اوربند وروسته، د خلکو په وړاندې، د جګړې پیلولو اقدام وکړي.
۴ـ پر ټول ملت غږ کوو، چې دا سوله ستاسو حق، ملکیت او امتیاز دی، که هر لوري یې د بیا لوټلو او اخیستلو هڅه وکړه، په وړاندې یې ټول مقاومت وکړئ! او د میلیوني خوځښتونو په مدني او ناتاوتریخجنو غبرګونو یې د ضایع کېدو مخه ونیسئ! ګوند باور لري، چې ولس باید خپله سوله پخپله وساتي، ځکه هېڅ پردی به، د خپلو ګټو لپاره، دوی ته سوله ډالۍ نه کړي. ودان افغانستان ګوند به خپله ټوله فکري ـ شعوري هڅه وکړي، چې د اوربند او سولې په ساتنه کې، په ټول ځواک، د خپلو خلکو تر څنګ ودریږي.
د سولې د سپینې سبا د تلځلاندې رڼا ساتونکی؛ ودان افغانستان ګوند
مرکزي کومېټه
کابل- افغانستان
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن