میمنه(پژواک، ۳۱ غبرګولی ۹۷): د فاریاب ځايي چارواکي وايي، یاد ولایت د خواجه سبزپوش ولسوالۍ د خواجه قشري په دوه لاري سیمه کې د ملي اردو او سیمه ییزو پولیسو پر پوستو د طالبانو په یوه برید کې د ملي اردو اووه پولیس وژل شوي دي.
د فاریاب ولایت د خواجه سبز پوش ولسوال عبدالله معصومي پژواک خبري اژانس ته وویل، د ملي اردو اووه سرتېري هغه مهال وژل شوي کله چې تېره شپه وسله والو طالبانو د یادې ولسوالۍ د خواجه قشري په دوه لاري سیمه کې د ملي اردو او سیمه ییزو پولیسو په یوه مرکز او درېیو امنيتي پوستو برید وکړ.
نوموړي زیاته کړه، په یاد برید کې د مرکز او پوستو له سقوط وروسته یو ټانګ له ۹ ميله وسلې او یو شمېر مهماتو سره یو ځای د طالبانو لاس ته ورغلی او یو ټانک له ډي سي توپ سره سوځول شوی دی، د ملي اردو د نورو سرتېرو په تړاو تر دې دمه معلومات نشته.
د هغه په خبره،د جګړې په سیمه کې د استوګنې څو کورونه او یو مکتب سوځول شوي دي، دمیمنې ښار او څو ولسوالیو د برېښنا مزي هم پرې شوي دي.
د فاریاب د ولایتي شورا رییس محمد طاهر رحماني د حکومت له لوري یو طرفه اوربند بې ګټې بولي او زیاتوي چې دا ډول اوربند د طالبانو ځواکمن کېدو او د امنيتي سرتېرو کمزورۍ ته لار هواروي.
له بل لوري بیا په خواجه سبز پوش ولسوالۍ کې د وسله والو طالبانو نظامي مسوول عبدالوکیل وايي، په دغه بريد کې یې ۱۲ دولتي سرتېري وژلي چې جسدونه یې د جګړې پر سیمه کې پاتې دي او یو شمېر وسلې او مهمات د دوی لاس ته ورغلي دي.
نوموړي د دې په څرګندولو چې په یاد برید کې یواځې درې طالبان ټپیان شوي وویل چې د خواجه سبز پوش ولسوالۍ اړوند د نسوان مکتب د طالبانو له لوري نه، بلکې د دولتي ځواکونو په واسطه سوځول شوی دی.
د خواجه قشري دوه لاري سیمه د میمنې ښار او خواجه شبزپوش ولسوالۍ پر لویه لاره پرته ده او دواړو لورو ته سلګونه مسافر د لارې خلاصېدو ته انتظار باسي.
په همدې حال کې ځينې سرچينې د یاد ولایت په پښتونکوټ او قیصار ولسوالیو کې د اوو امنيتي سرتېرو د وژل کېدو او ټپي کېدو خبر هم ورکوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن