خوست ښار (پژواک، ۱۷ چنګاښ ۹۷): د خوست په باک ولسوالۍ کې د افغان امنيتي ځواکونو په عملياتو کې د يوې کورنۍ پنځه غړي وژل شوي دي.
د خوست د والي وياند طالب منګل د چنګاښ په ١٧مه پژواک اژانس ته وويل چې دغه عمليات تېره شپه افغان ځانګړو ځواکونو د باک ولسوالۍ د پهلوان خېلو په سيمه کې پر يوه کور افغان ترسره کړي دي.
نوموړي زياته کړه چې په دې پېښه کې يو شمېر کسان وژل شوي خو ويې ويل چې د والي د مرستيال په مشرۍ يو پلاوی سيمې ته تللی څو معلومه کړي چې ملکيان دي او که له وسله والو طالبانو سره تړاو لري.
طالب منګل وويل چې د پلاوي تر راستنېدو وروسته به د وژل شوو شمېر او د پېښې په اړه نور معلومات له رسنيو سره شريک کړي.
په ورته وخت کې د باک ولسوالۍ يوه اوسېدونکي نظام الدين (مستعار نوم) پژواک اژانس ته وويل چې په وژل شوو کې درې وروڼه او دوه يې ورېرونه دي.
د هغه په وينا، په وژل شوو کې يو د پوهنتون محصل و خو د نورو په اړه پوره معلومات نه لري.
د يادونې ده، تر دې مخکې هم په خوست کې د ځانګړو افغان ځواکونو له خوا په بېلابېلو سيمو کې ملکي وګړي وژل شوي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن