د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

ناټو افغانستان کې د ماموریت د دوام او تر ۲۰۲۴ کاله د افغان ځواکونو د مالي ملاتړ اعلان وکړ

ناټو افغانستان کې د ماموریت د دوام او تر ۲۰۲۴ کاله د افغان ځواکونو د مالي ملاتړ اعلان وکړ

Jul 12, 2018 - 18:57

بروکسل (پژواک، ۲۱ چنګاښ ۹۷): د ناټو سازمان په سرمشریزه غونډه کې تر نامعلومې مودې پورې په افغانستان کې د روزنې ماموریت د دوام او تر ۲۰۲۴ کاله پورې د افغان ځواکونو د ملاتړ ژمنې وشوې.

دغه څرګندونې په هغه پرېکړه لیک کې شوي چې د چنګاښ په ۲۱مه، د ناټو سرمشریزې غونډې پر مهال د افغانستان په اړه تر ځانګړې ناستې وروسته خپور شوی دی.

په دغه ۱۲ ماده ییز پرېکړه لیک یا اعلامیه کې راغلي چې ناټو او متحدین یې له افغانستان سره اوږد مهاله همکاریو ته ژمن دي.

سرچینې زیاته کړې، په افغانستان کې سولې ته د خلکو لېوالتیا اوهیلې ورځ تر بلې زیاتیږي او ناټو یې په دې برخه کې ملاتړ کوي.

په دې پرېکړه لیک کې ناټو او متحدینو یې د خپلو ځواکونو او د افغانستان د خلکو د هغو قربانیو قدرداني کړې، چې د سولې او ثبات لپاره له کلونو راهیسې یې ورکوي.

د ناټو د سرمشریزې په دې اعلامیه کې راغلي، دوی غواړي چې افغانستان بیا هیڅکله د ترهګرو پر خوندي ځالې بدل نه شي، په همدې موخه دوی غواړي چې په افغانستان کې د روزنې خپل ماموریت ته ادامه ورکړي.

په پرېکړه لیک کې د افغان امنیتي ادارو ستاینه شوې چې په دې وروستیو کې یې ډېر پرمختګونه کړي او د دوی وړتیاوې یې ستايلې دي .

سرچینې زیاته کړې، په افغانستان کې د سولې او ثبات رامنځته کولو په موخه د افغانستان د شخړې هواري لپاره سیاسي جوړ جاړي ته اړتیا ده؛ په همدې موخه ناټو او متحدین یې طالبانو سره د سولې په اړه د افغان ولسمشر د هلو ځلو او طرحې ملاتړ کوي.

هغوى دغه راز د تېر اختر په ورځو کې د اوربند په اړه د افغان حکومت د پرېکړې ستاینه کړې او د طالبانو یې غندنه کړې چې اوربند يې ونه غځاوه.

ناټو پر افغان طالبانو غږ کړی چې د افغانانو په مشرۍ د سولې له پروسې سره یوځای شي، څو افغان شخړې ته دوامداره د حل لاره پیدا شي.

په پرېکړه لیک کې راغلي: ((ناټو او متحدین یې د افغانانو له خوا د سیاسي جوړجاړي د هر هغې پرېکړې چې په افغانستان کې د تاوتریخوالي له منځه وړلو لپاره کېږي، ملاتړ کوي.))

دغه راز ناټو د داعش په ګډون د ټولو ترهګرو د ځپلو په موخه د افغان حکومت د هڅو ملاتړ کړی دی.

په پرېکړه لیک کې راغلي: ((باثباته افغانستان زموږ او ټولې سیمې په ګټه دی، د سیمې هېوادونه په افغان سولې او ثبات کې مهم رول لوبولی شي.))

ناټو له پاکستانه غوښتي چې د افغان شخړې د سیاسي هواري لپاره همکاري وکړي او په خپله خاوره کې د ترهګرو خوندي ځالې بندې کړي.

په پرېکړه لیک کې  د افغانستان او پاکستان د عمل پلان څخه هرکلی شوی او ناټو به هم په سیمه ییزه کچه رغنده رول ولوبوي.

ناټو په افغانستان کې د خپل روزنیز ماموریت په چوکاټ کې د قطر او اماراتو د راتګ هرکلی کړی دی.

په اعلامیه کې تر ۲۰۲۴ کاله پورې د افغان ځواکونو د مالي ملاتړ، د ناټو د روزنې د ماموریت او افغانستان سره د اوږدمهاله همکاریو ژمنې شوې دي.

په پرېکړه لیک کې راغلي، افغان لوري هم له دوی سره ځينې ژمنې کړې دي، چې افغان امنیتي ارګانونه به پیاوړي کوي، ټولو خلکو ته به امنیت تامینوي، د فساد پر ضد به مبارزه کوي او د بشري حقوقو درناوی به لري.

دغه راز په اعلامیه کې راغلي چې افغان لوري ژمنه کړې چې رڼې پارلماني او ولسمشریزې ټاکنې به ترسره کوي. همدارنګه افغان لوري ژمنه کړې چې د افغان امنیتي ځواکونو په لګښتونو کې به خپله برخه ورکوي.

نښه: 

ورته راپورونه:

نظر ورکړئ

اعلانونه

Advertisement