کابل (پژواک،د زمري لومړۍ نېټه ۹۷): د ولسي جرګې په نننۍ ناسته کې د جنرال دوستم د راتګ د هرکلي تر څنګ له اوسني وضعیت څخه د هېواد د وتلو په پار د ملي وحدت په ټينګښت او د سترې ملي غونډې پر جوړېدو ټينګار وشو.
د و لسمشر لومړی مرستیال او د جنبش ګوند موسس جنرال عبدالرشیددوستم ۱۴ میاشتې مخکې له ولسمشر سره د نوموړي د اختلاف د زیاتېدو او د جوزجان د پخواني والي احمد ایشچي سره د نوموړي د بدکارۍ د تور او د لويې څارنوالۍ له خوا د نوموړي د قضیې د څېړنې وروسته ترکیې ته لاړ.
نوموړي یو ځل هېواد ته د راتلو هڅه وکړه خو الوتکې ته یې د بلخ په هوايي ډګر کې د ناستې اجازه ورنه کړل شوه.
جنرال دوستم تېره ورځ په ترکیه کې له ۱۴ میاشتو پاتې کېدو وروسته کابل ته راغی او د حامد کرزي په نړیوال هوايي ډګر کې یې د ځانګړو مراسمو په ترڅ کې هرکلی وشو.
د ولسي جرګې رییس عبدالرووف ابراهيمي د یادې جرګې په نننۍ ناسته کې هیله مندي ښکاره کړه چې هېواد ته د جنرال دوستم راتګ به په اوسني وضعیت کې د مثبتو بدلونونو د رامنځته کېدو لامل شي او د هېواد په سیاسي، امنیتي، اقتصادي او ټولنیزو پروګرامونو کې به مهم رول ولري.
نوموړي پر ملي وحدت د ټينګار تر څنګ له حکومت څخه وغوښتل چې له اوسني وضعیت څخه د وتلو او په((هېواد کې د بحران د کنټرول)) سربېره مناسبه ستراتیژي تدوین کړي او د سیاسي ګوندونو، قومونو او نورو د استازو په ګډون دې غونډه جوړه کړي.
په ولسي جرګه کې د هرات د خلکو استازي صالح محمد سلجوقي وویل، د سیاسي ګوندونو او حکومت تر منځ اختلاف د هېواد په ګټه نه، بلکې ناورین رامنځته کوونکی دی. هغه په هېواد کې د شته ستونزو د حل لپاره پر ملي یووالي ټينګار وکړ او د هېواد له سیاسي مشرانو یې وغوښتل چې مخالفتونه پای ته ورسوي.
په ولسي جرګه کې د فراه د خلکو استازې حمیرا ایوبي هم هېواد ته د جنرال دوستم د راتګ هرکلی وکړ او هیله یې څرګنده کړه چې د نوموړي راتګ به د امنیت د ټينګښت او ملي یووالي سبب شي.
د ولسي جرګې یو شمېر نورو غړو هم د جنرال دوستم له راتګ څخه هرکلی وکړ او هیله مندي يې ښکاره کړه چې د دوستم شتون به په شمال کې د امنیت د راتلو او د ملي یووالي د زیاتېدو لامل شي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن