محمودراقي (پژواک ٤ زمرى ٩٧): د کاپيسا امنيتي مسوولين وايي، په تګاب ولسوالۍ کې د امنيتي ځواکونو په عملياتو کې ٣٥ وسله والو طالبانو ته مرګ ژوبله اوښتې ده.
د تګاب امنيه قومندان محمد نعيم ساپي، پژواک خبري اژانس ته وويل چې نن سهار د تګاب په مرکز او جنوبي سيمو کې د امنيتي ځواکونو له خوا چاڼيز عمليات پيل شوي چې ١٤ وسله وال په کې وژل شوي او ٢١ نور ټپيان دي.
ده زياته کړه، په دې عملياتو کې د ملي اردو او سيمه ييزو پوليسو لسو سرتېرو ته هم مرګ ژوبله اوښتې ده.
د هغه په وينا، د دې عملياتو په پايله کې څو سيمې له وسله والو پاکې شوي او اوسمهال هم د تګاب په احمدزيو، انارجوي، سينزيي او بدارب سيمو کې ځمکني عمليات او هوايي بريدونه روان دي.
د بدراب سيمې يوه اوسېدونکي زبير احمد پژواک ته وويل چې جګړه له نن سهار راهيسې پيل شوې او اوس مهال هم پر ځينو سيمو بمباري روانه ده.
دى زياتوي، د اخندزاده ګانو په کلي کې پر يوه کور الوتکې بمبار کړى چې وسله والو ته په کې مرګ ژوبله اوښتې، دغه راز د احمدزيو په سيمه کې سيمه ييزو پوليسو ته مرګ ژوبله اوښتې ده چې شمېر يې معلوم نه دى.
د تګاب يوه سپين شيراغا پژواک ته وويل: «د جګړې له امله له څو ورځو راهیسې خلکو ته ستونزې پیدا شوې، له کورونو وتلی نه شي، د انارو باغونو ته یې زیان اوښتی دی، د جګړې له امله خلک خپل باغونه هم اوبه کولای نه شي.»
وسله والو مخالفينو بيا د پورتنې مرګ ژوبله په اړه څه نه دي ويلي.
دوه ورځې وړاندې د بدراب په سيمه کې د کومانډو ځواکونو په عملياتو کې هم د وسله والو والي او ولسوال دواړه وژل شوي وو.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن