د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

يو شمېر خلک د مزار حوزوي روغتون د ډاکټرانو له ناسم چلنده شکايت کوي

يو شمېر خلک د مزار حوزوي روغتون د ډاکټرانو له ناسم چلنده شکايت کوي

Aug 04, 2018 - 14:54

مزار شريف ( پژواک، ۹زمری،۹۷): د بلخ ولايت مرکز مزار شريف ښار کې ناروغان او د ناروغانو پايوازان د ابو علي سينا حوزوي روغتون د ډاکټرانو له ناسم چلند څخه شکايت کوي.

دوی وايي چې ياد روغتون کې تجهيزات شته؛ خو بيا هم ناروغان د عادي معايناتو لپاره له ياد روغتون څخه بهر د ډاکټرانو شخصي کتنځايونو ته لېږل کېږي.

د بلخ د ولايتي شورا رييس هم مني چې د مزار شريف له حوزوي روغتون څخه ورته شکايتونه رسېدلي؛ خو زياتوي چې د يادو ستونزو د حل په موخه يې هڅې پيل کړې دي.

خو د ابو علي سينا حوزوي روغتون مسوولين د خلکو ادعاوې ردوي؛ خو دا مني چې د روغتون د کاري پرسونل کمښت يې لويه ستونزه ده.

ابو علي سينا حوزوي روغتون د شمال زون په کچه تر ټولو لوى دولتي روغتون دى چې پر بلخ سربېره د بغلان، سمنګان، جوزجان، سرپل او فارياب ولايتونو د ناروغانو درملنه هم په کې کېږي.

اوس په دغه روغتون کې ناروغان او د ناروغانو پايوازان د ډاکټرانو له ناسم چلند څخه شکايت کوي او وايي چې د هغو خلکو درملنه پر وخت په کې کېږي چې واسطه ولري.

د مزار شريف اوسېدونکی جمعه خان چې دوه ورځې کېږي ابو علي سينا حوزوي روغتون ته يې ناروغ راوستلی وايي چې ډاکټران هېڅ پاملرنه نه ورته کوي.

هغه زياتوي،ابو علي سينا د تجهيزاتو له اړخه يو پر مختللی روغتون دی او هر ډول وسايل په کې شته، خو بيا هم ډاکټران د عادي معايناتو لپاره ناروغ له روغتونه بېرون لېږي.

نوموړی چې د روغتون د دروازې مخکې ولاړ و او يوه سپينه پارچه يې هم لاس کې وه، پژواک ته   وويل: (( دا پارچه يې راکړه او راته يې وويل، چې بهر لابراتوار ته لاړ شئ او د وينې معاينه مو وکړئ، په داسې حال کې چې دننه روغتون کې د هر ډول معايناتو امکانات هم شته دي.))

هغه زياته کړه چې د روغتون ډېری ډاکټران په ښار کې له لابراتوارونو او درملتونونو سره شريک دي او روغتون ته مراجعه کوونکي ناروغان هغو ځايونو ته استوي.

۴۵ کلنه صدف چې د شکرې ناروغي لري او د مزار شريف حوزوي روغتون ته يې مراجعه کړې وايي، چې حتی د وينې عادي معايناتو لپاره له شفاخانې څخه بهر لابراتوار ته لېږل کېږي.

نوموړې چې شنه چادري يې پر سر وه او د معايناتو نتيجې يې لاس کې وې، پژواک ته وويل چې په ۸۰۰ افغانۍ يې د وينې معاينات کړي دي.

هغه زياتوي چې تېره ورځ يې روغتون ته ځکه مراجعه کړې وه، چې اقتصادي وضعيت يې خراب و او غوښتل يې دغلته په وړيا ډول درملنه وکړي؛ خو ډاکټرانو ورته له شفاخانې څخه بېرون د معايناتو سپارښتنه وکړه.

دې وويل چې پيسې يې په پور اخيستي او بيا يې په شخصي لابراتوار کې د وينې معاينات کړي دي.

په ورته وخت کې د بلخ د زارع ولسوالۍ اوسېدونکی ثمرالدين هم د بلخ د حوزوي روغتون د ډاکټرانو له ناسم چلند او نه پاملرنې څخه شکايت کوي.

نوموړی وايي چې يوه اوونۍ کېږي له ولسوالۍ څخه يې ناروغ راوستی؛ خو ډاکټران يې نن په سبا غولوي او عمليات يې نه کوي.

ثمر الدين زياته کړه: ((موږ له لرې لارې څخه راغلي يو، ناروغ مو د مثانې ستونزه لري او بايد عمليات شي، نن مو بايد ناروغ عمليات شوی وای؛ خو ډاکټرانو راته بهانه وکړه او وايي چې نوبت ته ودرېږئ، په داسې حال کې چې له موږ وروسته ناروغان راوستل شول، هغوی واسطې درلودې؛ نو عمليات شول.))

هغه زياتوي، يواځې په لومړۍ ورځ  له شفاخانې څخه بهر ولېږل شول او د ۲۵۰۰ افغانيو معاينات يې وکړل.

نوموړي وويل، د ابو علي سينا حوزوي روغتون ډاکټران هغو مشخصو لابراتوارونو او معاينه خانو ته ناروغان لېږي چې دوی ورسره مخکې خبره کړې وي.

ددغو شکايتونو په اړه د بلخ د ولايتي شورا رييس افضل حديد وايي چې په دې اړه ورته د خلکو  شکايتونه رسېدلي دي .

نوموړي پژواک ته وويل،په دې برخه کې لوی مشکل دا دی چې د مزار حوزوي روغتون ته د ناروغانو مراجعه زياته ده.

هغه زياته کړه چې په ياد روغتون کې ډاکټران د خلکو په خدمت کې ډېر ستړي دي؛ خو يو شمېر ډاکټران د نه پاملرنې ستونزه هم لري.

حديد وويل، چې په روغتون کې د کافي درملو نشتون، خپلو وظايفو ته د يو شمېر ناروغانو نه پاملرنه او همدا راز له شفاخانې څخه بهر ته د يو شمېر ډاکټرانو شخصي کتنځايونو ته د ناروغانو  راجع کول، هغه ستونزې دي، چې له ډېر وخته موجودې دي.

هغه وايي چې د خلکو دغه ټولې ستونزې يې نوټ کړي او ډېر ژر به يې د مزار شريف د حوزوي روغتون له مسوولينو سره شريکې او تعقيب کړي.

 له دې سره په مزار شريف کې د عامې روغتيا رياست مرستيال ډاکټر محب الله جاوېد د خلکو شکايتونه له حقيقته لرې بولي.

نوموړي له پژواک خبري اژانس سره په خبرو کې وويل، د بلخ په حوزوي روغتون کې ټول خدمات په وړيا ډول وړاندې کېږي او د ډېرو ناروغيو تشخيص او معاينات دننه په روغتون کې ترسره کېږي.

هغه زياتوي چې د روغتون په بېلابېلو برخو کې يې د شکاياتو صندوقونه او ځانګړې شمېر نصب کړي چې ناروغان او د هغوی پايوازان د هر ډول ستونزې پر مهال له  دوی سره اړيکه ټينګولی شي.

خو د عامې روغتيا رياست مرستيال مني چې ځينې وخت د ناروغانو د زياتوالي او د شفاخانې د پرسونل د کمښت له امله يو لړ ستونزې رامنځته کېږي.

نوموړي زياته کړه: (( ابو علي سينا د شمال په کچه روغتون دی، چې د ناروغانو شمېر ته په کتو، زموږ د پرسونل تعداد کم دی، موږ مرکز او د عامې روغتيا وزارت ته وړانديز کړی چې په روغتون کې مو پرسونل زيات کړي.))

جاوېد وويل،هېڅ داسې شکايت نه دی ورته رسېدلی چې کوم ډاکټر دې ناروغ خپلې شخصي معاينه خانې ته راجع کړی وي.

هغه زياتوي،که په دې اړه څوک ورته مستند شکايت وکړي؛ نو د دغه عمل ترسره کوونکو ډاکټرانو سره به جدي چلند وکړي.

نوموړي له ناروغانو او د هغوی له پايوازانو غوښتنه وکړه چې په دې تړاو هر ډول شکايت دې د شفاخانې له ادارې او د عامې ورغتيا له رياست سره شريک کړي.

ورته راپورونه:

نظر ورکړئ

اعلانونه

Advertisement