جلال اباد (پژواک، ٢٣ زمری ۹۷): د ننګرهار ولايت چارواکي وايي چې په يو شمېر ولسواليو کې د هوايي او ځمکنيو بريدونو او مخامخ نښتو پرمهال د بهرنيانو په ګډون ۱۵ وسله والو ته مرګ ژوبله اوښتې ده.
د ننګرهار د والي وياند عطاءالله خوږیاڼي د زمري په ٢٣ مه پژواک ته وويل چې تېره ورځ شاوخوا نهه بجې د مومندرې ولسوالۍ مقام مخې ته درېيو وسله والو طالبانو له کرولا ډوله موټر څخه پر يوه پولیس ډزې کړي چې د پولیس په ځوابيه ډزو کې دوه وسله وال طالبان وژل شوي او يو بل ټپي شوی دی.
د نوموړي د معلوماتو له مخې، وژل شوي او ټپي وسله وال طالبان د پاکستان د خيبر پښتونخوا اوسېدونکي دي.
هغه زياته کړه، په ياد بريد کې پوليس ته کوم زيان نه دی اوښتی او د وسله والو طالبانو کرولا موټر او د دوی درې ميله کلاشينکوفونه يې ترلاسه کړي دي.
د والي وياند دغه راز وويل چې د اچين ولسوالۍ باندر خولې سيمه کې د ګډو ځواکونو عملياتو په ترڅ کې څلور داعش وسله وال وژل شوي او پنځه نور ټپيان شوي دي.
د ده په وينا، دغه راز تېره ورځ د نازيانو ولسوالۍ مورچل سيمه کې د هوايي بريد په ترڅ کې دوه او په هسکه مېنه کې يو داعش وسله وال وژل شوي دي.
د والي وياند زياتوي، د بټي کوټ ولسوالۍ مربوطاتو کې بيا ولسي پاڅون کوونکو يو وسله وال طالب په داسې حال کې نيولی چې خپله وسله يې سيند ته غورځولې وه او له سيمې څخه د وتلو په حال کې و.
د ولايت مقام له خوا په يوه بله خپره شوې خبرپاڼه کې راغلي چې په غني خېلو ولسوالۍ کې د عملياتو پر مهال د يو قوماندان په ګډون شپږ وسله وال طالبان وژل شوي دي.
سرچينې زياته کړې، دا عمليات د ملي امنيت د ځانګړو ځواکونو له خوا ترسره شوي دي.
ولايت مقام وايي، يادو وسله والو طالبانو غوښتل چې د غني خېلو ولسوالۍ پر مقام او د لويې لارې پر پوستو بريدونه وکړي چې د ځانګړو ځواکونو له لوري ورته کمين ونيول شو.
داعش او طالب وسله والو په دې اړه څه نه دي ويلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن