د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

کندهار ښار کې د ولایتي ادارې او خصوصي سکتور په مرسته د اوبو بند جوړېږي

کندهار ښار کې د ولایتي ادارې او خصوصي سکتور په مرسته د اوبو بند جوړېږي

Aug 14, 2018 - 14:35

کندهار (پژواک، ۲۳ زمری ۹۷): له هغه وروسته چې په کندهار ښار کې تر ځمکې لاندې د اوبو کچه ټيته شوې ده، ولایتي اداره پلان لري د اوبو یو بند جوړ کړي.

دغه چیک ډېم د کندهار ښار شمال ته د میانکوه غره په لمن کې د ولایتي ادارې او خصوصي سکتور په مرسته جوړېږي چې د اوبو د زېرمه کولو له پلوه ارزښتناک ګڼل کېږي.

د کندهار والي زلمي ویسا، امنیه قوماندان جنرال عبدالرازق د دغه بند پر جوړولو د ښاروالۍ او یو شمېر سکتوري ادارو له مسوولینو سره خبرې کړي دي.

زلمی ویسا وايي، د اوبو دغه بند کندهار  ښار ته تر ټولو نږدې بند دی چې د ورښت پر مهال د ډېرو اوبو زېرمه کولو وړتیا لري او د سېلابونو راوتلو مخنیوی کوي.

هغه د دغه بند جوړېدل ګټور ګام وباله او زیاته یې کړه چې په دې توګه به د ښار په یاده سیمه کې تر ځمکې لاندې د اوبو کچه بېرته راپورته شي.

نوموړي د کندهار له ښاروالۍ، اوبو لګولو، اوبو رسولو، کلیو او پراختیا او کرنې ریاستونو ته دنده وسپارل چې ډېر ژر د کندهار پوهنتون د انجنیري پوهنځي له مسلکي بورډ سره خبرې وکړې او په ګډه د دغه ډیم د جوړولو څېړنه او سروې وکړي.

ده ټینګار وکړ چې د اوبو د زېرمه کولو د دغه بند د جوړولو کار باید ژر پيل شي؛ ځکه د کندهار ښار اوسېدونکي د اوبو له نشتوالي سره مخ دي او د ستونزې د حل لپاره بېړنیو اقداماتو ته اړتیا ده.

والي وویل، دغه چیک ډېم به د ولایت مقام په مشرۍ د امنیې قوماندانۍ، مرستندویه ادارو، خصوصي سکتور او ملي سوداګرو په مرسته جوړ شي.

د کندهار امنیه قوماندان جنرال عبدالرازق د دغه چیک ډېم پر معیاري جوړېدو ټینګار وکړ.

هغه له خپله اړخه د دغه بند په جوړولو کې د هر راز مرستې ژمنه وکړه او یادونه یې وکړه چې ورته بندونه دې په سپين بولدک او ارغستان ولسوالۍ کې هم جوړ شي چې خلک یې د اوبو له سخت کمښت سره مخامخ دي.

د یادونې ده چې په وروستيو کلونو کې په کندهار کې په منځنۍ کچه تر ځمکې لاندې د اوبو کچه ۵۰ متره او په ځینو سیمو کې تر دې هم ډېره کښته شوې چې له امله يې د ښار په ځينو سيمو کې د څښاک او په ولسواليو کې د کرنې لپاره د اوبو موندل ستونزمن شوي دي.

په کندهار کې تر ځمکې لاندې اوبو کچې د کښته کېدو عمده لامل د ګڼو نورو لاملونو تر څنګ په غير فني توګه د برمو وهل او کم اورښت ګڼل کېږي.

خلک له حکومته غوښتنه کوي، مخکې له دې چې وچکالي د ناورین برید ته ورسېږي، د غير فني برمو وهلو مخه دې ونيسي، د باران اوبو د مهارولو، د شته اوبو ساتلو او د زرغونې ساحې زياتولو لپاره دې کار وکړي څو د اوبو کچه بېرته را لوړه شي.

د کندهار د کرنې، اوبو لګولو او مالدارۍ رییس حفیظ الله سعیدي وايي، د کندهار سپین بولدک، ارغستان، رېګستان، شاولیکوټ او میوند ولسوالۍ وچکالۍ ډېرې ځپلي او تر ځمکې لاندې اوبه يې له ۱۸۰ څخه تر ۲۰۰ متره کښته شوي دي.

د ده په خبره، د اوبو د کښته کېدو لوی لامل ژورې څاګانې دي چې په غیر مسلکي ډول کيندل شوې دي.

دی وايي، د وچکالۍ د روان ناورین د کنټرول لپاره باید د باران اوبو د مهارولو تر څنګ شنه کمربندونه جوړ شي، ځنګلونه وساتل شي، څو تر ځمکې لاندې اوبه نورې کښته ولاړې نه شي.

د کندهار د کرنې ریاست د معلوماتو له مخې، دغه ولایت د کال په اوږدو کې له ۲۵۰ ملي متره زیات باران ته اړتیا لري خو سږ کال یوازې ۷۵ ملي متره باران شوی دی.

ورته راپورونه:

نظر ورکړئ

اعلانونه

Advertisement