کندهار- کلات (پژواک، ٢٤ زمرى ٩٧): په کندهار او زابل ولايتونو کې لسګونو وسله والو او سرتېرو ته مرګ ژوبله اوښتې ده.
ځايي چارواکي وايي چې د کندهار په ارغنداب ولسوالۍ کې د پولیسو پر دوو پوستو د وسله والو طالبانو له خوا په برید کې دواړو غاړو ته مرګ ژوبله اوښتې ده.
د دغه ولايت يوې باوري امنیتي سرچینې پژواک اژانس ته وویل، برید د وسله والو طالبانو د لیزري قطعې له خوا تېره شپه شوی او د دواړو لورو تر منځ څو ساعته جګړه شوې ده.
دغه سرچینه وايي، په دې جګړه کې ۱۱ وسله وال طالبان وژل شوي، ۷ ټپیان شوي او دغه راز د پوستې د یوه قوماندان نوراحمد په ګډون ۸ پولیس هم وژل شوي او ۵ نور ټپيان دي.
تر اوسه امنیتي چارواکو او وسله والو طالبانو په دې اړه څه نه دي ویلي.
بلخوا تېره شپه وسله والو طالبانو د زابل د مرکز کلات ښار اړوند د خوازو په سيمه کې د ملي اردو پر پوستې بريد کړی دى.
د دغه ولايت يوې امنيتي سرچينې پژواک ته وويل چې په دغه بريد کې لس سرتېري او يو شمېر وسله وال طالبان وژل شوي دي.
د زابل امنیه قوماندان مصطفی مايار که څه د يادې پېښې په اړه څه نه وايي، خو زياتوي چې په تېرو دوو ورځو کې افغان ځواکونو د کابل- کندهار پر لويه لار د زابل ولايت په اوږدو کې تر ٢٠ زيات وسله وال مخالفين وژلي او لاره يې خلاصه کړې ده.
وسله والو طالبانو تر اوسه په دې اړه څه نه دي ويلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن