د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

په مزارشريف کې د چادرۍ (بورکه) ځای تور حجاب نيولی

په مزارشريف کې د چادرۍ (بورکه) ځای تور حجاب نيولی

Aug 26, 2018 - 15:43

مزارشريف (پژواک، ٤ وږی ۹۷): د بلخ ولايت په مرکز مزارشريف ښار کې د چادريو پلورونکي دوکانداران وايي چې په وروستيو کلونو کې د چادرۍ پلور نيم په نيمه راټيت شوی او ځاى يې تور حجاب نيولى دی.

دوی وايي چې ښار کې دننه د بورکې استعمال ټيټې کچې ته را رسېدلی خو زياتوي چې برعکس بيا د تور حجاب استعمال زيات شوی دی.

د ښځو د حقونو فعالانې بيا وايي چې د چادرۍ له استعمال سره ميرمنې د حقارت احساس کوي او دې ته خوشاله دي چې پر ځای يې حجاب وکارول شوي.

له دې سره ديني عالمان هم وايي چې په اسلام مقدس دين کې د حجاب په اړه ټول شرايط واضح شوي دي.

چادري (بورکه) په افغانستان کې د مېرمنو لخوا ډېره استعمالېدونکې جامه ده چې ډېری وخت يې ښځې له کور څخه بهر ته د تګ پر مهال پر ځان را کشوي.

د ځان پټولو دغه وسيله که څه هم د ډېری مېرمنو لپاره ګرانه تمامېږي، خو بيا هم چادري د افغاني فرهنګ مهم اړخ ګرځېدلې او په ډېری کورنيو کې يې استعمال جبري دی.

خو اوس اوس په مزارشريف ښار کې د چادريو پلورونکي وايي چې د بورکې پلور ټيټې کچې ته را رسېدلی دی.

هغوی زياتوي چې اوس ډېری مېرمنې د چادري پر ځای تور حجاب استعمالوي چې ورسره د بورکې کارونه کمه شوې ده.

محمد ابراهيم له تېرو ۲۰ کلونو راهيسې په مزارشريف ښار کې د چادري پلورلو دوکان لري.

نوموړي پژواک خبري اژانس ته وويل چې په وروستيو دوو کلونو کې د چادرۍ پلور تر ټولو ټيټې کچې ته را رسېدلی دی.

هغه زياته کړه: ((پخوا به مې هره ورځ له ۲۰ څخه تر ۳۰ پورې چادريانې خرڅولی؛ خو اوس په ورځ کې له ۵ څخه تر ۸ چادريو پورې پلورل کېږي.))

نوموړي په داسې حال کې په دوکان کې پر راځوړند شوو چادريانو يې لاس تېراوه، پژواک ته يې وويل چې ور ورو د چادري ځای، تور حجاب نيسي.

ابراهيم په خپلو خبرو کې دا هم وويل چې د چادري په پرتله، حجاب هم ارزانه دی او هم يې مېرمنې د کارولو پر مهال هوسا وي.

ضمير هم په مزارشريف ښار کې د چادري پلورلو دوکان لري.

هغه پژواک ته وويل چې د ښار اوسېدونکي تر ډېره حجاب استعمالوي او په وينا يې چې ډېری مشتريان چې د ولسواليو او لرې پرتو سيمو اوسېدونکي دي.

دى زياتوي چې پخوا يې يواځې د چاري د پلورلو کاروبار کاوه؛ خو اوس يې د مشتريانو د تقاضا پر اساس تور حجابونه هم پلوري، چې ډېر پېرېدونکي لري.

د مزارشريف اوسېدونکې زهرا د هغو مېرمنو له ډلې څخه ده چې پخوا يې چادري پر سر کوله خو اوس حجاب اچوي.

هغې پژواک خبري اژانس ته وويل چې د مزارشريف ښار ټولنيز وضعيت له بدلېدو سره يې کورنۍ اجازه ورکړه چې د چادري پر ځای حجاب واغوندي.

دې زياته کړه: ((په چادري کې به ډېره ناراحته وم، حتی سالنډي راته پيدا شوې وه، خو اوس حجاب اچوم او ورسره هېڅ ډول مشکل نلرم)).

مېرمن زهرا زياتوي چې دا ډېرې نورې مېرمنې هم پېژني چې پخوا يې چادري استعمالوله؛ خو اوس حجاب اغوندي.

د ښځو د حقونو فعاله جميله حسام بيا وايي چې کورنۍ بايد مېرمنو ته د هغو جامو د اغوستلو حق ورکړي چې له اسلامي او افغاني اصولو سره برابرې وي.

هغې پژواک ته وويل، هغه مېرمنې چې د چادري استعمال پرې دروند تمامېږي او يا هم په کې د حقارت احساس کوي، نو کورنۍ يې بايد پرېږدي، چې حجاب واچوي.

حسام زياته کړه چې د اسلامي ارشاداتو له مخې هم دا نه دي فرض شوي چې مېرمنې دې چادري واچوي، بلکې هلته د اسلامي حجاب د مراعات کېدو خبره شوې ده.

د هغې په خبره، چادري د افغاني فرهنګ يوه مهمه برخه ګرځېدلې چې ډېری مېرمنې يې له مجبوريته پر سر کوي.

نوموړې زياته کړه: ((چادري ځيني وخت د مېرمنو د ازار او اذيت سبب هم ګرځي، د بېلګې په ډول د اوړي په موسم کې د زياتې ګرمۍ له امله او د ژمي په موسم کې د اوبو او خټو له امله چادري کړې مېرمنې له ګڼو ستونزو سره مخ کېږي.))

هغه زياتوي چې د چادري لپاره اسلامي حجاب تر ټولو ښه بديل کېدای شي چې ډېری مېرمنې هم ورسره راحته دي.

په ورته وخت کې بيا ديني عالمان هم چادري يا بورکه د کلتور برخه بولي او زياتوي چې په اسلام مقدس دين کې د حجاب په اړه ټول موارد روښانه او واضح دي.

د بلخ د علماوو شورا غړي مولوي محسن دانش پژواک ته وويل چې په اسلام کې حجاب فرض شوی او ټول شرايط يې هم واضح شوي دي.

هغه زياته کړه چې په اسلام کې د چادري په نوم چي شی نشته؛ خو زياتوي چې دين د هغه حجاب اغوستو حکم کوي، چې په اسلامي اصولو برابر وي.

دانش د خپلو خبرو په دوام کې وويل، هغه مېرمنې چې له چادري سره مشکل لري؛ نو کولای شي چې له حجاب څخه استفاده وکړي.

نوموړي زياته کړه: ((حجاب بايد داسې پوښاک وي، چې د بدن ټول اندامونه پکې پټ شي او هېڅ ډول برجستګي ښکاره شني؛ نو دغه اسلامي حجاب دی او ان له چادري څخه يې اهميت هم زيات دی.))

هغه تاکيد وکړ چې د چادري او حجاب دواړو اغوستل په دې شرط صحيح دي چې له اسلامي اوامرو څخه په کې سرغړونه نه وي شوې.

ورته راپورونه:

نظر ورکړئ

اعلانونه

Advertisement