د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د میدان خلکو د سترو مدني حرکتونو پیلولو ګواښ وکړ

د میدان خلکو د سترو مدني حرکتونو پیلولو ګواښ وکړ

Aug 30, 2018 - 16:36

کابل (پژواک، ۸ وږی ۹۷): د ميدان ښار خلکو تر شاوخوا ۴۰ ورځني تحصن وروسته له مرکزي ادارې د خپلو حقونو بيا ځلي غوښتنه وکړه او ګواښ يې وکړ چې که تر راتلونکې يوې اوونۍ پورې يې غوښتنې ونه منل شي، نو په سترو مدني حرکتونو به لاس پورې کړي.

تر دې وړاندې هم يادو خلکو ورته ګواښ کړى، خو نه يې حکومت غوښتنې منلې او نه هم دوى په ورته عمل لاس پورې کړى دى.

نن يو ځل بيا د ميدان وردګو ولايت د مرکز ميدانښار، جلرېز، نرخ، لومړۍ حصې بهسودو او دويمې حصې بهسودو ولسواليو سلګونو کسانو په ميدان ښار کې اعتراضي ناسته لرله او له حکومته د خپلو حقونو ترلاسه کولو غوښتنه يې وکړه.

د روان کال د زمري په لومړۍ نېټه د ميدان سلګونو اعتراض کوونکو د والي دفتر، ښاروالۍ او د محکمې دروازې هم وتړلې او ويې ويل، تر هغه يې تړلې ساتي چې غوښتنې يې ومنل شي. خو له کابل څخه راغلي پلاوي چې مشري يې د ولسمشر سلاکار طاهر صافي کوله، لاريون کوونکو ته ډاډ ورکړ چې غوښتنې به يې تر ولسمشره ورسوي، نو اعتراض کوونکو د دولتي ادارو دروازې پرانيستلې.

ياد خلک له حکومته غواړي چې په پاسپورټونو، برېښنايي پېژندپاڼو، د موټرو په پلېټونو او په ټولو رسمي او غير رسمي چارو کې په بشپړه توګه د "ميدان وردګ" وليکل شي، په مرکز ميدان ښار کې دولتي پوهنتون جوړ کړی، په محلي او مرکزي ادارې کې دې د ياد ولايت د مرکز په ګډون د يادو څلورو ولسواليو کدرونه پر دندو وګوماري او يادو خلکو ته دې برېښنا ورکړل شي؛ ځکه د برېښنا پايې د همدې ولسونو په کرنيزو ځمکو کې لګول شوې دي.

له هغه وروسته د زمري په ۱۷مه د ميدان وردګو ولايت يو زرګونو خلک په ميدانښار کې د لاريون پر مهال د کابل- غزني او باميان لويې لارې د خپلو غوښتنو د نه منلو په غبرګون کې وتړلې خو د زمري په ۱۸مه د ميدان وردګو ولايت چارواکو ويلي وو چې تېره ورځ يادو لاريون کوونکي يوه پلاوي د ملي امنيت له پخواني سلاکار محمد حنيف اتمر سره وکتل او هغه ورسره د هغوی پر غوښتنو د غور کولو ژمنه کړې وه.

خو نن د درېيم ځل لپاره د ميدان وردګو ولايت د مرکز ميدانښار، جلرېز، نرخ، لومړۍ حصې بهسودو او دويمې حصې بهسودو ولسواليو شاوخوا ۵۰۰ تنه قومي مشرانو، علماوو او مدني فعالانو د يوې اعتراضي ناستې پر مهال وويل چې که مرکزي اداره يې غوښتنې ونه مني، نو دوی به په ميدان وردګو ولايت کې د ټولو محلي ادارو دروازې وتړي او که چېرې بيا هم غوښتنې يې ونه منل شي، نو د کابل – کندهار او کابل – باميانو لويې لارې به د ترافيکو پر مخ وتړي.

د جلرېز ولسوالۍ قومي مشر حاجي غلام محمد هوتک نن په ميدان ښار کې خبريالانو ته وويل چې د ميدان ولسونه له حکومت څخه د خپلو مشروع حقونو غوښتنه کوي، خو مرکزي اداره يواځې ژمنې کوي او تر اوسه يې هېڅ يوه غوښتنه نه ده منل شوې.

هغه ولسمشر غني ته په خطاب کې وويل: "ولسمشره! موږ له هېچا سره مشکل نه لرو، موږ خپل حقوق غواړو او له تا يې غواړو، که چېرې زموږ غوښتنې ونه منل شي، نو د وروستۍ هرې پېښې او کړنې مسووليت به ستا پر غاړه وي. "

دی زياتوي: "په ميدان ښار کې د برېښنا ستنې زموږ پر سينه تېرې شوې، خو موږ برق نه لرو، برق له موږه تېرېږي، غزني، زابل، کندهار او ان پاکستان ته لېږل کېږي، خو موږ تيارې ته ناست يو، که چېرې موږ ته برېښنا رانه کړي، نو موږ به په دغه ولايت کې د برېښنا پايې قطع کړو. "

د ميدان وردګو ولايتي شورا غړي شريف الله هوتک وويل چې د ميدان ولسونو ته په تېرو ۱۷ کلونو کې د هغوی حقه حقوق نه دي ورکړل شوي او زغم يې کړی چې له دې وروسته چوپ نه شي پاتې کېدای.

هغه وايي: "موږ په ټولو رسمي او غير رسمي چارو کې د ميدان وردګ ليکل غواړو، په مرکز کې پوهنتون غواړو، برېښنا غواړو، عجيبه ده د برېښنا پايې زموږ پر سينه تېرې شوې، خو موږ څراغ ته ناست يو او تر څنګ يې موږ پياوړي کدرونه لرو، حکومت بايد په مرکز او محلي اداره کې زموږ کدرونه پر دندو وګوماري. "

د بهسودو ولسواليو په استازيتوب جنرال فاروق سلطاني مرکزي ادارې ته په خطاب کې وويل: "جناب ولسمشره! موږ له چا خيرات نه غواړو، موږ خپل حقوق غواړو، هغه که په هر بيه وي، دا چې موږ نور زغمو، هيله مو دا ده چې نور هم موږ وزغمي. "

ده وويل چې دا د ولس غوښتنې دي او څو چې ونه منل شي، نو خپلو سترو مدني خوځښتونو ته به دوام ورکړي او ان پر دې به هم غور وکړي "چې حکومت د ځان او ځان د حکومت وبولي او که څنګه؟"

د غونډې په پای کې زين الله زرين د ميدان د خلکو په اړه پرېکړه ليک ولوست.

په پرېکړه ليک کې راغلي چې يو شمېر اشخاص بيا د خپلو شخصي ګټو خوندي کولو په خاطر په دغه ولايت کې د وروڼو قومونو ترمنځ نفاق او کرکو ته لمن وهي.

په اعلاميه کې زياته شوې: "د ميدان ولسونو د خپلو هغو حقونو ترلاسه کولو په موخه چې تېرو حکومتونو دې ولس ته د نه پاملرنې له امله نه دي ورکړي، پوره څلوېښت ورځې وړاندې خپله د حق چيغه پورته کړه، خو بيا هم له بده مرغه دا دى تر نن ورځې پورې دا ولسونه په دې هيله ناست دي، تر څو يې خپلې قانوني غوښتنې ومنل شي او په رښتينې توګه ځان د حکومت او حکومت د خپل ځان وګڼي."

په اعلاميه کې ولسمشر غني ته په خطاب کې ويل شوي: "جلالتماب ولسمشره! د ميدان وردګو ولايت نوم له تاسيس څخه بيا تر نن پورې (ميدان وردګ) او مرکز يې ميدان ښار دى، خو له بده مرغه د سيمه ييزو ارګانونو په خپلواکه او نورو ادارو کې ځينو مغرضو کړيو د ميدان وردګ له نامه څخه د (ميدان) کلمه حذف او يواځې (وردګ) ليکل ترويج کړل، خو متاسفانه د دغو کړيو د اثر او رسوخ له امله بيا هم په الکترونيکي تذکرو، پاسپورټونو، د موټرو په نمبر پلېټونو او نورو اړينو اسنادو کې يواځې وردګ ليکل کېږي. "

سرچينه ليکي، پوهنتون بايد د ولايت په مرکز کې وي، څو د لوړو زده کړو وزارت چارواکي، استادان، کورني او بهرني تمويلوونکي په ډاډ سره د پوهنتون د پرمختګ لپاره د فعاليتونو ارزونه وکړاى شي، چې اوس په لرې نا امنه پرته ولسوالۍ کې دی او هلته د عامه جريانونو، د برېښنا، انټرنېټ، ټکنالوجۍ او نورو امکاناتو اسانتياوې په هېڅ صورت نه لري. پوهنتون بايد د ټول هېواد د محصلينو (نجونو او هلکانو) لپاره مساعد موقعيت ولري چې اوسنى ځاى يې مناسب نه دی.

په پرېکړه ليک کې راغلي چې د ميدان وردګ ولايت مرکز ميدان، نرخ، جلرېز، لومړۍ حصه بهسود او مرکز بهسود ولسواليو اوسېدونکي علمي پياوړي کادرونه لري، خو په محلي او مرکزي اداره کې پر دندو نه دي ګومارل شوي.

په پرېکړه کې راغلي: "د دې ولايت په مرکز ميدان ښار، په ټول ښار کې د برېښنا نه شتون، د عامه او دولتي کتابتون نه شتون، د پخو عمومي لارو او کوڅو نه شتون، د يوه معياري او پراخ کرکټ لوبغالي نه شتون، همدارنګه روغتيايي مراکز، ښوونځي، روزنتونونه، لوى جامع جوماتونه، ديني مراکز او نورې ښاري اسانتياوې چې دا ښار يې نه لري، نو له مرکزي حکومت او اړوندو ادارو يې د رغېدو غوښتونکي يو."

په پرېکړه کې ګواښ شوى چې: "سر له نن څخه چې د ١٣٩٧کال د سنبلې مياشتې اتمه نېټه کېږي، تر راتلونکې دوشنبې چې د روانې مياشتې ١٢مه نېټې سره برابره ده، مرکزي او محلي ادارې ته مهلت ورکول کېږي چې که يې د ميدان ولسونو غږ وا نه اورېد او غوښتنې يې و نه منل شوې، نو د روانې مياشتې په ١٣ مه نېټه د سه شنبې په ورځ په ميدان ښار کې د ټولو محلي ادارو دروازې د دې ولسونو له لوري تړل کېږي."

همداراز په پرېکړه ليک کې راغلي، که چېرې بيا هم مرکزي اداره د دوى غوښتنې نه مني او ورکړې ته يې نه حاضريږي، نو د ميدان ولسونه به کابل ته له ميدان ښار څخه ټولې غځېدلې لارې او همداراز د ولس او حکومت تر منځ هر ډول اړيکو او همکاريو ته د پاى ټکى کيږدي.

سرچينه زياتوي، د ميدان ولسونه که بيا هم همدا ډول ناهيلي پاتې کېږي او غږ ته يې لبيک نه ويل کېږي، نو د ميدان ولس به له محلي او هم مرکزي ادارې سره پر ټولو اړيکو له سره فکر کوي. همدا ډول به ولس د دې پرېکړه هم په خلاص لاس سره وکړي، چې حکومت د ځان او ځان د حکومت وبولي او که څنګه؟

ورته راپورونه:

نظر ورکړئ

اعلانونه

Advertisement