مشعل: که د شپږيزې لوبډلو مالکان حاضر نه شول قراردادونه به يې فسخ شي

کابل (پژواک، ١٧ وږى ٩٧) : د کرکټ بورډ عمومي مشر وايي چې د شپږيزې داخلي ليګ به  ژوندى ساتل کېږي او د لوبډلو کوم مالکان چې نه حاضريږي قراردادونه به يې فسخ شي.

شپږيزه د شل اووريز کرکـټ تر ټولو ستر کورنى ليګ دى چې له تېرو څو کلونو راهيسې په هېواد کې دننه ترسره کېږي.

خو له کله راهيسې چې کرکـټ بورډ په اماراتو کې د افغانستان غوره ليګ يا اى پي اېل د ترسره کولو اعلان کړى، اندېښنې پيدا شوې وې چې کېداى شي شپږيزې سيالۍ ونه شي.

د کرکټ بورډ عمومي مشر عاطف مشعل د وږي په ١٧مه، په يوه خبري کنفرانس کې وويل چې د شپږيزې داخلي ليګ به  ژوندى ساتل کېږي او هر کال به ترسره کېږي.

هغه زياته کړه،د شپږيزې لوبډلې پر شرکتونوپلورل شوې دي او د کومو لوبډلو مالکان چې نه حاضريږي قراردادونه به يې فسخ شي.

ده وويل:((د هېواد امنيتي وضعيت ښه نه دى، ځکه د پخوا په څېر بهرني لوبغاړي نه شو رابللى. ))

نوموړي د شپږيزې لوبډلو مالکانو په اړه وويل چې هغوى يا پيسې نه لري، يا يې مديريت نه شي کولى.

د ده په وينا، له هغوى سره اړيکې نيول شوي، خو ځواب نه وايي او نه هم تر اوسه حاضر شوي، که اړيکې يې ونه نيولې، قراردادونه يې فسخ کېږي.

ده زياته کړه : ((يا به موږ په خپله دا لوبډلې واخلو يا به يې بل چاته ورکړو، نرخونه مو ټيټ کړي، ځکه چې بهرني لوبغاړي نه راځي.))

هغه د غوره ليګ په اړه وويل،د افغان سوداګر د نه لېوالتيا له امله دوى اړ شول چې د افغانستان غوره ليګ لوبـډلې پر بهرنيو شرکتونو وپلوري .

ټاکل شوې ده چې دافغانستان غوره ليګ تجارتي شل اووريزې سيالۍ د راتلونکې اکتوبر مياشتې له پنـځمې نېټې څخه تر ٢٠مې پورې په متحده عربي اماراتو کې ترسره شي.

login or register a new account.