د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د اچين ولسوالۍ د سيمه ييزو پوليسو قوماندان او دوه وروڼه يې نيول شوي

د اچين ولسوالۍ د سيمه ييزو پوليسو قوماندان او دوه وروڼه يې نيول شوي

Sep 12, 2018 - 17:03

جلال اباد (پژواک، ۲۱ وږی ۹۷): د ننګرهار ولايت چارواکي وايي، د اچين ولسوالۍ د سيمه ييزو پوليسو قوماندان او دوه وروڼه يې چې د عامو خلکو پر وژلو، ګواښلو، وهلو ډبولو او نورو جرمونو تورن دي، د پوليسو له خوا نيول شوي دي.

خو د شينوارو قومي مشران وايي، د يادو ټولو ستونزو تر شا د سيمه ييزو پوليسو د نيول شوي قوماندان پلار جلال باچا لاس لري او تر هغه چې نوموړی نه وي نيول شوی، دوی له خپلو اعتراضونو لاس نه اخلي.

د شينوارو قومي مشرانو او ځوانانو پرون د وږي په ۲۰مه د مومندرې ولسوالۍ اړوند ډکې سيمه کې مظاهره وکړه او د جلال اباد – تورخم لويه لاره يې د ترافيکو پر مخ وتړله، خو لاريون کوونکو لا هم لار نه ده خوشې کړې او وايي، لومړی يې بايد غوښتنې ومنل شي.

د دوی د لاريون پر مهال پرون له غرمې وروسته يو ځانمرګی بريد هم وشو چې له امله يې ۶۸ کسان ووژل شول او ۱۶۵ نور ټپيان شوي دي.

دوی شکايت درلود چې د دې ولسوالۍ د سيمه ييزو پوليسو قوماندان بلال باچا او د هغه پلار جلال باچا پر ولسي خلکو ظلمونه کوي بې ګناه يې قتلوي، وهل ډبول ورکوي، مالونه يې لوټي او نورې ناقانونه کړنې ترسره کوي.

د دوی په خبره، څو ځلې يې ولايتي ادارې، امنيې قوماندانۍ او حتی ولسمشرۍ ماڼۍ ته له دغو کسانو شکايت کړی، خو چا يې پر وړاندې اقدام نه دی کړی؛ نو ځکه يې د خپل حق غوښتنې لپاره مظاهره وکړه.

د ننګرهار د والي وياند عطاءالله خوږياڼي د وږي په ۲۱مه پژواک اژانس ته وويل چې د شينوارو د مظاهره کوونکو د غوښتنو په غبرګون نن د پوليسو له لوري د اچين ولسوالۍ د سيمه ييزو پوليسو مشر بلال باچا او د هغه دوه وروڼه ميرويس او جليل نيول شوي دي.

هغه زياته کړه، يو ځل وړاندې هم د خلکو د نيوکو په غبرګون بلال باچا نيول شوی و، خو چا پرې کومه عريضه، اسناد وړاندې نه کړل؛ نو ځکه بېرته خوشې شو.

په همدې حال کې د ننګرهار د ولايتي شورا مرستيال عبيدالله شينواری وايي چې د شينوارو ولسونه يوازې د بلال باچا او د هغه د وروڼو په نيولو بسنه نه کوي.

هغه پژواک اژانس ته وويل، د ننګرهار امنيه قوماندان، د دغه ولايت نظامي څارنوال او د مرکز څخه د نظامي څارنوالۍ د راغلي پلاوي مشر هم بايد ونيول شي؛ ځکه دغو کسانو د موضوع د څېړلو مسئوليت پر غاړه اخېستی و؛ خو د بلال باچا او د هغه د پلار جلال باچا پر وړاندې يې هېڅ اقدام ونکړ.

بلخوا قومي مشر ملا جان شينواری هم وايي چې د بلال باچا په نيول کېدو ستونزه نه حلېږي او بايد پلار يې جلال باچا هم ونيول شي.

هغه پژواک ته وويل: ((موږ تر اوسه معلومات نه لرو چې بلال باچا نيول شوی او که نه؛ ځکه موږ ته نه دی ښودل شوی، خو اصلي خبره دا ده چې جلال باچا بايد ونيول شي، هغه داسې جابر او ګناهګار سړی دی چې ټول قتلونه او ظلمونه هغه کړي، اصلي مجرم خو هغه دی.))

دی زياتوي تر هغه وخته د لارې د خلاصون په اړه هم پرېکړه نه کوي، څو چې د دوی اصلي غوښتنه (د جلال باچا نيول کېدل) نه وي منل شوې.

په ولسي جرګه کې د ننګرهار د خلکو استازى حاجي حضرت علي وايي چې د شينوارو خلکو څو ځلې د ياد قوماندان په اړه ننګرهار او کابل کې شکايتونه وکړل، خو چا يې خبرو ته ارزښت ورنه کړ.

هغه چې نن يې په ولسي جرګه کې خبرې کولې، زياته کړه، د سيمه ييزو پوليسو ياد قوماندان د نشه يي توکو په قاچاق، په نا امنيو او د صرافانو په تښتولو کې لاس لري.

د نوموړي په وينا، بلال باچا پخوا په ننګرهار کې د پاکستانيو طالبانو د ډلې لشکر اسلام د قوماندان منګل مرستيال هم و.

حضرت علي وويل، پرون يې د کورنيو چارو له وزير سره د ليدنې پر مهال د ياد قوماندان له دندې د لرې کولو او محاکمه کولو غوښتنه وکړه، خو د ننګرهار امنيه قوماندان د کورنيو چارو وزير ته په ټيلېفوني کې وويل چې بلال پاچا په ننګرهار کې د حکومت پياوړى ملاتړى دى.

جلال باچا د اچين ولسوالۍ د سيمه ييزو پوليسو عمومي مشر او زوی يې بلال باچا د سيمه ييزو پوليسو قوماندان دی، دوى په اصل کې د کونړ اوسېدونکي وو، خو بيا ننګرهار ته کډه شوي او همدلته مېشت دي.

جلال پاچا پخوا د منګل باغ په مشرۍ د پاکستانيو طالبانو د ډلې مرستيال و.

شاوخوا درې کاله وړاندې د ملي امنيت په هلو ځلو د سولې له پروسې سره يو ځای شول او اچين ولسوالۍ کې د سيمه ييزو پوليسو په ليکو کې وګومارل شول.

د يادولو ده، څو ځلې وړاندې هم د شينوارو قوم خلکو په اچين ولسوالۍ کې د جلال باچا او بلال باچا له کړنو شکايتونه کړي وو، خو حکومتي ادارې يې پر وړاندې ګټور ګام نه و پورته کړی.

ورته راپورونه:

نظر ورکړئ

اعلانونه

Advertisement