کابل (پژواک، ٢٧ وږی ٩٧): د افغانستان د سوداګرۍ وزارت د ۳۲ سلنه صادراتو د زیاتېدو او د افغان او هندي سوداګرو تر منځ د ۳۰۰ هوکړه لیکونو د لاسلیک خبر ورکړ او ويې ویل، ډېر ژر به له لاجورد لارې د افغانستان د سوداګریزو مالونو ټولګه اروپا ته صادره شي.
د هند او افغانستان تر منځ د پانګونې او سوداګرۍ دویم نړیوال نندارتون د وږي په ۲۰ په ممبي کې جوړ شو چې ۳۰۰ افغان سوداګرو لسګونه قلمه کرنیز محصولات او لاسي صنایع لکه غالۍ، زېورات او نور نندارې ته ایښي و.
د یاد وزارت مالي او اداري مرستیال اجمل حمید عبدالرحیمزي نن په کابل کې یوې خبري ناستې ته وویل چې په دې نندارتون کې د افغان او هندي سوداګرو تر منځ د ۳۰۰ ميلیون امریکايي ډالرو په ارزښت ۳۰۰ سوداګریز هوکړه لیکونه لاسلیک شوي دي.
نوموړي د یادو هوکړه لیکونو په اړه جزيیات ورنه کړل خو ویې ویل، د دغو هوکړه لیکونو له مخې د افغانستان محصولات د هند بېلا بېلو سیمو ته وړل کېږي.
صادرات
د عبدالرحیمزي په خبره، د افغانستان صادرات د روان مالي کال په لومړیو شپږو میاشتو(د ۱۳۹۶ کال د مرغومي له لومړۍ تر اوسه) کې د تېر کال د همدې مودې په پرتله ۳۲ سلنه زیات شوي دي.
د سوداګرۍ وزارت د معلوماتو له مخې، افغانستان د روان مالي کال په لومړیو شپږو میاشتو کې د ۴۷۷ ميلیون امریکايي ډالرو په ارزښت صادرات درلودل په داسې حال کې چې په تېر ټول کال کې دغه شمېره ۷۸۷ ميلیون ډالرو ته رسېږي.
د لاجود لار
د سوداګرۍ وزارت اداري او مالي مرستیال وویل، د لاجورد د ترانزیټي لارې د هوکړه لیک له مخې تر راتلوونکې یوې میاشتې له افغانستان څخه اروپا ته په امتحاني ډول سوداګریز مالونه صادرېږي.
د لاجورد ترانزیټي لارې هوکړه لیک د تېر کال په لړم میاشت کې د افغانستان په اړه د سیمه ییزو همکاریو په اووم کنفرانس کې د افغانستان، ترکیې، ترکمنستان، اذربایجان او ګرجستان د بهرنیو چارو وزیرانو تر منځ لاسلیک شو.
د راپورونو له مخې، د دې هوکړه لیک اغېزمن عملي کېدل د ترانسپورټي بنسټونو د اسانه کولو، د ګمرکونو د همغږه کېدو د بهیر چارې، د سوداګرۍ زیاتېدل، د هغو هېوادونو د اوسېدونکو تر منځ چې له دې هوايي دهلېز څخه ګټه اخلي د اقتصادي اړیکو د پراخېدو او کار رامنځته کېدو لپاره زمینه برابروي.
د سرچینې د معلوماتو پر بنسټ، دغه دهلېز د افغانستان له تورغونډۍ او اقینه بندرونو څخه پیل او د ترکمنستان له ترکمنباشي بندر سره تړلی دی.
د افغانستان سوداګریز مالونه د خزر له بحیرې څخه تر تېرېدو وروسته د اذربایجان هېواد باکو بندر ته او له هغه ځایه د ګرجستان د باتومي او بوتي او د ترکیې د قارس بندر ته وروسته بیا د کښتيو په وسیله اروپايي هېوادونو او بالکان ته انتقال شي.
د خپلواکو بنسټونو د څېړنو په اساس، دغه مسیر چې تاریچه یې تر دوه زره کلونو رسېږي د ابرېشم لارې اساسي مسیر و. په هغه وخت کې د لاجوردو په ګډون د افغانستان قېمتي ډبرې د بدخشان له کانونو له همدې لارې اروپا، بالکان او د مديترانې سواحلو هېوادونو ته صادرېدې.
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن