د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د کرکټ بورډ نوى رييس معرفي شو

د کرکټ بورډ نوى رييس معرفي شو

Sep 19, 2018 - 16:49

کابل (پژواک، ٢٨ وږى ٩٧) : د کرکټ بورډ نوى رييس عزيز الله فضلي وايي چې ددغې ادارې ټول تشکيل له سره ارزول کېږي.

فضلي چې د ولسمشر ديوه حکم له مخې د افغانستان کرکټ بورډ د نوي عمومي رييس په توګه ټاکل شوى ، نن د وږي په ٢٨مه، د يو  لړ مراسمو په ترڅ کې د يادې ادارې کارکوونکو ته ور وپېژندل شو.

په دې مراسمو کې د کرکټ بورډ پخوانى رييس عاطف مشعل، ددې اداري کارکوونکو، د ملي امنيت شورا مرستيال او ځينو نورو چارواکو او  خبريالانو برخه اخيستې وه.

فضلي له ولسمشر څخه مننه وکړه چې ستر مسووليت يې  ورته وسپاره، خو ژمنه يې وکړه چې تر خپله وسه به خدمت کوي.

نوموړي له عاطف مشعل څخه مننه وکړه چې په تېرو دوو کلونو کې يې دلته مديريت وکړ او يو ښه بنسټ يې پرېښود.

د کرکټ بورډ نوي مشر وويل، رياست يو امتياز نه دى، بلکې يو مسووليت او پر اوږو ستر بار دى  چې دى به يې په ښه توګه د ترسره کولو هڅه کوي.

هغه زياته کړه، هر مسوول چې راځي د ځان لپاره تګلاره جوړوي، دى هم د يوې تګلارې له مخې راغلى او همدا به پلې کوي.

نوموړي وويل،په لومړي سر کې به  د کرکټ بورډ ادارې ټول تشکل ارزوي او له سره کتنه به پرې کوي.

د يادونې ده چې پر کرکټ بورډ ا دارې دا نيوکه کېده چې تر حده زيات کارکوونکي لري او ډېرى کسان د خپلوۍ او واسطې په اساس ګومارل شوي دي.

د کرکټ بورډ پخواني رييس عاطف مشعل بيا د خپلو لاسته راوړنو او مديريت په اړه معلومات وړاندې کړل.

هغه زياته کړه،په اداره کې بايد له ګروپونو جوړولو څخه ډډه وشي، ځکه چې د هغه په وينا، دا کار بيا ستونزې جوړوي.

نوموړي نوي رييس ته ځينې سپارښتنې هم وکړ چې ټول تمرکز د کرکټ اسيايي جام، نړيوال او افغان غوره ليګ ته وکړي.

د مشعل په وينا، افغانستان اوس بشپړ غړيتوب ترلاسه کړى او په نړيوال جام کې بايد ښې لاسته راوړنې ولري.

عزيز الله فضلي له تېرو ١٥ کلونو راهيسې د افغانستان کرکټ بورډ په بېلا بېلو برخو کې دندې ترسره کړې دي.

د يادونې ده چې شاوخوا يو کال او لس مياشتې مخکې عاطف مشعل د افغانستان کرکټ بورډ د مشر په توګه ټاکل شوى و.

څو ورځې مخکې د افغانستان غوره ليګ کې د ځينو ملي لوبغاړو د نه اخيستل کېدو له امله پر مشعل او کرکټ بورډ ځينې نيوکې وشوې، د نور علي او شاه پور ځدراڼ په ګډون ځينو ملي لوبغاړو چې له ياد ليګ څخه پاتې شوي وو،شکايت او اعتراض کړى و.

د دغو ملي لوبغاړو تر اعتراضونو وروسته په ټولنيزو شبکو کې په پراخه کچه د کرکټ پر مسوولينو نيوکې وشوې.

د مشعل د واکمنۍ پر مهال د کرکټ بورډ شاوخوا ٢٥ مديرانو او نورو کارکوونکو د احتجاج په توګه استعفاوې ورکړې وې او په يو شمېر ولايتونو کې لاريونونه هم شوي وو.

ورته راپورونه:

نظر ورکړئ

اعلانونه

Advertisement