د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د مشرانو جرګې ځينو غړو هوايي بریدونو کې د ملکي وګړو د وژلو په مخنیوي ټینګار وکړ

د مشرانو جرګې ځينو غړو هوايي بریدونو کې د ملکي وګړو د وژلو په مخنیوي ټینګار وکړ

Sep 25, 2018 - 18:18

کابل (پژواک، ٣ تله ٩٧): د مشرانو جرګې یو شمېر غړو په ټاکنو کې د بایومټریک سیستم کارول وستایل، په هوايي بریدونو کې یې د ملکي وګړو د وژنې په مخنیوي ټینګار وکړ او ویې ويل، په کابل ښار کې یو شمېر بلند منزلونه د رشوت ورکولو په بدل کې جوړېږي.

په ټاکنو کې د بایومټریک سیستم کارول

یو شمېر سیاسي ګوندونو د نورو غوښتنو تر څنګ د یوې طرحې په وړاندې کولو د ټاکنو په بهیر کې د بایو مټریک سیستم د استفاده کولو غوښتنه وکړه.

د ټاکنو خپلواک کمېسیون د روان کال د وږي په ۳۱ مه اعلان وکړ چې د بایومټریک سیستم د کارولو په اړه د دغه کمېسیون څېړنې ۷۰ سلنه مخته تللې او پایلې به یې په راتلوونکو ورځو کې اعلان کړي.

د مشرانو جرګې ځينو غړو په ټاکنو کې د بایومټریک سیستم د کارولو د هرکلي تر څنګ له حکومت او ټاکنو کمېسیون څخه وغوښتل چې د هغو نوماندانو د لاسوهنې او ګټه اخیستنې مخنیوی دې وکړي چې خپلوان یې په دولت کې کار کوي.

د مشرانو جرګې غړي غیرت بهیر د دغې جرګې په نننۍ ناسته کې په ټاکنو کې د بایومټریک سیستم د کارولو د هرکلي تر څنګ وویل، دا د ټاکنو د شفافیت لپاره د سیاسي ګوندونو او مدني حرکتونو وړاندیز و او د یادې طرحې پلي کول د ټاکنو روڼتيا ضمانت کوي.  

هغه وايي، شاوخوا یوه میاشت مخکې هغه شرکت چې په ټاکنو کې د بایومټریک سیستم پلی کوي د سیاسي ګوندونو په استازیتوب په کابل کې معلومات ورکړل چې له دې سیستم څخه په استفاده هېڅ کس دویم ځلي رایه نه شي ورکولی.

د مشرانو جرګې لومړي منشي محمد علم ایزدیار د ټاکنو له کمېسیون څخه وغوښتل چې له بایومټریک سیستم څخه د استفادې او د دې طرحې په کارولو د ټاکنو د شفافیت د څرنګوالي په اړه خلکو ته معلومات ورکړي.

نوموړي دغه راز د ټاکنو له کمېسیون څخه وغوښتل چې خلکو ته دې په دې تړاو پوهاوی ورکړل شي، ځکه په ټاکنو کې د بایومټریک سیستم کارول د افغانانو لپاره نوې تجربه ده.

د یادې جرګې غړې طیبې زاهدي له حکومت او د ټاکنو کمېسیون څخه وغوښتل چې هېچا ته دې اجازه نه ورکوي چې د ټاکنو په بهیر کې لاسوهنه وکړي او له دولتي امکاناتو څخه د کاندیدانو په ګټه کار واخلي.

نوموړې له جزيیاتو پرته ادعا وکړه چې په عملي ډول د پوهنې او لوړو زده کړو له بنسټونو د یو شمېر نوماندانو په ګټه کار اخیستل پیل شوي او باید د دغه کار مخنیوی وشي.

د مشرانو جرګې رییس فضل هادي مسلمیار هم د بایومټریک سیستم له کارولو ملاتړ وکړ او هیله مندي یې ښکاره کړه چې د ټاکنو کمېسیون به د ټاکنو د روڼتيا لپاره نور ګامونه هم واخلي.

نوموړی وايي، په ټاکنو کې لاسوهنه د خلکو لپاره د منلو وړ نه ده او حکومت اړ دی چې په ټاکنو کې د یو شمېر کاندیدانو په ګټه د دولتي چارواکو د ګټه اخیستو مخنیوی وکړي.

هوايي بریدونه

د راپورونو په اساس په وروستیو پنځو ورځو کې د پکتیا په څمکنيو ولسوالۍ، د ننګرهار په شېرزادو ولسوالۍ، د لغمان په بادېښ ولسوالۍ، د میدان وردګو په جغتو ولسوالۍ او د کاپیسا په تګاب ولسوالۍ کې په ټولیز ډول ۴۹ ملکي وکړي وژل شوي او ۱۴ نور ټپیان دي.

په مشرانو جرګه کې د کاپیسا د خلکو استازي مولوي محی الدین منصف په هوايي بریدونو کې د ملکي وګړو وژنې ته په اشاره وویل چې دا ډول بریدونه د دولت او ملت تر منځ فاصله زیاتوي او دوام یې د افغانستان د دولت پر زیان دی.

هغه په مشخصه توګه د تګاب برید ته اشاره وکړه او ویې ویل، په دغه برید کې ملکي وګړي موخه ګرځېدلي او دغه قضیه باید په جدي توګه وڅېړل شي.

د جرګې بل غړی غیرت بهیر وايي، شپني عملیات په ټولیز ډول په پټو سترګو ترسره کېږي او دغه ډول عملیات باید ژر تر ژره ودرول شي.

د مشرانو جرګې یو شمېر نور غړي هم له حکومت څخه جدي غوښتنه کوي چې د ملکي وګړو د مرګ ژوبلې مخنیوى دې وکړي.

د مشرانو جرګې رییس په دې اړه وویل: (( د شپې عملیات د ملت پر وړاندې په کورکورانه ډول تر سره کېږي نه د افغانستان د دښمنانو پر وړاندې، دغه کار د حکومت او ملت تر منځ د فاصلې د زیاتېدو لامل ګرځي.))

دی وايي چې د ځانګړې قطعې له لوري د شپنیو او هوايي بریدونو پر وړاندې د امنیتي ارګانونو چوپتیا دا روښانه کوي چې له ملت سره ظلم شوی او دا ظلم دوام لري.

نوموړي امنیتي ارګانونو ته په خطاب کې وویل: ((که تاسو«امنیتي ځواکونه» دغه ډول عملیات ترسره کوئ، نو د مهربانۍ له مخې ورته بیاکتنه وکړئ، که تاسو د لاس اله یاست نو لطفا ملت ته ځواب ورکړئ.))

خپل سري بلند منزلونه

په مشرانو جرګه کې د کابل د خلکو استازي فرهاد سخي ادعا وکړه چې د کابل ښار د استوګنې په سیمو کې یو شمېر بلند منزلونه په خپل سر او د اړونده ادارو کارکوونکو ته په رشوت ورکولو جوړ شوي دي او خلک نه شي کولی چې د استوګنې په سیمو کې د بلند منزلونو له امله په خپلو کورونو کې خوندي ژوند وکړي.

دی وايي، د استوګنې د کورونو په منځ کې د بلند منزلونو جوړېدل یو کلتور جوړ شوی او د دا ډول بلند منزلونو د جوړېدو لپاره هېڅ اداره وجود نه لري.

د یادې جرګې بل غړي احمد یوسف نورستاني هم د استوګنې په سیمو کې د بلند منزلونو په جوړېدو نیوکه وکړه او ويې ویل، د کابل ښاروالي باید د استوګنې په سیمو کې د بلند منزلونو جوړېدو ته اجازه ورنه کړي.

د یادې جرګې ځينې نورو غړو هم د استوګنې په سیمو کې د بلند منزلونو د خپل سرانه جوړېدو د مخنیوي غوښتنه وکړه.

د مشرانو جرګې رییس فضل هادي مسلمیار هم د استوګنې په سیمو کې د خپل سرانه بلند منزلونو په جوړېدو نیوکه وکړه او ویې ویل، دی هم په دې برخه کې مظلوم پاتې شوی، ځکه د نوموړي د کور تر څنګ چې په تایمنیو سیمه کې موقعیت لري یو بلند منزل جوړ شوی او دی نه شي کولی له کور نه استفاده وکړي.

د هغه په خبره، یو شمېر دغه بلند منزلونه چارواکو ته د رشوت ورکولو په بدل کې جوړېږي.

د کابل ښاروالۍ سرپرست نن مشرانو جرګې ته بلل شوی و چې د خپل سرو بلند منزلونو د جوړېدو او په کابل ښار کې د ځينې نورو ستونزو په اړه دې جرکې ته وضاحت ورکړي، خو جرګې ته نه و راغلی.

د مشرانو جرګې رییس دې جرګې ته د کابل د ښاروالۍ د سرپرست د نه راتلو په غبرګون کې وویل، د کابل ښاروالۍ سرپرست مشرانو جرګې ته بې احترامي وکړه او هغه به څارنوالۍ ته ور وپېژني.

ورته راپورونه:

نظر ورکړئ

اعلانونه

Advertisement