کندهار (پژواک، ٧ تله ۹۷): په کندهار کې راتلونکو ټاکنو ته نه یوازې د ښځینه کاندیدانو شمېر کم دی، بلکې په ټولیزه توګه په دغه ولایت کې په ټاکنیزو فعالیتونو کې د ښځو ونډه کمرنګه ده او په پنځو ولسواليو کې ښځو هېڅ نوم ليکنه نه ده کړې.
د ډېرو په اند، دغه حالت ډېر لاملونه لري چې نا امنۍ، ناوړه دودونه او د خلکو ناسم ذهنیتونه یې په سر کې راځي.
په کندهار کې د راتلونکو پارلماني ټاکنو لپاره ۱۱۲ کسانو ځانونه کانديد کړي چې له ډلې یې ۱۲ ښځې دي.
خو دا ستونزه يوازې تر دې محدوده نه ده، بلکې په دغه ولایت کې د رایې ورکولو په برخه کې هم د ښځو برخه اخیستنه کمرنګه وي.
په کندهار کې د راتلونکو پارلماني ټاکنو لپاره ټولټال ۵۶۷ زره کسانو نوم لیکنه کړې چې ۷۳ زره يې ښځې دي، په داسې حال کې چې د دغه ولایت نفوس له دوه میلیونه ډېر ښودل کېږي چې نیمايي ښځې دي.
ان په کندهار کې داسې ولسوالۍ هم شته چې ښځو په کې هېڅ نوم لیکنه نه ده کړې.
له کندهاره پارلماني ټاکنو ته کاندیده ډاکتره عزیزه وايي، له بده مرغه د هېواد د ډېرو ولایتونو په پرتله په دغه ولایت کې نه یوازې په ټاکنیزو فعالیتونو، بلکې په ګڼو ټولنيزو چارو کې د ښځو ونډه کمه ده.
دا زیاتوي، د ښځو د کار او فعالیت پر وړاندې تر ټولو جدي ننګونه نا امني او د ټولنې ناسم ذهنیت او چلند دی چې هغوی یې د ژوند پر ډېرو ډګرونو شا ته پرېیښې دي.
دې وویل، لومړی دلته د سواد کچه ټیټه ده، خو هغه لږ شمېر مېرمنې چې لوستې دي او غواړي په ټاکنو او یا نورو علمي او ټولنیزو فعالیتونو کې ونډه واخلي د نا امنۍ او نورو دودیزو مسایلو له امله دغه کار نه شي کولای.
د عزيزې په باور، په دغه ولایت کې شته ستونزو ته په کتو یې لوی جرئت کړی چې ځان یې پارلمان ته
کاندید کړی، په داسې حال کې چې کورنۍ او دوستان یې هر وخت د سر د ساتلو ورته وايي.
دې وویل، په دغسې یوه حالت کې به دا څنګه کمپاین وکړي او یا د ښځو منځ ته ورشي او له هغوی رایې وغواړي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن