د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د قهرمان وژنه په پراخه کچه وغندل شوه

د قهرمان وژنه په پراخه کچه وغندل شوه

Oct 17, 2018 - 17:00

کابل (پژواک،٢٥تله٩٧): د ولسي جرګې غړي او نوماند عبدالجبار قهرمان  وژنه  په پراخه کچه وغندل شوه .

قهرمان، نن سهار د هلمند ولايت په مرکز لښکرګاه کې د  خپل کمپاين دفتر کې د يوې چاودنې له امله ووژل شو.

له ارګ څخه د تلې په ٢٥مه، پژواک خبري اژانس ته په يوه رالېږل شوې خبرپاڼه کې راغلي  چې ولسمشر دغه بريد غندلى او د قهرمان په وژنه يې ژوره خواشيني څرګنده کړې ده.

هغه زياته کړه، قهرمان د هېواد يو رښتينى بچى و  او تل يې د هېواد د ښيرازۍ او د هېواد والو د ښه راتلونکي لپاره يې فکر کاوه.

ولسمشر ويلي، ترهګر او د هغوى پلويان له دا ډول بريدونو سره نه شي کولى چې د خلکو غرور او باور له منځه يوسي.

اشرف غني اړوندو امنيتي مسوولينو ته د قهرمان د وژلو د پېښې د جدي څېړلو امر کړى دى.

د يو بل خبر له مخې، د حکومت اجراييه ډاکټر عبدالله عبدالله هم د قهرمان په وژنه خواشيني ښودلې او دا کار يې غندلى دى.

هغه زياته کړې : (( هلمند نن یو صادق بچی په یوه نه بښونکي جنایت کې له لاسه ورکړ.))

عبدالله ويلي، د دې برید موخه که له یوې خوا د ولسي جرګې د غړي وژل و، خو له بلې خوا د افغانستان دښمنان غواړي چې په دې ‌‌‌‌‌‌ډول بریدونو سره د ټاکنو روان بهیر له خنډونو سره مخ او خلک په کې له ګډون کولو وګرځوي.

هغه زياته کړې، د ملي یووالي حکومت که د سولې دروازه پرانيستې خو ورسره د ترهګرو د ځپلو او له خپلو خلکو د دفاع لپاره هم هڅې کوي.
عبدالله ويلي، افغانان په دې ‌‌‌‌‌‌ډول بریدونو سره وېرېدلی او ماتېدلی نه شي، بلکې د ترهګرو د شومو موخو د لا بربنډولو لامل ګرځي.
هغه زياته کړې، د دې برید په اړه څېړنې پيل شوي او افغان امنیتي ځواکونه چمتو دي چې د ټاکنو امنیت هم ټينګ کړي.

د افغانستان د ملي امنیت شورا دفتر هم ولسي جرګې ته د نوماند، ملي شخصیت عبدالجبار قهرمان پر ټاکنیز دفتر ترهګریز بریدپه کلکه غندلى دى.

د ملي امنيت سلاکار ډاکټر حمدالله محب ويلي، په داسې حال کې چې هېواد یوه ملي بهیر ( ولسي جرګې ) ټاکنو ته نږدې شوی دی، دغه ترهګریز برید وښوده چې ترهګریزې او بنسټپاله ډلې پر هېڅ ولسواکې پروسې باور نه لري.

هغه زياته کړې، د افغانستان دښمنان باید پوه شي چې د ټولنې د ملي او تاثیر لرونکو شخصیتونو هدف ګرځول نه شي کولی ولسواکي له ننګونو سره مخ کړي.

محب وايي، عبدالجبار قهرمان تل له نظام او د هېواد له امنیتي او دفاعي ځواکونو د ملاتړغږ پورته کړی و او عملآ يې له ځمکنۍ بشپړتیا د دفاع تر څنګ، د بې عدالتیو، ننګونو په ځانګړې ډول د افغانستان د سولې او امنیت دښمنانو پر وړاندې جدي دریځ درلود.

د سيمه ييزو ارګانونو د خپلواکې ادارې مشر متين بيګ ويلي، جبار قهرمان د هېواد له اصيلو بچيو څخه يو و چې د خاورې او وطن دښمنانو وواژه.

هغه زياته کړې : (( زموږ دښمنان هڅه کوي چې په دغسې توطيو او دسيسو باندې د ټاکنو روان بهير اغېزمن کړي او خلک ووېروي چې په دغه پروسه کې برخه وا نه خلي. ))

بيګ ويلي، د خپلو ملګريو او مشرانو د وينو غچ به د رایې ورکولو مرکزونو ته  په تګ اخلي او په دې اړه د دښمن دسيسې او پلانونه شنډوي.   

د کورنيو چارو وزير، د ملي دفاع وزير او ګڼ شمېر ملي او سياسي مشرانو او چارواکو هم د قهرمان وژنه غندلې ده.

نښه: 

ورته راپورونه:

نظر ورکړئ

اعلانونه

Advertisement