د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

" کمېسيون د ولسي جرګې ټاکنو په سم مديريت کې پاتې راغلى"

" کمېسيون د ولسي جرګې ټاکنو په سم مديريت کې پاتې راغلى"

Oct 21, 2018 - 17:18

کابل (پژواک، ٢٩ تله ٩٧): ټاکنيزبنسټونه او د څو ولايتونو اوسېدونکي وايي چې د ټاکنو کمېسيون د ولسي جرګې ټاکنو په سم مديريت کې پاتې راغلى دى.

پرون له کندهار او غزني پرته په نورو ٣٢ ولايتونو کې د ولسي جرګې ټاکنې ترسره شوې، که څه هم د خلکو ګڼه ګوڼه او لېوالتيا ډېره وه، خو د کمزسيون د ناسم مديريت له امله دغې پروسې ډېرې ستونزې لرلې، چې له امله يې ټاکنې دويمې ورځې ته وغځېدې.

د هېواد د بېلا بېلو سيمو اوسېدونکی د ټاکنو پر کمېسيون نيوکه کوي چې خپل مسووليت يې په سمه توګه نه ده ترسره کړى.

د بلخ ولايت د مزار شریف اوسېدونکې مریم چې تېره ورځ یې د ښار په فاطمه بلخي ټاکنیز مرکز کې رایه کارولې، پژواک خبري اژانس ته وويل، پرون د ورځې په پیل کې یو لړ تخنیکي ستونزې وې چې وروسته حل شوې او د ټاکنو بهیر په عادي ډول ترسره شو.

نوموړې له بایومټـریک سیستم سره د ټاکنو کمېسیون یو شمېر کارکوونکو نه بلدتيا په دغې ملي پروسه کې د یو لړ بې نظمیو لامل بولي.

د هغې په خبره، د تېرو دورو ټاکنو کې به په دغه مرکز کې ډېره درغلي ترسره کېده او تکراري رایې به کارېدلې؛ خو دا ځل د بایومټریک سیستم په وسیله د یادې ستونزې مخه نیول شوې وه.

د بلخ د چهاربولک ولسوالۍ اوسېدونکی نجیب الله چې نوم ليکنه یې کړې، خو رایه یې نه ده کارولې، وایي چې ترسره شوې ټاکنې نمایشي وې.

هغه پژواک ته وویل چې په ولسوالۍ کې یې باید ۱۳ مرکزونه د ټاکنو ترسره کېدو لپاره پرانیستل شوي وای، خو کمېسیون یواځې دوو مرکزونو ته ټاکنیز مواد وړي و او یواځې همدا دوه مرکزونه پرانیستي وو.

د ده په خبره، د ټاکنو کمېسیون د ناسم مدیریت له امله د ده په څېر سلګونه کسان له رايې ورکولو محروم شول.

د کندوز يو شمېر اوسېدونکي وايي، ټاکنې په دې ولايت کې له ننګونو ډکې وې، په ډېرو سيمو کې تخنيکي ستونزې وې او ټاکنيز مواد هم په وخت نه وو  رسول شوي.

د دې ولايت  يو مدني فعال عنايت الله خليق وايي، د ټاکنو کارکوونکي هم ښه نه وو روزل شوي او ډېرى يې د بايومټرک ماشين پر کارولو هم نه پوهېدل.

د اروزګان اوسېدونکى شريف الله وايي، هغه ډول چې تمه کېده، خلکو په رايه اچونه کې ګډون ونه کړ، ځکه د دغه ولایت په کچه څه باندې ۶۰ زره سټېکرونه وهل شوي وو، خو خلکو لږه رایه وکاروله. هغه د دې کار لامل د کمېسيون ناسم مديريت په ګوته کړ.

د ننګرهار د بهسودو ولسوالۍ اوسېدونکی ملک بختيار وايي، دغه ولايت کې د ټاکنو کمېسيون هغسې چې ورته په کار وه، نه يې چمتووالی نيولی و او نه يې هم تېره ورځ چارې سمې مخ ته وړې دي.

د هغه په خبره، ډېرو مرکزونو ته ټاکنيز مواد پوره نه و رسېدلي، د ثبت په کتابونو کې د خلکو نومونه نه و، بايومټريک الې ډېرو مرکزونو کې خرابې وې او حتی د ټاکنو کارکوونکي هم له کار سره سم بلد نه و.

د لغمان ولايت اړوند د بصرام سيمې اوسېدونکی کاوش ننګيال وايي، د ټاکنو ډېرو مرکزونو ته کارمندان له خپل ټاکلي وخته ډېر وروسته رسېدلي و او کار يې هم ډېر پر وخت پای ته رسولی دی.

بلخوا د نورستان ولايت اوسېدونکي نعمت الله پژواک ته وويل، په لومړيو کې په مرکز پارون کې د کمېسيون کارونه له ستونزو سره مخامخ و، چې ان تر لسو بجو هم ځينو مرکزونو کې پيل نه شول؛ خو وروسته يې چارې منظمې شوې.

د بغلان ولايت د مرکز پلخمري ښار اوسېدونکى عبدالوکيل وايي، ټاکنو ته يې ډېره هيله وه، خو د کمېسيون له خوا د ناسم مديريت له امله يې تنده ماته نه شوه.

هغه پژواک اژانس ته وويل، د ټاکنو مامورين په وخت رانه غلل، چې له امله يې پروسه په ځنډ سره پيل شوه او ډېر خلک له رايې اچولو پاتې شول.

دى وايي، په ډېرو مرکزونو کې  رايې ورکوونکو د ثبت په کتاب کې نومونه پيدا نه کړل.

خو نوموړي په ټاکنو کې د خلکو د ګډون او لېوالتيا ستاينه وکړه.

د خوست مرکز اړوند د متون اوسېدونکی بشيرالله وايي، د نورو ټاکنو په پرتله د ولسي جرګې سږنۍ ټاکنې شفافې وي او وايي، که د ټاکنو مرکزي کمېسيون په کې کومه لاسوهنه ونه کړي، نو دا ځل به له دې ولايت څخه ولسي جرګې ته وړ استازي ولاړ شي.

د دې ولايت بل اوسېدونکي سيف الرحمن پژواک ته وويل، ده نه غوښتل چې په دې ټاکنو کې برخه واخلي، خو کله يې چې واورېدل دا ځل به ټول رايه ورکوونکي بايومټريک کېږي، نو بيا يې خپل تصميم بدل کړ، ځکه د بايومټريک له لارې درغلي نه شي ترسره کېدای.

بلخوا ټاکنيزو بنسټونو هم د ولسي جرګې دغه ټاکنې د هېواد په تاريخ کې تر ټولو بې نظمه ټاکنې ګڼلې دي.

د افغانستان د ازادو او عادلانه ټاکنو بنسټ (فيفا) اجرائيوي رييس يوسف رشيد پژواک اژانس ته وويل چې د مديريت له مخې، ټاکنې ډېرې خرابې او بې نظمې وې.

د هغه په وينا، د همدې ستونزې له امله ډېر خلک له رايو پاتې شول او د ټاکنو په مرکزونو کې له ګډوډيو سره مخامخ شوي وو.

رشيد وايي : ((تېره ورځ د ټاکنو بې نظمه ورځ مو تېره کړه.))

نوموړي د ټاکنيزې پروسې ستونزو ته په اشارې سره وويل، د پروسې په کارونو کې ګډوډي، د رايې ورکوونکو وارخطايي، د مديريت کمزوروالى، له بايومټريک سره نااشنايي او ځينې نورې ستونزې وې.

د فيفا مشر وايي، که چېرې کميسيون د رايې ورکوونکو لېستونه دوه اوونۍ مخکې مرکزونو ته لېږلي واى، چې خلکو خپل نومونه چيک کړى واى، نو دومره ستونزې به نه وې.

د هغه په وينا، که چېرې هر مرکز ته يوه اضافي د بايومټرک دستګاه ورکړل شوې واى، نو د يوه خرابوالي پر مهال به له بلې استفاده کېده.

د افغانستان د رڼو ټاکنو ادارې (ټيفا) مشر محمد نعيم ايوب زاده بيا وايي، چې پرون د خلکو لېوالتيا او ګډون بې سارى و او له ګواښونو سره سره خلکو په پراخه کچه په  ټاکنو کې ګډون وکړ.

خو هغه پژواک ته وويل، له بده مرغه د کمېسيون کمزورى مديريت د دې لامل شو، چې له لېوالتيا سره سره ډېرو خلکو په ټاکنو کې ګډون ونه شواى کړاى.

هغه په دې برخه کې د بايومټريک ماشين کې خرابوالى او د کارکوونکو سم نه کارول، د رايې ورکوونکو د لېست نشتوالى او ګډوډي او نورې ستونزې يادې کړې.

ورته راپورونه:

نظر ورکړئ

اعلانونه

Advertisement