د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د حيرتان بندر د تېل پلورونکو ۲۳ ميليونه ډالر نادرکه شوي

د حيرتان بندر د تېل پلورونکو ۲۳ ميليونه ډالر نادرکه شوي

Nov 07, 2018 - 14:44

مزارشريف (پژواک، ۱۶ لړم ۹۷): د بلخ ولايت د حيرتان سوداګريز بندر لسګونه تېل پلورونکي ادعا کوي چې ۲۳ ميليونه امريکايي ډالر يې حيف او ميل شوي دي.

د اوبلن ګاز او تېلو دغه پلورونکي چې شمېر يې ۲۰۰ کسانو ته رسېږي، په حيرتان بندر کې يې د انټر اسيا، دولت زاده ګروپ او حيرتان ترمينل سرويس شرکتونو مخکې د اعتراض خيمې درولې دي.

د حاجي خيرالدين په نوم اعتراض کوونکي پژواک خبري اژانس ته وويل چې د خپل حق ترلاسه کولو لپاره يې اعتراض پيل کړی.

هغه زياته کړه، د ده په ګډون لسګونه تېل پلورونکو د دولت زاده ګروپ مشر حاجي محمد کريم ته ۲۳ ميليونه ډالر ورکړي چې اوس د بېرته ترلاسه کېدو برخه کې له ستونزو سره مخ دي.

نوموړي وويل، د دولت زاده ګروپ مشر حاجي کريم د دوی په پيسو له خپل شريک او د انټراسيا شرکت رييس حاجي حسن سره يو ځای د برګ سبز په نوم شرکت جوړ کړ چې وروسته ياد شرکت مالي زيان وکړ او له ماتې سره مخ شو.

هغه زياتوي چې د برګ سبز شرکت له مالي تاوان او ماتې وروسته، دوی د خپلو پيسو غوښتونکي شول چې د دولت زاده ګروپ مشر حاجي کريم يې د ۴۰ سلنه پيسو ورکړې ته تيار شو او دوی ته يې وويل چې ۶۰ سلنه روپۍ د انټر اسيا شرکت له رييس حاجي حسن سره دي.

حاجي خير الدين وايي: ((زموږ د معاملې لوری د دولت زاده ګروپ مشر حاجي کريم دی، موږ پيسې ده ته ورکړې او ده بيا خپل شريک او د انټر اسيا شرکت له رييس حاجي حسن سره په هماغو پيسو ګډ کاروبار شروع کړی، اوس حاجي کريم موږ ته حاضر دی؛ خو د انټر اسيا شرکت مشر حاجي حسن له مزار څخه کابل ته تللی او موږ سره له خبرو کولو ډډه کوي.))

ده زياته کړه چې حاجي حسن هم مهاله د انټر اسيا رييس او د حيرتان ترمينل سرويس شرکتونو مرستيال دی؛ نو دوی ځکه د يادو شرکتونو مخکې خيمې درولې او دروازې يې ورته بندې کړې دي.

بريالی بري بل معترض دی چې په حيرتان بندر کې يې د تېلو کاروبار کاوه، خو اوس د تحصن خېمه کې ناست دی.  هغه وايي چې ۱۴۰زره امريکايي ډالر يې په دغه جنجال کې ورک دي.

نوموړي پژواک ته وويل: ((دولت زاده ګروپ به له ما څخه ګاز يووړل او راته ويل به يې چې پيسې دې درکوو، تر دې چې ۲۰۰ ټنه ګاز يې راڅخه يووړل او کله چې زه د خپلو پيسو غوښتونکی شوم؛ نو د دولت زاده ګروپ رييس راته وويل، چې زه مې له خپل شريک سره خبره کوم او ستا پيسې درکوم، هماغه و چې تر ننه مې پيسې لاس ته نه دي راغلې.))

د تېلو او ګازو دغه سوداګر وايي چې د دولت زاده ګروپ رييس حاجي کريم ورته ويلي چې په برګ سبز شرکت کې ۴۰ سلنه د ده او ۶۰ سلنه د حاجي حسن سهیم و.

د هغه په خبره، دمګړی حاجي کريم د ۴۰ سلنه پيسو ورکړې ته تيار دی خو د انټر اسيا شرکت رييس له دوی سره خبرو ته نه حاضرېږي.

د بريالي په وينا، دوی د دولت زاده ګروپ له مشر حاجي کريم او برګ سبز شرکت سره معامله کړې او په اړه يې اسناد هم لري.

خو کله چې پژواک خبري اژانس له دغو معترضينو څخه د اسنادو ښکاره کولو غوښتنه وکړه؛ نو څوک حاضر نه شول چې د خپلې معاملې اسناد را وباسي.

نوموړي وړاندې وويل چې دوی اوس خپلې پيسې غواړي او پر دې کار نه لري چې چا څو فيصده ترې وړې دي.

بريالی په ټينګار سره وايي چې د دوی د معاملې لوری حاجي کريم دی خو زياتوي چې خبرو ته د حاجي حسن نه حاضرېدل دا په ډاګه کوي چې نوموړی هم ورسره شريک دی.

بسم الله نظري چې له تېرو شلو کلونو راهيسې په حيرتان بندر کې د تېلو او ګاز کاروبار لري هم د تحصن په دې خېمه کې د اعتراض په ډول ناست دی.

هغه پژواک ته وويل، دغه موضوع يې د بلخ سيمه ييزې ادارې او په ځانګړي ډول د حيرتان ښارګوټي رياست ته وړاندې کړې او د مرستې غوښتنه يې کړې ده.

نوموړی وايي، حکومت ژمنه ورسره کړې چې په دوو ورځو کې به يې ستونزه حل کړي.

نظري وويل، که يې غږ وانه ورېدل شي او خپل حق ترلاسه نه کړي، نو د خپل اعتراض په پراخېدو سره به د حيرتان بندر عمومي لاره وتړي.

هغه هم وايي که حاجي حسن حاضر شي او د خپل ځان سپيناوی وکړي چې په ياده معامله کې ښکېل نه دی؛ نو دوی يې هم د شرکتونو له  دروازو خپلې خېمې ټولوي.

د معترضينو د ادعاوو اصلي لوری او د دولت زاده ګروپ مشر حاجي کريم هم مني چې د تېل پلورونکو پوروړی دی.

نوموړي پژواک اژانس ته وويل چې له تېرو ۷ کلونو راهيسې په حيرتان بندر کې د تېلو او نفتو کاروبار کوي، چې په همدې موده کې له معترضو تېل پلورونکو څخه قرضدار شوی دی.

هغه تاييدوي چې يادې روپۍ ده اخيستې خو زياتوي چې په دغه کار کې د انټر اسيا شرکت مشر او د الکوزي ګروپ استازی حاجي حسن هم ورسره شريک وو.

د حاجي کريم په خبره، د ۲۳ ميليونه ډالرو له جملې څخه ۴۰ سلنه پيسې له ده سره وې او ۶۰ سلنه يې هم له حاجي حسن سره دي چې نوموړی يې بايد تېل پلورونکو ته ورکړي.

د دولت زاده ګروپ مشر دا هم وويل چې حاجي کريم د ده شخصي شريک و او يادې پيسې يې شخصي اکاونټ ته تللې؛ خو زياتوي چې ده د انټراسيا شرکت په اعتبار یې ورسره شراکت کاوه.

نوموړی وايي چې له ده سره د ۴۰ سلنه پور پيسو ورکړې ته تيار دی او په همدې موخه يې خپل ټول جايداد او ذخاير ټاکل شوي کمېسيون ته سپارلي، څو يې معترضينو ته ورکړي.

خو د انټر اسيا شرکت رييس حاجي محمد حسن بيا په ياده قضيه کې خپله ښکېلتيا ردوي.

نوموړي پژواک ته وويل چې له حاجي حسن سره هېڅ ډول معامله او شراکت نه لري او ياده قضيه د خپل ځان او خپلو شرکتونو پر وړاندې دسيسه بولي.

هغه زياته کړه چې د معترضينو د ادعا طرف دی نه دی او نه هم نوموړي ته پيسې ورغلې دي.

حاجي حسن وړاندې وويل چې نوموړی دمګړۍ په مزارشريف کې نشته؛ خو زياته يې کړه چې مدافع وکيل يې همالته دی او که دعوا کوونکي کوم سند لري، نو محکمې ته دې يې وړاندې کړي.

د انټر اسيا شرکت مشر زياتوي چې د شرکت مخکې يې د معترضينو له خوا د خېمو درېدو له امله مالي زيان ور اوښتی او په وينا يې چې د خپل حيثيت اعاده به وکړي.

د هغه په خبره، د معترضو تېل پلورونکو د ادعاوو لوری حاجي کريم دی؛ ځکه په وينا يې چې يادو تېل فروشانو خپله ټوله معامله د دولت زاده ګروپ له مشر حاجي کريم سره کړې او له ده سره يې هېڅ تماس نه درلود.

نوموړی زياتوي چې اوس حاجي کريم مکلف دی څو خپله قرضداري خپله خلاسه کړي.

پژواک خبري اژانس ډېره هڅه وکړه چې د يادې معاملې او د قرضدارۍ د ادعاوو په تړاو که اسناد موجود وي، چې ترلاسه يې کړي؛ په داسې حال کې چې هر لوري په خبرو کې د اسناد د شتون يادونه کوله، خو عملاً يې نه ښکارول.

د حيران بندري ښارګوټي رييس عبدالروف اميري هم وايي چې دغه موضوع له نږدې څاري او د حل لپاره يې يو پلاوی ټاکل شوی دی.

نوموړي پژواک ته وويل چې د معترضينو د معلوماتو له مخې، تېل پلورونکو خپلې پيسې د دولت زاده ګروپ مشر حاجي کريم ته ورکړې چې وروسته بيا د انټر اسيا شرکت رييس حاجي حسن هم ورسره شريک شوی دی.

اميري وايي چې د ياد جنجال د راپيدا کېدو سره سم معترضينو دوی ته خبر نه و ورکړی او دغه رياست يوه اوونۍ وروسته هغه مهال خبر شو چې د انټر اسيا شرکت مشر حاجي حسن له بلخ ولايت څخه وتلی و.

د هغه په خبره، د دوی له خوا ټاکل شوی پلاوی کار کوي چې دغه موضوع ژر تر ژره حل کړي.

نوموړی زياتوي چې د حاجي حسن په حاضرېدو سره به دغه ستونزه حل شي او معلومه به شي چې نوموړی په دې معامله کې دخيل دی او که نه.

د اميري په وينا، سوله ييز اعتراض د هر چا حق دی خو زياتوي چې د پلاوي له څېړنو وروسته به معلومه شي چې څوک په دې معامله کې ښکېل دي او له هغه وروسته به بيا دوی د هغو شرکتونو له مخې خېمې لري کړي چې ياده قضيه کې لاس ونه لري.

د اميري په خبره، د شرکتونو تړل کېدلو او د لسګونه کسانو د وزګارتيا له امله هره ورځ خصوصي سکتور ته زياته اندازه زيان رسېږي چې بايد مخه يې ونيول شي.

د بلخ د والي وياند منير فرهاد هم وايي چې ياد قضيه تر جدي څېړنې لاندې ده او ژر به يې پايلې له رسنيو سره شريکې شي.

نوموړي پژواک ته وويل چې د قضيې له روښانتيا او ولايت مقام ته د ټاکل شوي پلاوي له راپور وروسته به متهمين عدلي او قضايي ارګانونو ته وسپاري.

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan