د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

​معترض نوماندان : د بغلان رايې دې کابل کې وشمېرل شي

​معترض نوماندان : د بغلان رايې دې کابل کې وشمېرل شي

Nov 13, 2018 - 17:02

پلخمري(پژواک، ٢٢ لړم ٩٧): بغلان کې یو شمېر معترض نوماندان په دغه ولایت کې د رایو پر شمېرنې باور نه لري او ټينګار کوي چې رايې بايد کابل کې وشمېرل شي.

دوى وايي چې که دغه غوښتنه يې ونه منل شي، نو د کمېسيون دروازې ترڅنګ به د کابل-شمال لويه لار هم وتړي.

د دغو معترضو نوماندانو له ډلې څخه مولوي عبدالهادي نادم  وویل چې بغلان کې د ټاکنو کمېسیون د رایو د سمې شمېرنې او مدیریت توان نه لري.

هغه وايي: (( څو ورځې وړاندې کمېسيون ويلي و چې يوه جعلي رايه هم نه حسابوي، خو اوس موږ اطلاع ترلاسه کړې چې د زورواکانو ټولې رايې شمېري چې دا موږ ته د منلو نه ده.))

نوموړي د چا نوم ياد نه کړ، خو زياته يې کړه چې د مرکزي بغلان، تاله برفک، اندراب او خوست ولسوالیو کې صندوقونه ډک شوي چې د همدې سیمې نوماندان یې بغلان کې پر شمېرنې ټینګار کوي.

مولوي نادم  زیاتوي، کمېسیون ته یې دوه ورځې وخت ورکړی چې له څلوېښتو د ډېرو معترضو نوماندانو غوښتنې ومني.

د ده په وینا، که تر راتلونکو دوو ورځو یې غوښتنې ونه منل شي د بغلان د ټاکنو کمېسیون دروازه به وتړي.

همدارنګه بل معترض نوماند عبدالصمد حامد پویا هم پژواک ته وویل چې د ټاکنو کمېسیون د ژمنې پر اساس باید پاکې اوناپاکې رايې جلا شي، خو اوس ټولې رايې حسابيږي.

پویا زیاتوي، د بغلان د ټاکنو کمېسیون ته یې په لیکلي توګه د څلوېښت  معترضو نوماندانو غوښتنې ورکړې دي.

هغه وايي: (( که تر سبا پورې يې صندوقونه کابل ته انتقال نه کړل موږ د کمېسيون دروازه او د کابل-شمال لويه لار تړو.))

يو شمېر نورو نوماندانو هم ورته څرګندونې وکړې.

خو د بغلان د ټاکنو کمېسیون ريیس عبدالقاهر وهاب صافي پژواک ته وویل چې د دوى مامورين د کارول شویو رایو د مدیریت پوره توان لري، خو نوماندان په یوه او بله بهانه د رايې شمېرنې پروسه له خنډ سره مخ کوي.

وهاب وویل: (( د معترضو نوماندانو غوښتنې مې له مرکز سره شریکې کړې  دي او زه هم په دې خوښ يم چې صندوقونه د شمېرنې په موخه کابل ته انتقال شي.))

د يادونې ده چې تر دې وړاندې هم بغلان کې معترضو نوماندانو ويلي و چې له بايومټريک پرته رايې بايد حساب نه شي.

ورته راپورونه:

نظر ورکړئ

اعلانونه

Advertisement