ابدالي: که له لنډمهال حکومت سره رښتينې سوله راځي، ملاتړ یې کوم

کابل (پژواک، ٢٤ لړم ٩٧): د ولسمشرۍ احتمالي کانديد او په هند کې پخوانى سفير شيدا محمد ابدالي وايي چې که د موقت حکومت په رامنځته کېدو رښتينې سوله راځي، نو دى يې ملاتړ کوي.

نوموړي په کابل کې له پژواک خبري اژانس سره په يوه ځانګړې مرکه کې وويل چې په تېرو څلورو کلونو کې په هېواد کې ملي يووالى او سوله کمرنګه شوې وه.

هغه زياته کړه چې په همدې موخه افغان ولس او په ځانګړې توګه د لوى کندهار مشرانو ترې غوښتنه وکړه چې له سفارته استعفى ورکړي او د روانو شخړو او ننګونو د مخنيوي لپاره يوه نوې تګلاره او عملي اقدامات پيل کړي.

ابدالي وايي چې له راتګ سره سم يې د لوى کندهار له مشرانو سره ليدنې کتنې وکړې او اوس په کابل کې له سياسي ګوندونو، مدني ټولنې او سياسي ايتلافونو سره ګوري او موخه يې د سولې او ملي يووالي تامينول دي.

دى زياتوي: ((له بده مرغه په تېرو څلورو کلونو کې په هېواد کې ملي يووالى سخت زيانمن شوى دى.))

د هغه په وينا، وروستۍ ناسته يې په کندهار کې له مشرانو سره وه او هغوى ترې غوښتنه وکړه چې ځان کانديد کړي.

ابدالي وايي چې اوس کابل ته راغلى او په دې اړه يې خپلو مشورو ته ادامه ورکړې وه او په پاى کې به وروستۍ پرېکړه کوي.

ده وويل چې د ولسمشرۍ پر ټکټ يې هم مشورې روانې دي او که چېرې يې توافق وکړ نو په ټکټ کې به يې ټول اقوام شامل وي، څو په هېواد کې ملي يووالى تضمين شي.

هغه د خپل ټکټ د مرستيالانو په اړه وويل، دا له وخته مخکې خبره ده، په دې اړه مشورې روانې دي.

هغه  د ټاکنو پر کمېسيون نيوکه وکړه چې  د ولسي جرګې د تېرو ټاکنو پر مهال يې ډېرې تېروتنې وکړې چې له امله يې پر کمېسيونونو د خلکو باور کمرنګه شوى دى.

ابدالي وايي چې په تېرو ټاکنو کې د خلکو شکايتونه ډېر وو او هيله يې څرګنده کړه چې په ولسمشريزو ټاکنو کې ستونزې تکرارې نه شي.

نوموړي هيله څـرګنده کړه چې حکومت او کمېسيون د خلکو شکايتونو ته ځواب ووايي، اصلاحات رامنځته کړي خو که ځواب ونه ويل شي نو پر کمېسيون به د خلکو باور نور هم خراب شي.

login or register a new account.