محمودراقي- کابل (پژواک، ١٢ لېندۍ ٩٧): وسله والو طالبانو ادعا کړې ده چې د کاپيسا په تګاب ولسوالۍ کې يې د بهرنيانو يوه چورلکه ويشتلې، خو ناټو وايي چې هلته د افغان ځواکونو يوې چورلکې بېړنۍ ناسته کړې ده.
د وسله والو طالبانو وياند ذبيح الله مجاهد د لېندۍ په ١٢مه رسنيو ته په يوه استول شوې خبرپاڼه کې ادعا کړې ده چې تېره شپه د عملياتو پر مهال د کاپيسا په تګاب ولسوالۍ کې يې د امريکايانو يوه چورلکه غورځولې ده.
هغه زياته کړې، دا لويه چينوک چورلکه وه چې په کې د عملياتو سرتېري لېږدول کېږي او ممکن په کې سپاره لسګونه سرتېري وژل شوي وي.
خو په کابل کې د ناټو د روزنې د غوڅ ملاتړ ماموريت مطبوعاتي دفتر د وسله والو طالبانو دغه ادعا په کلکه رد کړه.
سرچينې پژواک اژانس ته وويل چې هلته د افغان ځواکونو يوې چورلکې چې په کې بهرني سرتېري سپاره وو، بېړنۍ ناسته کړې ده.
د ناټو مطبوعاتي دفتر وايي چې په دې پېښه کې هېڅ سرتېرى نه دى ټپي شوى.
د کاپيسا د امنيې قوماندانۍ وياند سروش کوهستاني او د تګاب ولسوالۍ امنيه قوماندان محمد نعيم ساپي له دې پېښې بې خبري وښوده.
خو ساپى وايي چې په دې ولسوالۍ کې د افغان ګډو ځوکونو په عملياتو کې تر ٣٠ پورې وسله والو مخالفينو ته مرګ ژوبله اوښتې ده.
د تګاب ولسوالۍ يو اوسېدونکى وحيدالله وايي چې دوى هم خبر شوي چې تېره شپه د بدراب درې په مياخېلو سيمه کې د عملياتو پر مهال يوه چورلکه غورځېدلې ده.
هغه وايي، دا لا نه ده معلومه چې چورلکه ويشتل شوې او که یې بېړنۍ ناسته کړې ده.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن